Byo Mwakonsha Kumvwa Biji mu Baibolo
1. Lombai Lesa Kwimukwasha
Ninfa wikala mu Italy washimikizha’mba: “Kwajingapo kimye kimo kyo natanganga Baibolo saka nkyangye kulaala. Na ubanga bino mambo nayukile’mba Mambo a Lesa kabiji nangwa kya kuba kwiatanga kechi kwandetelanga lusekelo ne, nakebelenga kuyuka Lesa byo anemba mu Baibolo. Nakebeshe bingi kumutanga yense. Patanshi kyapelele bingi, bino byo nataine mashimikila akatazha kumvwa nekilekele.”
NANCHI mumvwa nobe Ninfa nyi? Bantu bavula bakonsha kumvwa byobyo. Bino byonka byo twakutanga mu mutwe wafumako, nembi wa Baibolo aye Yehoba Lesa ukeba atweba kumvwa Byambo byanji. Pano mwakonsha kumvwa byepi bijimo? Jishinda jitanshi ke kulomba Lesa kwimukwasha.
Batumwa ba kwa Yesu bebamonanga amba “kechi bafunjile ne, bantutu” mambo kechi bafunjilepo bya bupopweshi ku masukulu a Bayudea ne. (Byubilo 4:13) Bino Yesu wibambijile’mba bakonsheshe kumvwa Mambo a Lesa. Mu ñanyi jishinda? Yesu walumbululwile’mba: “Pakuba Nkwasho, ye mupashi wazhila, ye bakatuma Batata mu jizhina jami, aye ukemufunjisha bintu byonsetu.” (Yoano 14:26) Lesa waingijishe uno mupashi wazhila, nangwa’mba bulume, kimye kyo alengele ntanda ne bintu bipema bijipo. (Ntendekelo 1:2) Ye ye aingijishe ne ku banembi 40 kunemba byambo byanji biji mu Baibolo. (2 Petelo 1:20, 21) Kyo kimotu ne lelo jino mupashi ukwasha boba bakeba kumvwa biji mu Baibolo.
Mwakonsha kutambula byepi mupashi wazhila wa Lesa? Mwafwainwa kulomba na lwitabilo. Kabiji mwafwainwa kulombanga kimye kyonse. Yesu waambile’mba: “Lombainga, kikemupewa.” ‘Umvwe anweba ... mwayuka kupana byawama ku baana benu, nanchi aye Shenu wa mwiulu kechi emukile kupana mupashi wazhila ku bamulomba nenyi?’ (Luka 11:9, 13) Yehoba upana mupashi wanji wazhila ku boba bamulomba na muchima yense. Buno bulume bwakonsha kwimukwasha kumvwa mwatala byambo byanembelwe mu Baibolo myaka ya kala. Mupashi wa Lesa wakonsha ne kwimupa maana akwingijisha byambo biji mu Baibolo mu bwikalo bwenu.—Bahebelu 4:12; Yakoba 1:5, 6.
Kimye kyonse kyo mukeba kutanga Baibolo, mulombenga kwi Lesa mupashi wazhila kwimukwasha kumvwa Mambo anji.