Mupashi Wazhila ye mu Ka?

YESU waipwizhe baana banji ba bwanga amba: “Ñanyi mukwenu uji na mwana, uba, kana mwananji wamulomba shinkwa, wamupa jibwe? Nangwa walomba jisabi, wamupa mulolo? Nangwa walomba jike, wamupa kaminye?” (Luka 11:11, 12) Baana baikalanga mu muzhi wa Ngalilea batemwe bingi kuja make ne masabi, onkao mambo, bayukanga kajo ko bakebanga.

Yesu waambile’mba twafwainwa kulombanga mupashi wazhila kwakubula kuleka byonka mwana wafwa nzala byo alomba kajo. (Luka 11:9, 13) Kuyuka bulongo biji mupashi wazhila kuketukwasha kuyuka buneme bwakwikala naye mu bwikalo bwetu. Onkao mambo twayai tumone bitufunjisha Baibolo pa mupashi wazhila.

“Bulume bwa Mwine Wakila”

Binembelo byamweshatu patoka kuba’mba mupashi wazhila ke bulume bwa Lesa bo engijisha pa kuba kyaswa muchima wanji. Kimye malaika Ngabaliela kyo abujilenga Maliya amba ukekala na mwana wa mulume nangwa kya kuba wajinga kamwale wabujile kusambakanapo na mwanamulume, wamwambijile amba: “Mupashi Wazhila ukeya pe obewa, ne bulume bwa Mwine Wakila bukakunyeñamina: onkao mambo awa mwana ukasemekwa ukatelwa’mba wazhila, Mwana Lesa.” (Luka 1:35) Kwesakana na byaambile Ngabaliela, mupashi wazhila ne “bulume bwa Mwine Wakila” byendela pamo.

Kuno kwipasha kutanwa pavula mu Baibolo. Ngauzhi Mika waambile’mba: “Amiwa bangyuzha bulume ku mupashi wa Yehoba.” (Mika 3:8) Yesu walayile baana banji ba bwanga amba: “Anweba mukatambula bulume, byo akemwikijila mupashi wazhila.” (Byubilo 1:8) Mutumwa Paulo naye waambilepo pa “bulume bwa mupashi wazhila.”—Loma 15:13, 19.

Pano twakonsha kulumbulwila mwepi kino? Mupashi wazhila ne bulume bwa Lesa byendela pamo. Mupashi wazhila bo bulume bwingijisha Yehoba. Mu ñambilo ikwabo, mupashi wazhila ke bulume bwa Lesa. Kabiji buno bulume bukatampe bingi! Kechi twakonsha kuyuka bulume bo aingijishe mu kulengwa konse ne. Kupichila mwi ngauzhi Isaya Yehoba waambile’mba tulanguluke pa bino: “Inukai, mutale kuno kwiulu, mumone. Ñanyi walengele bino? yenkaye wibisolola bya mwiulu byonse, saka ebibala ne kwibitela byonse pa mazhina; na mambo a bukata bwa ngovu yanji, ne na mambo a kukosa kwa bulume bwanji, kafwako nangwa kamo kabulwako ne.”—Isaya 40:26.

Baibolo umwesha’mba bilengwa byonse byalengelwe na “bukata bwa ngovu,” ko kuba’mba bulume bwa Lesa wa Bulume bonse. Kyamwekeshatu patoka kuba’mba bulume bwa Lesa bukatampe, kabiji bo bwitulengela kwikala bomi.—Monai kakitenguluzha ka kuba’mba “Bulume bwa Mupashi Wazhila.”

Yehoba wakonsha kwingijisha mupashi wanji wazhila mu jishinda jikatampe, byonka byo aubile pa kulenga bilengwa byonse. Bino wakonsha ne kumwingijisha ku bantu banji. Baibolo waambapo pa bulume bwa Lesa byo bwakwashishe bantu banji panopantanda.

“Mupashi wa [Yehoba] Uji pe Amiwa”

Mwingilo wa kwa Yesu witumwesha mupashi wazhila byo akonsha kukwasha bantu banji. Yesu wabujile bantu mu muzhi wa Nazala amba: “Mupashi wa [Yehoba] uji pe amiwa.” (Luka 4:18) “Bulume bwa mupashi” bwalengejile Yesu kuba ka? (Luka 4:14) Wabukilenga bantu bikola byapusana pusana, wazhindamikile lubesha pa kalunga, wajishishe bantu bavula bashinkwa ne masabi achechetu, kabiji wasangwile ne bafu. Mutumwa Petelo waambilepo pe Yesu amba “muntu waitabilwe kwi Lesa ... mu mingilo ya bulume ne mu bya kukumya ne mu biyukilo, byo aubile Lesa mwi aye.”—Byubilo 2:22.

Mupashi wazhila luno kechi ubena kwingila mu bantu kya kuba ke bobe byakukumya byonka byo kyajinga kala ne. Nangwa byonkabyo wakonsha kwimukwasha pakatampe bingi. Yehoba upana mupashi wanji wazhila ku bapopweshi banji, byonka Yesu byo alaile baana banji ba bwanga. (Luka 11:13) Kyo kyalengejile ne mutumwa Paulo kwaamba’mba “Nakonsha kuba byonse mwi aye unkosesha.” (Filipai 4:13) Nanchi mupashi wazhila wakonsha kwimukwasha mu jino jishinda nyi? Mutwe walondelapo wakumbula buno bwipuzho.

[Box/ Picture on page 5]

Ene Mambo Mupashi Wazhila kyo Abujila Kwikela Muntu

Baibolo wesakanya mupashi wazhila ku mema. Lesa byo alaile bantu banji mapesho waambile’mba: ‘Amiwa nketulwila mema pa ntanda yauba mitanta, to tukola twa mema pa mushiji wauma; nketulwila mupashi wami pa ba mu bisemi byenu, ne bibusa byami pa baana benu.’—Isaya 44:3.

Lesa umvwe waitulwila mupashi wanji pa bantu banji, ‘bayula na mupashi wazhila.’ Yesu, Yoano Mubatishi, Petelo, Paulo, Banabasa, ne baana ba bwanga bakwabo bakonkene pamo pa juba ja Pentekosta mu 33 C.E. Bano bonse bebambapo’mba bayujile na mupashi wazhila.—Luka 1:15; 4:1; Byubilo 4:8; 9:17; 11:22, 24; 13:9.

Monai kino: Nanchi muntu bakonsha kumwitulwila pa bantu bavula nyi? Abya mwakonsha kwamba’mba muntu wakonsha kwitulwilwa pa jibumba jonse nyi? Kino kyakonsha kumwesha amba kechi tubena kulanguluka bulongo ne. Baibolo waambapo ne kuba’mba bantu bayujilwe na maana, nangwa’mba maana a kuyukisha, pano bino kechi waambapo kuba’mba muntu wayujilwe na muntu mukwabo ne.—Kulupuka 28:3; 1 Bamfumu 7:14; Luka 2:40; Kolose 1:9.

Kyambo kya Kingiliki kyatuntululwa’mba “mupashi wazhila” ke pneuʹma, kilumbulula ne kuba’mba bulume bubula kumweka. Kwesakana na buku umo kyambo kya pneuʹma “kilumbulula mwela ... ne muya; onkao mambo mupashi byonka biji mwela kechi umweka ne, kuba mwamukwata ne, kabiji ke bulume bukatampe.” (Vine’s Expository Dictionary of New Testament Words)

Kyamwekeshatu patoka kuba’mba mupashi wazhila kechi muntu ne.a

[Tubyambo twa mushi]

[Byambo bya Muntu Ungi]

Photodisc/SuperStock