Endainga mu Mupashi ne Kwikala Monka Mwayila Kwipana Kwenu

‘Endai mu mupashi, abyo kechi mukoba bya lwiso lwa buntunshi ne.’—NGA. 5:16.

1. Lubatizhilo lunga lwaubiwe pa juba ja pentekosta?

BAANA ba bwanga ba kwa Yesu baambilenga mu njimi pa juba ja Pentekosta mu 33 C.E., panyuma ya kubatizwa na mupashi wazhila. Bamwesheshe kya bupe kya kukumya kya mupashi. (1 Ko. 12:4-10) Ki ka kyafumine mu kino kya bupe kabiji ne mu jashi jaambile mutumwa Petelo? Bavula “michima ibapile munda.” Panyuma ya kwibakambizha kwi Petelo, balapijile kabiji ne kubatizwa. Jishimikila jaamba’mba: “Abo batambwile mambo anji babatizhilwe: kabiji mu jonkaja juba babikilweko kwi abo kampe biumbi bisatu.” (Byu. 2:22, 36-41) Byonka Yesu byo akambizhe, babatizwe mu mema mu jizhina ja Tata ne ja Mwana ne ja mupashi wazhila.—Mat. 28:19.

2, 3. (a) Lumbululai lupusano luji pakachi ka kubatizwa na mupashi wazhila ne kubatizwa mu jizhina ja mupashi wazhila. (b) Mambo ka lubatizhilo lwa mu mema o lukebewa ku aba bakeba kwikala bena Kilishitu bakine lelo jino?

² Nangwa byonkabyo, nanchi pajipo lupusano pakachi ka kubatizwa na mupashi wazhila ne kubatizwa mu jizhina ja mupashi wazhila nyi? Ee po luji. Aba babatizwa na mupashi wazhila basemwa jibiji kwikala baana ba ku mupashi ba Lesa. (Yoa. 3:3) Bashingwa kuba’mba bakekale bamfumu mu kimye kya kulutwe kabiji bañanga mu Bufumu bwa Lesa bwa mwiulu, kabiji baji ku lubaji lwa mubiji wa ku mupashi wa Kilishitu. (1 Ko. 12:13; Nga. 3:27; Lum. 20:6) Onkao mambo, luno lubatizhilo lwa kubatizwa na mupashi wazhila, Yehoba ye wilubile pa juba ja Pentekosta kuya ne kulutwe kimye kyo asajile bantu bamo bakukalamina pamo na Kilishitu. (Loma 8:15-17) Pano kiji byepi na lubatizhilo lwa mu mema lwa mu jizhina ja mupashi wazhila lubiwa kimye kyonse pa kubuñana ne pa kushonkena kwa bantu ba Yehoba mu moba etu?

³ Bena Kilishitu bakine babatizwa mu mema kumwesha kwipana kwabo kwi Yehoba kufuma panshi ya muchima. Kyo kimotu ne ku aba bo baita kuya mwiulu. Kabiji lubatizhilo lwa mu mema nalo lwanema bingi ku banabalume ne banabakazhi bavula ba mu ano moba baji na luketekelo lwa kukekala myaka ne myaka panopantanda. Kikale luketekelo lwetu lwa panopantanda nangwa lwa mwiulu, kubatizwa mu mema mu jizhina ja Tata ne ja Mwana ne ja mupashi wazhila ke kintu kyanema kyafwainwa kuba muntu pa kuba’mba etabilwe kwi Lesa. Onkao mambo, bena Kilishitu bonse babatizwa bafwainwa ‘kwendanga mu mupashi.’ (Tangai Ngalatiya 5:16.) Nanchi mubena kwenda mu mupashi ne kwikela monka mwayila kwipana kwenu nyi?

Byo Kilumbulula ‘Kwenda mu Mupashi’

4. ‘Kwenda mu mupashi’ kulumbulula ka?

⁴ ‘Kwenda mu mupashi’ kulumbulula kuswa ñingijilo ya mupashi wazhila pe anweba, ne kumwitabizha kwimutangijila mu bwikalo bwenu. Mu jishinda jikwabo, kilumbulula kutangijilwa na mupashi wazhila mu mingilo yenu yonse ya pa juba pa juba. Ngalatiya kitango 5 walumbulula lupusano luji pakachi ka kutangijilwa na mupashi wazhila ne kutangijilwa na milanguluko ya buntunshi.—Tangai Ngalatiya 5:17, 18.

5. Kutangijilwa na mupashi wazhila kulumbulula kuvundamina ku ñanyi mingilo?

⁵ Umvwe mutangijilwa na mupashi wazhila, mingilo ya buntunshi kechi mukeba kwiyuba ne. Ino mingilo ya buntunshi yavwangamo, “bulalelale, ne bubipisho, ne bya bunya, ne kupopwela bankishi, ne bya buñanga bwa lubuko, ne mafika, ne lutobo, ne bichima, ne bukaji, ne bya bongozhi, ne maabano, ne mepatulo, ne bikonkoma, ne kupendwa, ne kusangalala kubi.” (Nga. 5:19-21) Mu jino jishinda ko kuba’mba ‘mubena kwipaya na mupashi byubilo bya mubiji.’ (Loma 8:5, 13) Mu kifulo kya kulangulukanga pa bya buntunshi, mupashi wazhila ukemukwasha kulangulukanga pa bintu bya mupashi kabiji ne kumvwina byo abena kwimubula.

6. Lumbululai kintu kikebewa pa kuba’mba tumweshe kipangwa kya mupashi.

⁶ Umvwe mupashi wazhila keengile pe anweba, mumwesha byubilo bitokesha Lesa pa muchima, ‘kipangwa kya mupashi.’ (Nga. 5:22, 23) Pano bino, mwayuka’mba kino kikebewa kwibikako. Kyakumwenako: Njimi wajima bujimi. Nangwa byonkabyo, mute ne mema byanema bingi mambo kwa kubula bino bintu, uno njimi kechi wakonsha kunowa kajo ne. Twakonsha kwesakanya mupashi wazhila ku mute. Mupashi wazhila ukebewa bingi pa kuba’mba tumweshe kipangwa kya mupashi. Pano bino, ki ka kyakonsha kufumamo umvwe njimi wabula kwingila na ngovu? (Mana. 10:4) Ee, njimino yo mujiminamo mushiji wa mu muchima wenu yo yakonsha kwimulengela kwikala na kipangwa kyawama kya mupashi wazhila mwi anweba. Onkao mambo, ishikishai anwe bene amba, ‘Nanchi mbena kuswisha mupashi wazhila kupanga kipangwa kyanji kupichila mu kwingijila pamo naye nyi?’

7. Mambo ka kutanga ne kulanguluka langulukapo o kwanemena umvwe mukeba kwikala na kipangwa kya mupashi?

⁷ Pa kuba’mba banjimi banowe kajo kavula, bafwainwa kwikatekezha. Pa kuba’mba mwikale na kipangwa kya mupashi, mwafwainwa kwikala na mema a bukine atanwa mu Baibolo kabiji ne kupichila mu kipwilo kya bena Kilishitu kijiko lelo jino. (Isa. 55:1) Kyamweka mwalumbulwilapo kala bantu bavula kuba’mba, Binembelo Byazhila byanembelwe na lutangijilo lwa mupashi wazhila. (2 Timo. 3:16) Jibumba ja kalume wakishinka kabiji wa maana jilumbulula bulongo mema atokatu to a bukine bwa mu Baibolo. (Mat. 24:45-47) Ndumbulwilo ya kino yaumvwanyika. Pa kuba’mba tutangijilwenga na mupashi wazhila, twafwainwa kutanganga ne kulanguluka languluka pa Mambo a Lesa. Umvwe mubena kuba bino ko kuba’mba mubena kulondela kyakumwenako kyawama kya bangauzhi abo ‘bakebeshe ne kupalanguzha bingi’ byambo byapainwe. Kabiji kisangajika bingi kuyuka’mba ne bamalaika nabo bakebesha bingi kuyukisha bukine bwa ku mupashi pa mambo a Lukunwa walailwe kabiji ne kipwilo kya bena Kilishitu bashingwa.—Tangai 1 Petelo 1:10-12.

Tutangijilwa Byepi na Mupashi?

8. Mambo ka o kyanemena anweba kulomba Yehoba kwimupa mupashi wanji?

⁸ Kechi kutangatu Binembelo ne kulanguluka langulukapotu ne. Mwafwainwa kutwajijila na kulomba Yehoba kwimukwasha ne kwimutangijila. Aye “wakonsha kuba byakijishatu bingi byonse byo tulomba nangwa byo tulanguluka.” (Efi. 3:20; Luka 11:13) Pano mwakonsha kukumbula byepi umvwe kya kuba muntu wimushikisha amba, “Nga mambo ka o nafwainwa kulombela kwi Lesa umvwe kya kuba aye wayukila jimo ‘byo twakajilwa po tukyangye kumulomba’?” (Mat. 6:8) Umvwe ke mulombe mupashi wazhila, mumwesha’mba mwakinka manungo mwi Yehoba. Kyakumwenako, umvwe muntu umo waiya ko muji na kulomba bukwasho, mwakonsha kwingila papela bulume bwenu kumukwasha, mambo awo muntu waji kwiya’mba mu mukwashe kumwesha’mba wimuketekela. (Esakanyaiko Byambo bya Mana 3:27.) Byonkabyo, ne Yehoba naye umvwa bingi bulongo kumulomba mupashi wanji, kabiji ukemupa.—Mana. 15:8.

9. Nga kutanwa ku kupwila kwa bwina Kilishitu kwakonsha kwimukwasha byepi kutangijilwa na mupashi wa Lesa?

⁹ Kabiji jishinda jikwabo ja kutangijilwamo na mupashi wa Lesa javwangamo kupwila kwa kipwilo, kubuñana kabiji ne kushonkena. Kyanema bingi kwibikako kutanwako kabiji ne kutelekesha ku majashi. Kuba bino kwimukwasha kumvwisha “bine byazhika bya Lesa.” (1 Ko. 2:10) Kabiji mu kukumbulapo jonse mufuma bintu byawama. Akilangulukai pa kupwila ko mwatainweko milungu ina yapita. Mwasuntwile kuboko kwenu jinga kuba’mba mwambe byambo bya lwitabilo lwenu? Nanchi mwakonsha kuwamishako mu luno lubaji nyi? Umvwe kechi mukumbulapo ne, monai byo mwakonsha kubapo mu milungu ibena kwiya. Yehoba ukamona muchima wenu wa kukeba kukumbulapo kabiji ukemupa mupashi wanji wazhila, awo ukemukwasha ne kumwenamo pakatampe mu kupwila.

10. Kwenda mu mupashi kwavwangamo kwita bakwetu ku ñanyi lwito?

¹⁰ Kwenda mu mupashi kwavwangamo ne kumvwina lwito luji mu Lumwekesho 22:17 lwa kuba’mba: ‘Ne aye mupashi ne aye musongwa amba, Iyai. Ne aye waumvwa naye, ambe’mba, Iyai. Ne aye waumvwa kilaka, naye eye: ne aye wasaka naye atambule mema a bumi a bupetu.’ Mupashi ubena kutangijila jibumba ja musongwa ja bashingwa, ubena kupana luno lwito lwa kutambula mema a bumi. Umvwe mwaswa lwito lwa kuba’mba “iyai,” nanchi ne anweba mwasakisha kwita amba “Iyai” nyi? Ke jishuko jikatampe bingi kwingilako uno mwingilo wa kupulusha bantu!

11, 12. Nga mupashi wazhila wavwangiwamo byepi mu mwingilo wa kusapwila?

¹¹ Uno mwingilo wanema ubena kwingijilwa na lutangijilo lwa mupashi wazhila. Tutanga mupashi wazhila byo aingijile mu myaka kitota kitanshi mu kushinkwila bamishonale manyaunda akwabo. Mutumwa Paulo ne balunda nanji “bebakainye ku mupashi wazhila kusapwila mambo mu kyalo kya Asha”; ne mu Bitinya namo kechi wibaswishishe kutwelamo ne. Kechi twayukisha bulongo mupashi byo ebakainye kubula kuya ku oa mapunzha ne, pano bino mupashi watangijile Paulo kuya mu nyaunda ikatampe ya Europe. Wamwene kimwesho kya mwanamulume mwina Makedonya saka amusashijila’mba ebakwashe.—Byu. 16:6-10.

¹² Lelo jino, mupashi wa Yehoba ubena kutangijila mwingilo wa kusapwila ntanda yonse. Kechi kuji bimwesho bya kukumya bya kutangijila uno mwingilo ne, bino Yehoba ubena kutangijila na mupashi bena Kilishitu bashingwa. Kabiji mupashi utundaika balongo ne banyenga kusapwila ne kufunjisha papela bulume bwabo. Kwakubula nangwa kuzhinaukatu ne, mwatendekele kala kwingilako uno mwingilo wanema. Nanchi mwakonsha kubayishako lusekelo lwenu mu uno mwingilo wawama byonkabye nyi?

13. Mwakonsha kunekenena byepi lutangijilo lwa mupashi wazhila? Ambai kyakumwenako.

¹³ Mwakonsha kunekenena lutangijilo lwa mupashi wazhila kupichila mu kwingijisha byambo byo banengezhezha bantu ba Lesa. Twayai twisambe pe Mihoko wa mu kyalo kya Japan. Byo atendekeletu bupainiya, wiumvwine kubula kufikilamo kubwelako ku bantu bo esambile nabo; walangulukilenga’mba kechi wayuka bya kwamba bya kulengela mwina nzubo kutako muchima ne. Pa kyonkakya kimye, kwajinga mashinda awama anembelwe mu Mwingilo Wetu wa Bufumu a bya kwamba pa kubwelako. Kepo buloshuwa wa kuba’mba A Satisfying Life—How to Attain It (Byo Mwakonsha Kutana Bwikalo bwa Lusekelo) walupwilwe. Uno buloshuwa wajinga wafwainwa bingi bena Japan. Mihoko waingijishe mashinda a bya kwingijisha uno buloshuwa kikatakata bya kwamba pa kubwelako. Ne kimyetu ne, watendekele kufunjisha bantu bakananga kala. Waambile’mba, “Najinga na bantu bavula bakufunjisha—bafikile ne ku 12—kya kuba bamo bapembelelangatu!” Ee kine, umvwe saka mwenda mu mupashi ne kwingijisha mikambizho yo bapa bantu ba Yehoba, mukanowa byavula.

Ketekelai Mupashi wa Lesa

14, 15. (a) Nga bantu bambulwakulumbuluka bakonsha kwikela byepi mwayila kwipana kwabo? (b) Mwakonsha kutana byepi balunda bawama?

¹⁴ Byo muji bamwingilo batongolwa, muji na mwingilo wa kwingila. (Loma 10:14) Mwakonsha kwiumvwa’mba kechi mwafikilamo kwingila uno mwingilo ne. Byonka byo kiji ku bashingwa, Lesa ye witufunjisha bya kwingila. (Tangai 2 Kolinda 3:5.) Mwakonsha kwikela mwayila kwipana kwenu kupichila mu kwibikako ne kuketekela mupashi wa Lesa.

¹⁵ Kwambatu kine, kechi kyapela atweba bambulwakulumbuluka kwikela mwayila kwipana kwetu kwi Lesa wetu walumbuluka, aye Yehoba ne. Lukatazho lumo ke lwa kuba’mba bakwenu bamo mo mwakayilanga bakonsha kukumya pa kumona bwikalo bwenu byo bwaaluka kabiji bakonsha ne ‘kwimunena bibi.’ (1 Pe. 4:4) Pano bino, yukai’mba muji na balunda bakatataka, kikatakata Yehoba ne Yesu Kilishitu. (Tangai Yakoba 2:21-23.) Kabiji kyanema bingi kuyuka balongo ne banyenga mu kipwilo kyo mujimo, mambo baji lubaji lwa “balongo” mwaya ntanda yonse. (1 Pe. 2:17; Mana. 17:17) Kupichila mu mupashi wanji, Yehoba ukemukwasha kutana balunda bakemukwasha kwikala na byubilo byawama.

16. Mambo ka o mwafwainwa ‘kusekela mu kunekena’ byonka byajinga Paulo?

¹⁶ Nangwa kya kuba mwatana balunda bawama mu kipwilo, kechi kilumbulula’mba pano kisakwimupelelanga kupwisha makatazho a pa juba pa juba ne. Umvwe makatazho avujisha kimye kimo akonsha kwimukokesha bingi. Kino kyo kimye kikatakata kyo mwafwainwa kulomba Yehoba kuba’mba emupe mupashi wanji wazhila. Mutumwa Paulo wanembele’mba: “Byo nji wanekena, byo byo nji ke wakosa.” (Tangai 2 Kolinda 4:7-10; 12:10.) Paulo wayukile’mba mupashi wa Lesa wakonsha kulengela muntu kwikala na bulume kechi na mambo a byo aji ne. Onkao mambo, ngovu ya Lesa ingila yakonsha kwimukosesha umvwe kemwiumvwe kukoka nangwa kemukebe bukwasho. Paulo wanembele’mba “nsekela mu kunekena.” Kimye kyo eumvwine kukoka popo amwene’mba mupashi wazhila wajinga pe aye. Ne anweba mwakonsha kwiumvwa byonkabye!—Loma 15:13.

17. Mupashi wazhila wakonsha kwimukwasha byepi kufika ko mubena kuya?

¹⁷ Tukebewa mupashi wa Lesa kuba’mba twikalenga monka mwayila kwipana kwetu kwi aye. Fwanyikizhai’mba yenu kaputenyi wa bwato bwenda na kisapi. Kikonkwanyi kyenu ke kya kwingijila Yehoba myaka ne myaka. Mupashi wazhila uji nobe mwela ye mubaka pa kuba’mba mufike mutende ko mubena kuya. Kechi mukeba kulelaulwa na mupashi wa Satana wa panopantanda ne. (1 Ko. 2:12) Mwafwainwa kuyuka mwela wawama ne kumubaka. Awo mwela, ye mupashi wazhila. Kupichila mu Mambo a Lesa ne jibumba janji jitangijilwa na mupashi, mupashi wazhila ukemutangijilanga mu jishinda jafwainwa.

18. Mwafuukulapo kuba ka luno, kabiji mambo ka?

¹⁸ Umvwe mubena kufunda na Bakamonyi ba kwa Yehoba, ne kupwanañena pamo nabo ku mupashi, pano bino mukyangye kwipana ne kubatizwa, ishikishai anwe bene’mba, ‘Mambo ka o mbena kuzhinyazhinya?’ Umvwe mwayuka mwingilo wa mupashi wazhila mu kwingila kyaswa muchima wa Yehoba lelo jino, kabiji ne kumvwisha ñingijilo yanji, ubaipo bintu bibena kumwesha’mba byo mwafunda bya kine. Yehoba ukemupesha pakatampe. Ukemupa mupashi wanji wazhila. Umvwe mwabatizwe kala, kwakubula nangwa kuzhinaukatu ne, mwimwena mupashi wazhila byo emukwasha. Mwimwena ne kwiumvwina Lesa byo emukosesha na mupashi wanji. Ukatwajijila na kwimukwasha—myaka ne myaka. Onkao mambo, fuukulaipo kutwajijila kwendanga mu mupashi wazhila.

Mukivuluka Nyi?

•Nga ‘kwenda mu mupashi’ kulumbulula ka?

•Ki ka kikemukwasha ‘kwenda mu mupashi’?

•Mwakonsha kwikela byepi mwayila kwipana kwenu?

[Kipikichala pa peja 15]

Kikebewa kwibikako pa kujima mushiji wa mu muchima wenu

[Bipikichala pa peja 16, 17]

Nanchi mutangijilwa na mupashi wa Lesa nyi?