Nanchi Yehoba Mumumona Amba Shenu Nyi?

“NKAMBO, tufunjishai kulomba.” Mwananji wa bwanga umo byo amwipwizhe buno bwipuzho, Yesu wamukumbwile amba: “Pa kulomba, mwambe’mba, Tata, jizhina jenu jizhile.” (Luka 11:1, 2) Yesu wakonsheshe kwamba pe Yehoba kupichila mu kwingijisha mazhina a mushingi nabiji, ‘wa Bulume Bonse,’ ‘Mufunjishi Mukatampe,’ “Mulenga,” “Wa-kala-kene,” “Mfumu wa myaka.” (Nte. 49:25; Isa. 30:20; 40:28; Da. 7:9; 1 Timo. 1:17) Mu kifulo kya kwingijisha ano mazhina, Yesu wasajilepo kwingijisha kyambo kya “Tata.” Mambo ka? Kampe na mambo a kuba ukeba atweba kusolomokanga Mwine walengele bintu byonse, byonkatu mwana mucheche wa lukokelo byo asolomoka shanji wa butemwe.

Nangwa byonkabyo, bantu bamo kibakatazha bingi kulanguluka pe Lesa amba Shabo. Mwina Kilishitu wa jizhina ja Atsukoa waambile amba: “Pa myaka yavula yapichilepo panyuma ya lubatizhilo lwami, kyankatazhanga bingi kufwenya kwipi ne Yehoba ne kulomba kwi aye Tata.” Kabiji wanungilepo kwamba kine kintu kyamulengelanga kwiumvwa bino amba, “Kechi mvulukapo nangwa juba jimo batata bansema jo bamwesheshepo butemwe ne.”

Mu ano moba akatazha a kupelako, kyakatazha bingi nsemi wamulume kumwesha “muchima wa bumuntu” ku mwananji. (2 Timo. 3:1, 3) Bantu bavula beumvwatu byonka biumvwanga Atsuko. Nangwa byonkabyo, twafwainwa kutekanya mambo tuji na bishinka bya kine bya kuba amba Yehoba ye Shetu wa butemwe.

Yehoba ye Mpanyi wa Butemwe

Pa kuba amba tumumonenga Yehoba amba ye Shetu twafwainwa kumuyukisha bulongo. Yesu waambile amba: “Ka paji wayuka Mwana byo aji ne, kana bonka Batata; nangwa Batata byo baji ne, kana yenka Mwana, ne abo bantu bo aswa Mwana kwibasolwelaye.” (Mat. 11:27) Jishinda jawama jo twafwainwa kuyukilamo Yehoba byo aji Shetu ke kulanguluka pa byaambile Yesu pa mambo a Lesa wakine. Nanchi Yesu wabulañene amba ka pe Shanji?

Byo ayukile amba Yehoba ye Nsulo ya bumi bwanji, Yesu waambile amba: ‘Amiwa mbena kumwena bumi monka mwi Batata.’ (Yoa. 6:57) Ne atweba twatambula bumi kwi Shetu. (Sala. 36:9; Byu. 17:28) Ki ka kyalengejile Yehoba kupana bumi ku bantu? Nanchi kechi bwajinga butemwe nenyi? Pa mambo a buno bupe, ne atweba twafwainwa kutemwa Shetu wa mwiulu.

Butemwe bukatampe bwamwesheshe Lesa ku bantu, ke bobwa bwa kupana kitapisho kya bukuzhi bwa kwa Yesu. Buno bukuzhi bo bwalengela bantu bandengamambo kwikala balunda bakine ne Yehoba kupichila mu Mwananji ye atemwisha. (Loma 5:12; 1 Yoa. 4:9, 10) Kabiji na mambo a kuba Shetu wa mwiulu ye Ufikizha milaye yanji, twafwainwa kuketekela amba aba bonse bamutemwa kabiji bamukokela kulutwe na lwendo bakekala na ‘bwana bwa bene bwa lukumo bwa baana ba Lesa’.—Loma 8:21.

Kabiji Shetu wa mwiulu “uselesha juba janji” pe atweba pa juba pa juba. (Mat. 5:45) Kechi kikebewa kumulomba pa kuba’mba aseleshe juba ne. Bino tukebesha bingi kumona mute kabiji tumvwa bulongo kyuya! Kunungapo, Shetu ye mwine Mpanyi mukatampe wayuka byo tukeba ku mubiji saka tukyangyetu ne kumulomba ne. Onkao mambo, nanchi kechi twafwainwa kwikalapo na kimye kya kulangulukapo ne kusanchila Shetu wa mwiulu pa byo ata muchima bilengwa byanji nenyi?—Mat. 6:8, 26.

Shetu “Wituzhikijila na Lusa”

Bungauzhi bwa kwa Isaya bwalayile bantu ba Lesa ba ku kala amba: “Mitumba ikafumapo ne tutumbatumba tukashikulwapo, lusa lwami kechi lukafuma pe obewa ne, kabiji lulayañano lwami lwa mutende nalo kechi lukafumapo ne, byo byaamba Yehoba yenka wituzhikijila na lusa.” (Isa. 54:10, The Bible in Living English) Pa kukosesha kino kishinka, lulombelo lo alombele Yesu pa juba janji japeleleko panopantanda lumwesha kuba’mba Yehoba kya kine ye “wituzhikijila na lusa.” Pa mambo a baana banji ba bwanga, Yesu walombele amba: “Pakuba bano bo baji panopantanda, kabiji amiwa ngiya kwenu. Tata Wazhila, mwibalame mu jizhina jenu jo mwampele.” (Yoa. 17:11, 14) Yehoba wata muchima baana ba bwanga ba kwa Yesu kabiji wibazhikijila.

Jishinda jimo Lesa jo etuzhikijilamo ku bitewa bya kwa Satana lelo jino ke kwitupa kajo ka ku mupashi pa kimye pafwainwa kupichila mwi ‘kalume wakishinka kabiji wa maana.’ (Mat. 24:45) Kuja kano kajo ketukosesha kwanema bingi pa kuba’mba ‘tuvwale byonse bya nkondo bya Lesa.’ Kyakumwenako, “jikebo ja lwitabilo,” jituzhikijila ku “miketo ya mujilo yonse ya kwa aye mubi.” (Efi. 6:11, 16) Lwitabilo lwetu lwituzhikijila ku bulemo bwa ku mupashi kabiji lumwesha amba Shetu wa mwiulu wituzhikijila.

Twakonsha kufunjilapo byavula pa mambo a lusa lwa Shetu wa mwiulu kupichila mu kumona Mwana Lesa byo aubilenga bintu kimye kyo ajinga panopantanda. Monai jishimikila janembwa mu Mako 10:13-16. Apano Yesu bamutela saka amba ku baana banji ba bwanga amba: ‘Balekai baana bacheche beye kwi amiwa.’ Aba baana bacheche byo baishile kwi aye, Yesu wibakumbachile ne kwibapesha. Byo basangalelepo! Kabiji Yesu byo aambile’mba: “Awa wammona amiwa wamona ne Batata,” kino kimwesha amba Lesa wakine ukeba atweba kwiya kwi aye.—Yoa. 14:9.

Yehoba Lesa ye Mwine wa butemwe bukatampe. Ye Mpanyi mukatampe Uzhikijilañana, ukeba atweba kufwenya kwipi ne aye. (Yako. 4:8) Onkao mambo, kwakubula nangwa kuzhinaukatu ne, Yehoba ye Shetu wakilamo kuwama.

Byo Tumwenamo Pakatampe!

Tumwenamo pakatampe mu kuketekela Yehoba kuba’mba ye Shetu wa mwiulu wa butemwe kabiji wa lusa. (Mana 3:5, 6) Yesu wamwenejilemo mu kuketekela Shanji na muchima wanji yense. Kilishitu waambijile baana banji ba bwanga amba: “Kechi nji bunke ne, pakuba tuji ne amiwa ne Batata bantuma.” (Yoa. 8:16) Yesu kimye kyonse bamukwashanga kwi Yehoba. Kyakumwenako, byo bamubatizhenga, bamwambijile byambo bya butemwe kwi Shanji bya kuba amba: “Uno ye mwanami, ye natemwa, mo namwena lusekelo.” (Mat. 3:15-17) Kabiji byo kwashajiletu pacheche kuba’mba afwe, Yesu wabijikile amba: “Tata, natula mupashi wami mu maboko enu.” (Luka 23:46) Ne pa kyokya kimye napo Yesu waketekejile mwi Shanji.

Ne atweba byo byo kyakonsha kwikala. Yehoba byo aji ne atweba, ki ka kyakonsha kwituletela moyo? (Sala. 118:6) Atsuko, waambiwapo ku ntendekelo wajinga na muteeto wa kwiketekela mwine umvwe ke apite mu makatazho. Pano wafunjile byajinga bwikalo bwa kwa Yesu ne mwingilo wanji, kikatakata watele muchima pa bulunda bwa kwa Yesu na Shanji wa mwiulu. Ki ka kyafuminemo? Atsuko mwine washimuna amba: “Nafunjile byo kilumbulula kwikala na Shetu ne kumuketekela.” Kabiji wanungilepo amba: “Naikele na mutende ne lusekelo. Kine kafwako nangwa kimo kyakonsha kwituletela moyo ne.”

Kabiji tumwenamo byepi mu byo tumona Yehoba kwikala Shetu? Baana javula batemwa bingi bansemi babo kabiji bakeba kwibatokesha ku muchima. Na mambo a butemwe bwanji, Mwana Lesa ‘waubilenga bya kumutokesha pa muchima [Shanji] moba onse.’ (Yoa. 8:29) Po pamotu, ne atweba butemwe bwetu bwa kutemwa Shetu bwakonsha kwitulengela kwingila bintu na maana ne ‘kumutota.’—Mat. 11:25; Yoa. 5:19.

Shetu ‘Ukwata pa Kuboko Kwetu kwa Kilujo’

Kabiji Shetu wa mwiulu witupa “nkwasho,” uno ke mupashi wanji wazhila. Yesu waambile’mba “ukemutangijila ku byonse bya kine” (Yoa. 14:15-17; 16:12, 13) Mupashi wazhila wa Lesa wakonsha kwitukwasha kumvwisha biji Shetu. Wakonsha kwitukwasha kukundula “masakwa akosa,” ko kuba’mba milanguluko yatama, nangwa amba yaluwankana, ne mu jino jishinda “tuleta milanguluko yonse mu buzha bwa kukokela Kilishitu.” (2 Ko. 10:4, 5) Onkao mambo, twayai tulombenga kwi Yehoba pa uno “nkwasho” ye etulaya, ne kuketekela kuba’mba ‘Shetu wa mwiulu upana mupashi wazhila ku bamulomba.’ (Luka 11:13) Kabiji twafwainwa kulombanga pa kuba’mba mupashi wazhila etukwashenga kufwenya kwipi ne Yehoba.

Mwana mucheche umona amba wazhikijilwa ne kubula kumvwa moyo inge ke ende na bashanji. Umvwe kya kine mumona Yehoba amba Shenu, mwakonsha kumvwina byambo bya lutekenesho byaamba’mba: “Amiwa, Yehoba Lesa wobe, nkakukwata pa kuboko kwa kilujo; ye amiwa nakwambila namba: Kuba moyo ne; amiwa nkakukwasha.” (Isa. 41:13) Mwakonsha kwikala na jishuko jawama ja ‘kwendanga’ na Lesa myaka ne myaka. (Mika 6:8) Twajijilai kuba byo akeba, mambo kino kikemulengela kwikala na butemwe, lusekelo ne kwiumvwa kuzhikijilwa na mambo a kumona Yehoba amba ye Shenu.

[Tubyambo twa mushi]