Nanchi Mukebatu Amba Kanatu Byo Mukeba Byubiwe Nyi?
BAKALOMBWANA babiji babena kukaila pamo. Umo waangata kingelengele mukwabo ne kubijika amba, “Kyami!” Kufumatu ne kala, atweba bantu babula kulumbuluka tumwesha byubilo bya kwitemwa. (Nte. 8:21; Loma 3:23) Kabiji bantu mwaya ntanda batundaika byubilo bya kwitemwa. Umvwe tukeba kuchinuzhuka kino, twafwainwa kwingila na ngovu kushinda byubilo bya kwitemwa. Umvwe twabula kuba kino, twakonsha kutuntwisha bakwetu ne konauna bulunda bwetu ne Yehoba.—Loma 7:21-23.
Mutumwa Paulo witutundaika kuyuka byubilo byetu byo byakonsha kukwasha nangwa kutuntwisha bakwetu, byo anembele’mba: “Bintu byonse byabula kuzhila: bino kechi byonse byafwainwa kuba ne. Bintu byonse byabula kuzhila; bino kechi byonse bikomesha bantu ne.” Kabiji Paulo waambile’mba: “Kechi mwikale ke ba kwituntulako ne.” (1 Ko. 10:23, 32) Bintu byetu byonse byo tukeba’mba tube, kyanema bingi kukiipuzha’mba: ‘Umvwe bino bintu byo nkeba kuba byaleta bufinda mu kipwilo abya nkebisankilapo nangwa kya kuba nji na lūsa lwa kwi byuba nyi? Abya nkalondela mikambizho ya mu Baibolo nangwa kya kuba kechi kyapela kuba kino nenyi?’
Pa Kusala Nkito
Bantu bavula balanguluka’mba nsajilo yabo ya nkito ke kintu kyo bafwainwa kwifuukwilapo abo bene akyo kyakonsha kubula kukatazha bakwabo. Bino monai kyamwekele ku mwanamulume musulu mu muzhi mucheche wa ku kabeta ka bulenge ka America. Wayile nkuwa mu kisela kya kuchika kabiji wajinga kitomi. Nangwa byonkabyo, byo afunjile Baibolo na Bakamonyi ba kwa Yehoba, watendekele kwingijisha bintu byo afunjilenga ne kupimpula bwikalo bwanji. (2 Ko. 7:1) Byo akebelenga kutatula kusapwilanga pamo na kipwilo, mukulumpe mu kipwilo wamutundaikile kulanguluka pa nkito yanji. Uno mwanamulume wapoteshanga maalwa mu muzhi, engila ku bintu byavula, pano bino mu yoya mpunzha ano maalwa beasankakanyanga na bintobyantobya ne kutoma amba bapendwe.
Mwanamulume wamwene kuba’mba umvwe ke asapwile aku saka apotesha maalwa, kikalengela kipwilo kunenwa bibi kabiji ukonauna bulunda bwanji ne Yehoba. Nangwa kya kuba wajinga na kisemi kikatampe kyo asunganga, wikilekele kupotesha maalwa. Lelo jino ubena kusunga kisemi kyanji kupichila mu kupotesha mapepala. A uno mwanamulume, mukazhanji, ne baana babakazhi babiji pa baana babo batanu, babatizwe. Babena kusapwila mambo awama na mukoyo sa bakasuluka.
Pa Kusala Balunda
Nanchi kupwanañana na bantu babula bena Kilishitu bakwetu ke kintu kya kwifuukwilapotu muntu mwine nyi, inyi mwavwangwa mafunde a mu Baibolo? Nyenga umo wakebelenga kuya ku kijiilo na nsongwalume wabujile mwina Kilishitu wa kine. Nangwa kya kuba bamujimwineko pa bintu byatama bifumamo, aye wapwishishe mu muchima amba wajinga na lūsa lwa kutanwako kabiji wayile ku kijiilo. Kechi papichile ne kimye kyabaya ne, byo afikile bamupele bya kutoma byo basankakenyeko muchi washinta wa tulo. Byo apapukile mu tulo wataine amba bamulenga mambo ku yenka ye amwenenga amba mulunda nanji.—Esakanyaiko Ntendekelo 34:2.
Ibyo kuba’mba kupwanañana na bantu babula bena Kilishitu kechi kimye kyonse kyo mufuma bya malwa bya uno mutundu ne, bino Baibolo witujimunako’mba: ‘Awa wenda na ba maana ukekala ke wa maana, pakuba awa wenda ne bakosama ukamona byakatazha.’ (Mana. 13:20) Kwa kubula nangwa kuzhinaukatu ne, kwendañana na babi mufuma byakatazha! Byambo bya Mana 22:3 byaamba’mba: “Wajimuka pa kumona bileta lufu bibenakwiya ufyama; pakuba kilubi uyatu ne kwiletelela.” Mu kwendañana na babi mwakonsha kufuma byatama ne konauna bulunda bwetu na Lesa.—1 Ko. 15:33; Yako. 4:4.
Mu Mvwajilo ne Mwekelo
Mvwajilo ne mafwashonyi bipimpulwa pa kimye pa kimye. Nangwa byonkabyo, mafunde a mu Baibolo pa mambo a mvwajilo ne mwekelo kechi apimpulwa ne. Paulo watundaikile banabakazhi bena Kilishitu kuba’mba “bavwale bibafwainwa na bumvu, ne butekanye.” Jino jifunde jingila ne ku banabalume. (1 Timo. 2:9) Paulo kechi waambile’mba bena Kilishitu bavwalenga byabula kufwainwa ne, nangwa’mba bafwainwa kuvwalanga bya kuvwala bya mutundutu umo ne. Nanchi bumvu bo bu ka? Dikishonale umo walumbulula kyambo kya bumvu amba “kubula kwilundumika nangwa’mba . . . mvwajilo yawama, ñambilo ya mushingi ne byubilo byawama.”
Twafwainwa kwiipuzha atweba bene’mba: ‘Nanchi nafwainwa kwamba namba mu bukishinka mvwala byamfwainwa na bumvu umvwe nakakachila ku mvwajilo yami ilengela bantu kunta muchima nyi? Nanchi mvwajilo yami ilengela bantu kunzhinauka nangwa kuzhinauka byubilo byami nyi?’ Twakonsha kuchinuzhuka “bya kwituntulako bantu” kupichila mu kubula ‘kutesha muchima ku bintu [byetu] byonka ine, kana ne ku bya bakwetu pamo.’—2 Ko. 6:3; Fili. 2:4.
Mu bya Busulu
Kimye mu kipwilo kya mu Kolinda kyo mwajinga byubilo byatama ne kubepaikwa, Paulo wanembele’mba: “Lelo mambo ka ne kuswatu kubiwa bibi ne? Mambo ka ne kuswatu kubepaikwa ne?” Paulo wafunjile bena Kilishitu kwilekela mambo kukila kutwala mulongo wabo ku kije. (1 Ko. 6:1-7) Mulongo ku United States waumvwijile luno lujimuno. Bapusene na mwina Kilishitu mukwabo wamutwezhezhe mingilo pa mambo a mfweto yo afwainwe kumupa. Kulondela mikambizho ya mu Binembelo, bano balongo babiji besambile pa bimye byavula kwa kubula kupwisha lukatazho. Kyapeleleko, batwajile lukatazho “ku kipwilo,” ko kuba’mba ku bakulumpe mu kipwilo ba bwina Kilishitu.—Mat. 18:15-17.
Kya bulanda ke kya kuba’mba luno lukatazho kechi lwapwile ne. Panyuma ya kutoñaminamo mu lulombelo, awa wa mingilo wafukwilepo kulubako mali avula o alangulukile kuba’mba yo mfweto yanji. Mambo ka? Waambile’mba, “Kuno kupusenamo kwandengejilengatu kubula lusekelo ne kuntayila kimye kyanema kyafwainwe kwingilako bintu bya ku mupashi.” Byo afuukwilepo bino, waikajile na lusekelo jibiji, kabiji Yehoba wamupesheshe bingi mu mwingilo wanji.
Nangwa mu Tucheche
Kabiji kubula kukebatu’mba kanatu kyo twafuukula kingile, nangwatu mu tucheche kuleta mapesho. Pa juba jitanshi ja kupwila kwa nkambi, bapainiya bamulume ne mukazhi bafikile bukiji ne kwikala po basakilenga. Kupwila byo kwatendekele, kisemi kimo kyajinga na baana bavula kyatwelele. Bano bapainiya byo bamwene amba kino kisemi kibena kukeba pa kwikala pabaya, bapaine bipona byabo bibiji. Kino kyalengejile kisemi kyonse kwikala pamo. Byo papichile moba acheche kupwila kwa nkambi saka kwapwa kala, bano bapainiya batambwijile nkalata ya lusanchilo kufuma ku kyokya kisemi. Nkalata yalumbulwile amba kukelwa ku kupwila kwa nkambi kwibalengejile bingi kulefulwa. Baikajile na lusekelo mambo a lusa lwa bapainiya bamulume ne mukazhi.
Inge twaikala na jishuko, kechi twakonsha kuminapotu popolo amba kanatu kyo twafuukula ne, twafwainwa kuswa ne kyafuukula bakwetu. Kupichila mu kumwesha butemwe bubula ‘kwikebela bintu,’ tukwasha kulama mutende mu kipwilo ne bakwetu. (1 Ko. 13:5) Ne kyakilamo kunema, tulamawizha bulunda bwetu ne Yehoba.
[Kipikichala pa peja 20]
Nanchi mulondela bimubulako bakwenu pa kusala mafwashonyi nyi?
[Kipikichala pa peja 20, 21]
Nanchi mwakonsha kupana kipona kyenu ku balongo benu nyi?