Bapwishishenga Sukulu Wa Gileada Wa Nambala 125
Bamishonale Bebatundaika Kwikala Nobe Yelemiya
“BA GEOFFREY JACKSON ba mu Jibumba Jitangijila baambile’mba: “Sukulu wa Gileada wanema bingi.” Baambile ku bantu 6,156 batainwe ku kipwilo kya bapwishishe Sukulu wa Gileada wa nambala 125 kyajingako pa September 13, 2008. Bamishonale bo batuma kala “monse mwapela ntanda” kubajilako ne bapwishishenga sukulu 56 bafika pano ke 8,000.—Byu. 1:8.
Mulongo Jackson, wajinga wa ku mupando pa kuno kupwila waipwizhe amba, “Nanchi kwimuketekela kukalengela kwingila bulongo mwingilo wenu nyi?” Kepo aambile pa bintu bina bilengela amba muntu bamuketekele: kwikala na muchima wawama, kwikala wa kumwenako wawama, kwikala muntu wafwainwa kufunjisha Mambo a Lesa, ne kulengela jizhina ja Yehoba kuyukanyikwa.
Ba David Schafer, ba mu Kometi ya Lufunjisho baambile pa mutwe wa kuba’mba “Nanchi Mwayuka Bintu Byonse Nyi?” Baambijile baana basukulu amba mwakonsha “kuyuka bintu byonse” bimufwainwa mu mwingilo wenu wa bumishonale umvwe mwatwajijila kukeba Yehoba ne kukinka manungo mwi ‘kalume wa kishinka [kabiji] wa maana.’—Mana. 28:5; Mat. 24:45.
Kabiji ba John E. Barr ba mu Jibumba Jitangijila baambile pa kishina kya kuba’mba “Kechi Muswishe Kintu Nangwa Kimo Kwimwabanya na Butemwe bwa Lesa Ne.” Mulongo Barr watundaikile bapwishishenga sukulu ne bansemi babo byonkatu nsemi byo akonsha kutundaikañana, ne kino kibalengejile kubula kwikala na kijikila mu mwingilo wabo wa bumishonale. Waambile’mba: “Butemwe bwa Lesa bwanema bingi mu bwikalo bwetu.” Kintu kya byepi, nangwa kya byepi kechi kikakonsha kwibabanya bamishonale na butemwe bwa Lesa ne.
Ba Sam Roberson ba mu Dipatimenti Itala pa Masukulu pa Patterson batundaikile luonde “kuvwala kivwalo kyawamisha.” Bapwishishe sukulu bakonsha kuvwala “Nkambo Yesu Kilishitu” inge kya kuba bafunda bintu byaubile Yesu ne kwibingijisha. (Loma 13:14) Palondejile ba William Samuelson, bakalama ba Dipatimenti itangijila Sukulu wa Gileada ne masukulu akwabo pa Patterson, baambile pa kintu kilengela kunemeka muntu. Kulanguluka bya Lesa ko kulengela muntu amba bamunemeke, kechi bya buntunshi ne.
Mufunjishi aye Michael Burnett washikishe baana ba sukulu kushimikizha bintu byawama byo bamwenenga mu busapwishi kimye kyo bajinga pa sukulu wa Gileada. Nangwa kya kuba baana ba sukulu bavula bebabujile kwingijilanga mu nyaunda ingijilamo basapwishi javula kimye kyo bajinga pa Sukulu wa Gileada pa Patterson mu muzhi wa New York, batananga bantu bakebele kufunda bukine. Ba Gerald Grizzle ba mu Ofweshi wa Kupwila kwa Nkambi baipwizhe balongo basatu bajinga ku Sukulu wa ba mu Kometi wa Musampi. Byambo byabo byakwashishe baana basukulu kwinengezha kuyuka mwakubila na bintu byo bakatananga mu mwingilo wabo.
Ba David Splane ba mu Jibumba Jitangijila, kabiji batainwe ku sukulu wa Gileada wa nambala 42 baambile jashi ja kuba’mba “Ikalai Nobe Yelemiya.” Nangwa kya kuba Yelemiya wajinga na moyo mu mwingilo wanji, Yehoba wamukoseshe. (Yele. 1:7, 8) Lesa ukoba kintutu kimo ku bamishonale bakatataka. Mulongo Splane waambile’mba: “Umvwe mwakankalwa kumvwañana na mukwenu, nembai byubilo jikumi byo mwamutemenwa ao muntu. Umvwe mwakankalwa kubala bino byubilo jikumi, abya uno muntu kechi mwamuyuka bulongo ne.”
Yelemiya wajinga na muchima wa kwipana. Kimye kyo akebelenga kusankilapo mwingilo wanji, walombele, ne Yehoba wajinga nanji. (Yele. 20:11) Mulongo Splane waambile’mba: “Umvwe mwalefulwa, mubulai Yehoba. Kabiji mukakumya Yehoba byo akemukwasha.”
Ku mpelo ya kuno kupwila, wa ku mupando wavulwilemo luonde amba baana ba sukulu bafunda mashinda avula akalengela amba bebaketekele ku bantu. Umvwe bano bamishonale bebaketekela ku bantu, kikalengela byambo byabo kufika bantu pa michima.—Isa. 43:8-12.
[Kitenguluzha pa peja 22]
BIBELENGELO BYA BAJINGA MU SUKULU
Bafumine mu byalo: 6
Bebatuma mu byalo: 21
Baana basukulu bonse pamo bajinga: 56
Myaka ya kusemwa umvwe twiyabanya pa muntu pa muntu ke: 33.9
Myaka yo baikala mu bukine umvwe twiyabanya pa muntu pa muntu ke: 17.4
Myaka yo baingila mu mwingilo wa kimye kyonse umvwe twiyabanya pa muntu pa muntu ke: 13
[Kipikichala pa peja 23]
Bapwishishenga Sukulu wa Gileada wa Nambala 125
Ndonda ya mazhina alondelapo ibena kubalwa kufuma panshi kuya peulu, ne mazhina nao alondankana kutatwila ku kipiko monka mo batantamina.
[Caption pa peja 23]
(1) Hodgson, A.; Wall, A.; Beerens, K.; Hortelano, M.; Newman, L.; De Caso, A. (2) Jenkins, J.; Jarzemski, T.; Méndez, N.; Corona, V.; Canalita, L. (3) Fryer, H.; Savage, M.; Tidwell, K.; Erickson, N.; Dyck, E.; McBeath, R. (4) Perez, L.; Puse, L.; Skidmore, A.; Young, B.; McBride, N.; Rondón, P.; Goodman, E. (5) Beerens, M.; Ferguson, J.; Pearson, N.; Chapman, L.; Wardle, J.; Canalita, M. (6) Perez, P.; De Caso, D.; Young, T.; Rondón, D.; Goodman, G.; Jenkins, M.; Dyck, G. (7) Corona, M.; Wall, R.; Puse, S.; Méndez, F.; Jarzemski, S.; Savage, T. (8) Newman, C.; Ferguson, D.; Skidmore, D.; Erickson, T.; McBride, J.; Pearson, M.; Chapman, M. (9) Hodgson, K.; Wardle, A.; McBeath, A.; Tidwell, T.; Fryer, J.; Hortelano, J.