Fwenyai Kwipi ne Lesa
Shetu Wakilamo Kunema
“TATA.” Kuji byambo bichechetu bizakula bingi bantu michima. Shetu watemwa baana banji wibakwasha kwikala bulongo. O ene mambo Baibolo o aambila pe Yehoba Lesa amba “Tata.” (Mateo 6:9) Nanchi Yehoba Shetu wa mutundu ka? Pa kuba’mba tukumbule buno bwipuzho, patanshi twayai tumone byambo Yehoba byo aambile kwi Yesu kimye kyo a batizwe. Mambo jishinda jo ambilamo shetu ku baana banji jo jimwesha byo aji.
Pepi nobe mu October 29 C.E., Yesu wayile ku Mukola wa Yodano na kubatizwa. Baibolo washimuna kyaubiwe: “Yesu, byo abatizhilwe, ponkapotu watuntukile mu mema: kabiji talai mwiulu mwashinkukile, ne aye wamwene ne mupashi wa Lesa sa ekila pamo nobe nkunda, ne kumwikijila; kabiji ponkapo ne jiwi jafumine mwiulu amba, Uno ye mwanami, ye natemwa, mo namwena lusekelo.”a (Mateo 3:16, 17) Bino byambo byo aambile aye mwine Yehoba, bitumwesha biji muchima wanji byo aji Shetu. Akimonai bintu bisatu Yehoba byo aambile ku mwananji.
Kintu kitanshi, byo aambile byambo bya kuba’mba “uno ye mwanami,” ko kuba’mba Yehoba waambilenga’mba ‘nasekela bingi pa kwikala Shobe.’ Shetu wamilangwe ulengela baana banji kwiumvwa’mba wibatemwa kabiji ne kwibata muchima. Baana bakeba kwiumvwa’mba banema bingi bonse pa muntu pa muntu mu kisemi. Akifwanyikizhai Yesu byoeumvwine—nangwatu kimye kyo ajinga mukulumpe—pa kumvwa bino byambo kwi Shanji bya kuba’mba wanemekwa bingi!
Kya bubiji, pa kumulumbulula Mwananji amba “ye natemwa,” ko kuba’mba Yehoba wamwesheshenga patokatu to byo amutemwa Yesu. Mu jino jishinda uno Shetu waambilenga’mba na ‘kutemwa.’ Shetu wawama ubula baana banji amba wibatemwa bingi. Byambo bya uno mutundu kubikapo ne butemwe bwa kine—bikwasha baana kukoma bulongo. Byo kyamusangajikilepo Yesu pa kumvwa jiwi ja Shanji amba na kutemwa!
Kya busatu, byo aambile byambo bya kuba’mba “mo namwena lusekelo,” Yehoba wamwesheshe’mba wamuswa Mwananji. Kiji nobe Yehoba waambilenga’mba, ‘Mwanami, natemwa bingi pa bintu byo wauba.’ Shetu wa butemwe umonapo bimye bimo bya kwibayukishishamo baana banji amba wasekela pa bintu byawama byo bamba nangwa byo babena kuba. Umvwe bansemi saka batundaika baana babo, kibalengela baana kwiumvwa balusekelo. Kyamweka Yesu watundaikilwe bingi pa kumvwa’mba Shanji wamuswa!
Kwambatu kine, Yehoba ke Shetu wakilamo kunema. Nanchi musakisha kwikala na Shetu wa uno mutundu nyi? Umvwe ibyo, mwakonsha kutekeneshiwa pa kuyuka kuba’mba mwakonsha kwikala balunda ne Yehoba. Umvwe mwaikala na lwitabilo lwa kufunda pe aye ne kukeba kuba kyaswa muchima wanji, ne aye ukekala mulunda nenu. Baibolo waamba’mba: “Fwenyai kwipi ne Lesa, kabiji ne aye ukafwenya kwipi ne anweba.” (Yakoba 4:8) Ki ka kyakonsha kwimulengela kwiumvwa bazhikijilwa kyakila pa kwikala balunda na Yehoba Lesa, aye Shetu wawama wakilamo kunema?
[Tubyambo twa mushi]
a Mwayila jishimikila ja Mambo awama a kwa Luka, Yehoba waingijishe kyambo kya kuba’mba “obewa,” kwamba’mba: ‘Obewa yobe mwanami ye natemwa; mwi obewa mo namwena lusekelo.’—Luka 3:22.