Nanchi Mwakonsha Kumvwa Biji mu Baibolo Nyi?

“Mu kisemi kyetu twatanganga Baibolo pa Mulungu. Kechi kwandetelanga lusekelo ne. Naitabijile kuba’mba Baibolo Mambo a Lesa, bino byo natanganga kechi ne byumvwanga ne.”—Steven wikala mu Britain.

“Byo najinga na myaka 17, naesekele kutanga Baibolo. Nekilekele mambo kechi naumvwanga byo natanganga ne.”—Valvanera wikala mu Spain.

“Natangilepo Baibolo yense jimo mambo nayukile’mba byo nji Katolika nafwainwa kumutanga. Napwishishe myaka isatu na kutanga. Bino nakabwilepotu bwishi.”—Jo-Anne wikala mu Australia.

BAIBOLO ke buku wayukanyikwa bingi mwaya ntanda. Bamupota bingi kukukila mabuku akwabo, bantu bavula baji nanji. Uji mu milaka yavula kabiji uji pa matepu, maselechi a CD ne DVD. Bino bavula baji nanji bakankalwa kumvwa bijimo. Nanchi ne anweba byo byo kiji nyi?

Nanchi Lesa Ukeba Amba Tumvwe Mambo Anji Nyi?

Baibolo waamba’mba: “Binembelo byonse byanembeshiwa kwi Lesa.” (2 Timoti 3:16) Ee, Yehoba Lesa ye mwine nembi wa Baibolo. Nanchi ukeba’mba tumvwe mambo anji nyi? Nangwa wamunembele amba bantu bachechetu nabiji bantangi babupopweshi ne bashayuka ba Baibolo bo bonka bakonsha kumvwa bijimo nyi?

Tangai bino byepelo bya mu Baibolo byalondelapo:

“Uno mukambizho ye mbenakwimukambizha ja lelo kechi wakosa kukila pa bulume bwenu ne, kabiji kechi uji kwalepa ne.”—Mpitulukilo ya mu mizhilo 30:11.

‘Byambo byenu pa kwibilumbulula bileta kyeya; Bipana ne maana ku babulwao.’—Salamo 119:130.

‘Mu kyonkakya kimye Yesu wasekelele mu mupashi wazhila, amba, Tata, Mwine wa mwiulu ne panshi, nemupopwela byo mwafile bino ku bajimuka ne ba maana, kabiji mwibisolola ku twana twa lukeke.’—Luka 10:21.

Nembi wa Baibolo ukebesha atweba kumvwa Byambo byanji. Nangwa byonkabyo bantu bavula bakishinka kibakatazha bingi kumvwa biji mu Baibolo. Ki ka kyakonsha kwimukwasha? Mutwe walondelapo waamba pa mashinda asatu akonsha kwimukwasha kumvwa biji mu Baibolo.