Kyankwasha Kwikala Na Lusekelo Nangwa Nalemana
Byashimikizha ba Paulette Gaspar
Nangwa nasemenwe sananema makilogalamu asatu, bino badokotala bayukile’mba kechi nemutuntulu ne. Nachimaukile pa kusemwa. Nasemenwe bukibombele. Kilengela kwikala bino ke kikola kinenkenya bikupa. Bantwajile na kuntumbula ne kunsokankanya bikupa, panyuma ya bino badokotala bapwishishe mu muchima amba kupuluka kafwapo. Batajilengapotu kuba’mba maawala 24 kechi apwe ne, nsakufwa.
NASEMENWE pa 14 June mu mwaka wa 1972 mu muzhi mukatampe wa Canberra mu Australia. Kwashajiletu tiki inge nafwile juba jitanshi, bino napulukile. Kabiji naishile kwikala na kamusongo. Kino kyalengejile badokotala kupwisha‘mba pano ke kufwatu. Balekela kumpa muchi “batajilengapotu.” Bino kechi nafwile ne, napulukile.
Nakonsha kufwanyikizha lukatazho lukatampe lwajinga na bansemi bami pa kikye kimye. Mambo kashinshi ka kuba’mba nsakukosa kaji kafwapo, dokotala wawamine muchima watendekele ne kutekenesha bansemi amba baleke kwinyengaika. Pa bañondo batanshi basatu bo najinga mu kipatela, bansemi bebakainyenga kunkwata. Mambo bachiinenga kunkozha. Byo kyamwekeletu patoka’mba nsakukosa, badokotala bafuukwilepo amba bantwale ku nzubo ko balamina baana balemana.
Bansemi bami abo basajilepo kuntwala ku nzubo. Pa kikye kimye bamama po po batendekeletu kufunda Baibolo na Bakamonyi ba kwa Yehoba. Bintu byo bafunjilenga bibalengejile kunta bingi muchima. Kibakatezhenga bingi kwikala kimye kyabaya ne amiwa mambo bajinga ne na mingilo ikwabo yavula ya kwingila pa kuba’mba bandame bulongo. Bakelukangatu mu kipatela ne amiwa. Namokokangatu ne pa kungomvwa. Nangwatu pa kuchamuna bikupa byaubanga milala.
Natendekele Kwikala na Binyenge
Nakomejiletu mu nkinga ya bilema. Kechi nakonsheshe kufunda kwenda ne. Bansemi bandamine bingi bulongo nangwa baikalanga na makatazho.
Kikwabo, bamama bebikangako bingi kumfunjisha byambo bya lutekenesho biji mu Baibolo. Kimo pa byo bafunjishe ke kya kuba’mba Lesa ukalula ino ntanda ke paladisa mukekala bantu balumbuluka ku mupashi, ku mubiji ne mu milanguluko. (Salamo 37:10, 11; Isaya 33:24) Bino bamama baambanga kipasu kuba’mba kibekajile bingi ku muchima kya kuba’mba nkamonapotu bwikalo bwawama kana paladisa akafike.
Natendekele kufunda pa sukulu wa bilema. Bafunjishi balangulukanga kuba’mba kafwako kyo nkoba ne, ne amiwa mwine byo byo nalangulukanga. Kyankatezhe bingi kutwajijila kwikala mwana wa sukulu. Banyike bavula bangyanjishanga bingi. Palutwe kacheche, nayile na kufunjila pa sukulu pabula baana balemana. Kupwanañana na bakwetu kyankatazhanga kabiji ne kukoka bingi. Bino nebikileko kufikilatu ne byo napwishishe sukulu wami.
Kikatakata mu myaka ya ku sekondale nalangulukanga pa bwikalo bwatama bwaikelangamo bakwetu baana basukulu. Kabiji navulukanga biji mu Baibolo byamfunjishe bamama. Naswile byaambanga bamama namba bukine. Bino pa kikye kimye kechi byamfikile pa muchima ne. Pa kimye kimo, nafuukwilepo kwikala bwikalo bwa kwitobwela na bya kisangajimbwe kwa kubula kulanguluka pa bya kulutwe.
Byo nafikizhe myaka ya kusemwa 18 nafumine ku bansemi ne kuya na kwikala ku nzubo ko balamina balemana. Kuno kuviluka kwandetejile lusekelo ne moyo. Naumvwanga bingi bulongo mambo nakasulukile kabiji twakayanga bingi na balunda nami. Bakwetu bavula basongwelwe. Ne amiwa nakebelenga bingi kusongolwa. Nakankelwe kusongolwa na mambo a bulema. Kino kyandengejile bingi kwikala na binyenge.
Nangwa byonkabyo, kechi napangamo Lesa mambo na bulema bwami ne. Nafunjile byavula pe Lesa byandengejile kuyuka kuba’mba mwayila byubilo byanji kechi wakonsha kuba kyatama nangwa pachechetu ne. (Yoba 34:10) Inge nalanguluka pa bwikalo bwami byo buji kyandetelanga bingi binyenge.
Byapwilenga Binyenge
Kyawamine bamama bayukile byaji ku muchima wami kabiji batetejileko ne mukulumpe mu kipwilo waikalanga pa bwipi. Wantumijile lamya ne kungitako ku kupwila kwa bwina Kilishitu ku Nzubo ya Bufumu ya Kamonyi ba kwa Yehoba. Kabiji nyenga umo watendekele kumfunjisha Baibolo mu mulungu jimo.
Bamvulwilemo bukine bwa mu Baibolo bwafunjishe bamama mu myaka ya kunyuma. Bwikalo bwatendekele kuwama pacheche. Naumvwanga bingi bulongo kupwanañana na bena Kilishitu bakwetu. Pano bino, kechi naambanga pa byo neumvwanga ku muchima ne, nachinanga kwivulumwina binyenge. Namona kyo kyalengijile kubanda kutemwa Lesa kufuma panshi ya muchima. Bino nayukile buneme bwa kwipana kwi aye. Mu ñondo wa Kuvumbi mu 1991 mo mo namwesheshe kwipana kwami kupichila mu kubatizwa.
Nafuminemo mu nzubo mo twaikalanga na bakwetu babilema, navilukijile mu kibamba mwa bunke bwami. Kuno kuviluka kwandetejile lusekelo ne makatazho. Mambo natendekele kumvwa mukose. Kabiji naakaminwe bingi na mambo a bansongwalume kundukuka. Binyenge byabweleletu pakala. Nebikangako kusangalala bino mu muchima binyenge sabyanteekesha. Nakebanga bingi kwikalapo na mulunda wa kine.
Kyamweka Yehoba ye wampele mulunda uji byonka byo nakebelenga. Bakulumpe mu kipwilo baambijile Suzie nyenga wasongolwa kuba’mba atwajijile na kumfunjisha Baibolo. Ba Suzie kechi bajingatu bafunjishi bami ne, baikele ke mulunda nami wa pa muchima.
Ba Suzie bamfunjishe kubulako bakwetu byo nafunjilenga kupichila mu busapwishi bwa ku nzubo ku nzubo ne bwa mu misambotu. Natendekele kuyuka bulongo byubilo bya Lesa. Nangwa nabatizwe, kechi natemenwe kya kine Lesa kufuma panshi ya muchima wami ne. Kimye kimo nakebelenga ne kusankilapo kwingijila Lesa. Nabujile ba Suzie lukatazho lo najinga nalo kabiji bankwashishe bingi.
Ba Suzie bankwashishe kuyuka kuba’mba kwipapika na bantu babula kutemwa Yehoba kya kine ko kwandengejilenga binyenge kubayilako. Onkao mambo, natendekele kupwanañana na bantu bakoma ku mupashi kikatakata bakikulumpe. Kabiji bamama kechi twaumvwañananga kya kine ne. Onkao mambo, natendekele kukosesha bulunda na bamama ne kolojami wamulume. Nakuminye bingi byo naikajile na lusekelo kukila moba a kunyuma. Balongo ne banyenga ba mu kipwilo, kisemi ne aye mwine Yehoba yo yajinga nsulo ya bulume ne lusekelo lwami.—Salamo 28:7.
Mwingilo Mupya
Pa kushonkena kwa nkambi kumo ko natainweko, kwajinga jashi jimo jaambile pa lusekelo luji na bavula baji mu mwingilo wa kimye kyonse wa bwina Kilishitu, jandengejile kulanguluka’mba, ‘Ne amiwatu nafwainwa kwingilako uno mwingilo!’ Bino nayukile’mba kechi kikampelela ne. Panyuma ya kulombapo, nafuukwilepo kupana pepala wa kutendekelapo mwingilo wa kimye kyonse wa kwikala mufunjishi wa Baibolo. Mu April mu 1998 natendekele uno mwingilo.
Byo nji kilema, ngya byepi mu busapwishi? Kisemwa kyami kya kwiubila bintu amiwa mwine, kechi nkebanga kukondola bantu na kunsenda nangwa kunkwasha ne. Kyo kyalengejile ba Suzie ne bamwatawabo ba Michael kufuukulapo kumpotela kapulututu. Pano ñendesha byepi kano kapulututu? Byonkatu byo mwamona pa kipikichala, kano kapulututu bekalengejiletu amiwa. Kimpelela bingi pa kukanjilapo kufuma mu nkinga ya bilema, ne kya kuba mubiji wami wanemenetu makilogalamu 19!
Na kano kapulututu fwakasha bingi kabiji kimpelela kuya na kufunjisha Baibolo pa kimye kyafwainwa. Ñumvwa bingi bulongo kwendesha kapulututu kami nsaka ñumvwa bulongo kamumpempe na kupupa, kwambatu kine kino kindetela lusekelo mu bwikalo bwami!
Ñumvwa bingi bulongo kwisamba na bantu mu mikwakwa, bavula bantekenya kabiji ne kumpa bingi mushingi. Natemwa bingi kufunjisha bantu biji mu Baibolo. Kinsekesha bingi kuvuluka kyamwekele kimye kimo kyo twajinga mu mwingilo wa ku nzubo ku nzubo na mukwetu wazama. Mukwetu byo aimwine mwina nzubo wakankamenetu na kuntala wabwela waipuzha ye najinga nanji amba: “Awe naye wamba nyi?” Bonse twaponejiletu mu tuseko. Kabiji byo napwishishe kumusapwila, uno mwanamukazhi po po ayukile’mba nanchi ñambatu bulongo!
Bwikalo bwami bwawama mambo nafunda kutemwa Yehoba Lesa. Nsanchila bingi bamama bamfunjishe bukine bwa mu Baibolo kabiji mbena kutengela na luketekelo kimye kya kulutwe kyafwenya kala pepi, Lesa po akalula “bintu byonse ke bipya” ne mubiji wami.—Lumwekesho 21:4, 5.
[Mabulañano pa peja 26]
“Inge nalanguluka pa bwikalo bwami byo buji kindetela bingi binyenge”