Byo Mwakonsha Kumvwa Biji mu Baibolo
3. Tambwilainga Bukwasho ku Bakwenu
Mwendela ntanda aye Edward John Eyre waendejile Musanza wa Nullarbor wajinga mwine munkonkoso. Bena ntanda bafunjishe Eyre bya kutana mema mu tubandaulu ne ku bichi bya kalafulu. Kutambwila bukwasho ku bantu bayukile ntanda bulongo kwamupulwishe Eyre.
KINO kya kumwenako kyamwesha’mba kimye kyonse kyo mukeba kuba kintu kyakatazha pakebwa bukwasho kufuma ku bakwenu bayuka bulongo kyokyo kintu. Kyo kimotu ne pa kutatula mutanchi wa kutanga Baibolo.
Yesu kechi waketekejile baana banji ba bwanga kumvwa biji mu Baibolo kwakubula bukwasho kufuma ku bakwabo ne. Kimye kimo ‘aye wibashinkwile michima yabo ya maana’mba, bomvwishe binembelo.’ (Luka 24:45) Yesu wayukile amba bantu batanga Baibolo bafwainwa bukwasho pa kuba’mba bomvwe mafunjisho a mu Binembelo.
Bañanyi Bakwashañana?
Yesu wapele uno mwingilo wa kukwashañana baana banji ba bwanga. Yesu saka akyangye kuya mwiulu wakambizhe’mba: ‘Onkao mambo yainga na kwibasambisha ba mu mikoka yonse ya bantu baluke ke baana ba bwanga, ... ne kwibafunjisha balamenga byonse byo nemukambizhe.’ (Mateo 28:19, 20) Mwingilo mukatampe wa kufunjisha uji na bena Kilishitu wavwangamo kulumbulula bya kwingijisha mafunde a mu Baibolo mu bwikalo. Bena Kilishitu bakine bakwasha bakwabo kumvwa biji mu Baibolo.
Panyumatu ya kuba Yesu wapana uno mwingilo ku baana banji ba bwanga, kwamwekele kintu kyawama. Baibolo witubula pa mwina Etiopya kalama wa kishinka watangilenga kibaba kya mu bungauzhi bwa kwa Isaya. Wakabwilepo bwishi kimye kyo atangilenga kino kibaba. Kwesakana na byo kyanembwa mu Baibolo, byepelo byo akankelwe kumvwa ke bya kuba’mba: “Bamutwajile no mukoko ye basaka kwipaya; Kabiji byonka bizhindama mwana mukoko mu kyenyi kya bamutenda boya, Byonkabi ne aye kechi waasamine kanwa kanji amba ñambe ne: Mu kupelulwa kwanji bafumya kuchibilwa nsambu yanji: Kabiji ñanyi ukamba mambo a kisaka kyanji? Mambo mweo wanji bamufumyapo panopantanda.”—Byubilo 8:32, 33; Isaya 53:7, 8.
Kalama waipwizhe mwina Kilishitu aye Filipa wayukile bulongo Binembelo amba: ‘Ngauzhi wa Lesa pa kwamba bino wanena ñanyi? Aye mwine nyi, inyi mukwabo?’ (Byubilo 8:34) Mwina Etiopya wa kishinka wayile ku Yelusalema na kupwila, kabiji kampe walombele ne bukwasho. Kya kine kuba’mba watangilenga na muchima umo wa kukeba kuyuka. Bino uno kalama wakankelwe kumvwa kino kibaba. Na kwipelula waambijile Filipa kumukwasha. Byalondolwele Filipa byasangajikile uno muntu ne kumulengela kwikala mwina Kilishitu.—Byubilo 8:35-39.
Bakamonyi ba kwa Yehoba batwajijila na kwingila mwingilo waingijilepo Filipa ne bena Kilishitu bakwabo batanshi. Mu byalo kukila 235, Bakamonyi babena kukwasha bakwabo kumvwa bifunjisha Baibolo. Boba bino kupichila mu kufunjisha mitwe yaimena pa Binembelo. Jino jishinda ja kufunjishishamo Baibolo javwangamo kwisamba pa Baibolo byo aamba pa mutwe nangwa kibaba.a—Monai kakitenguluzha ka kuba’mba “Mikumbu Yawama ya Mepuzho a mu Baibolo.”
“Mepuzho ami Onse Akumbwilwe”
Ba Steven, Valvanera ne Jo-Anne batongolwa mu mutwe mutanshi, batatwile kufunda Baibolo na Bakamonyi ba kwa Yehoba. Steven waamba’mba: “Nakuminye bingi, kwesakanyatu binembelo nangwa mashimikila javula kwandengejilenga kutana mikumbu mu Baibolo. Saka nkyangye kutendeka kufunda Baibolo kafwako muntu mukwabo wankwashishe kuba bino ne. Naumvwine bingi bulongo pa kuyuka’mba Baibolo uji na mikumbu yawama ku mepuzho onse, kabiji kechi wikasa ne kwikasulula ne.”
Valvanera waitabizha’mba: “Byonse byo nafunjile ku Bakamonyi bishinka. Nafunjile amba kechi nafwainwa kwitabila mu bintu mambotu bebyamba ku kipwilo ne, bino mambo a kuba bebilondolola bulongo.” Jo-Anne washimikizha’mba: “Kukumbulwa kwa mepuzho ami onse mu Baibolo kwandengejile kwikala na moyo wa kwakamwa ne kunemeka mwine Nembi mambo wamunembele kukumbula mepuzho a bantu bonse.”
Nanchi mwayukapo Kamonyi wa kwa Yehoba nyi? Nga mambo ka akubujila kumwipuzha kwimumwesha luno lufunjisho byo lwikala? Umvwe kechi mwayukapo Kamonyi wa kwa Yehoba ne, mwane nembai kwingijishapo keyala umo pa makeyala aji pa peja 4 mu uno magazini. Kwikala na mupashi wazhila, kutanga na muchima umo ne bukwasho kufuma ku mufunjishi wa Baibolo, bikemukwasha kumvwa Mambo a Lesa. Mwakonsha kumvwa biji mu Baibolo!
[Tubyambo twa mushi]
a Buku wakwasha bantu bavula wa kufundamo pa mitwe yaimena pa Binembelo ke buku wanembwa na Bakamonyi ba kwa Yehoba wa kuba’mba Nanchi Baibolo Kine Ufunjisha’mba Ka?
[Kitenguluzha/Kipikichala pa peja 7]
Mikumbu Yawama ya Mepuzho a mu Baibolo
Mitwe imo ifunjisha Bakamonyi ba kwa Yehoba mu lufunjisho lwa Baibolo:
• Lesa wakebelenga’mba panopantanda pekale byepi?
• Bafu baji pi?
• Nanchi tuji mu ‘moba apelako’ nyi?
• Mambo ka Lesa o aswishisha buyanji?
• Nakonsha kulengela byepi kisemi kyami kusangalala?