Mambo ka Bantu o Bapusenamo pa Mambo a Mupashi Wazhila?

MUPASHI WAZHILA ye mu ka? Buno bwipuzho bwapela bingi pano bino kyakatazha bingi kutana mukumbu wapela. Mukulumpe wa Bakatolika Benedict XVI waambile ku luonde mu kyalo kya Australia amba: “Kyamweka twakankalwa kumvwisha biji mupashi wazhila.”

Bantu bakumbwila mwapusana pusana bwipuzho bwa kuba’mba: Mupashi wazhila ye mu ka? Bino byo bikumbula bantu bamo:

•Ke muntu wikala mukachi ka baana bwanga ba kwa Kilishitu.

•Maana a Lesa, ko kuba’mba bulume bwingijisha Lesa.

•Jishinda Lesa jo aikelamo panopantanda.

•Ke muntu wa busatu mu lufunjisho lwa Balesa Basatu.

Mambo ka bantu o bapusenamo? Kuno kupusenamo kwatatwile kala mu myaka kitota kya buna C E., kimye bashayuka ba bya bupopweshi kyo baambile’mba mupashi wazhila ke muntu waesakana na Lesa. Nangwa byonkabyo, luno kechi lwajinga lufunjisho lwa mu binembelo ne, kabiji nangwa baana ba bwanga ba kwa Kilishitu kechi byo byo bafunjishanga ne. Buku umo waamba’mba: “Lulayañano lwa kala kechi lwaambapo’mba mupashi wa Lesa muntu ne ... Mupashi wa Lesa ke bulume bwanji.” (New Catholic Encyclopedia) Kabiji uno buku wanungapo ne kuba’mba: “Binembelo byavula bya mu Lulayañano Lupya bilumbulula’mba mupashi wa Lesa ke kintu, kechi muntu ne, kino kimweka mu kwipasha kuji pakachi ka mupashi ne bulume bwa Lesa.”

Kyamwekeshatu patoka kuba’mba bantu kibakatazha bingi kufwanyikizha bulume kwikala muntu. Onkao mambo, kyatainwe mu kupesapesa kwajingako mu kyalo kya United States amba bantu bavula bakaine mulanguluko wa kuba’mba mupashi wazhila muntu nangwa’mba “kilengwa kyumi.” Nanchi byo ibyo nyi? Abya twafwainwa kwitabila mu byamba bashayuka ba bya bupopweshi amba “mupashi wazhila ke muntu wapusana na Shanji ne Mwana” nyi?

Twafwainwa kutana mwine mukumbu mu Baibolo, Mambo a Lesa mo alumbululwa bulongo mupashi wazhila. Mutumwa Paulo wanembele’mba: “Binembelo byonse byanembeshiwa kwi Lesa, kabiji byo byawamina mu kwibafunjisha bantu, ne mu kwibalengulula.”—2 Timoti 3:16.

Mambo ka o mwafwainwa kukebela kuyuka bulongo mupashi wazhila? Mambo kumuyuka bulongo kwakonsha kulengela Lesa kwimukwasha. Nanchi mumona amba kechi mwakonsha kuba bino nenyi? Yesu walayile baana banji ba bwanga amba: ‘Lombainga, kikemupewa ... Umvwe anweba ... mwayuka kupana byawama ku baana benu, nanchi aye Shenu wa mwiulu kechi emukile kupana mupashi wazhila ku bamulomba nenyi?’—Luka 11: 9, 13.

Mu mitwe yalondelapo tusa kumona binembelo byo byalumbulula biji mupashi wazhila. Kabiji tusakumona ne byo aikala bulume bwa kwitukwasha mu bwikalo bwetu.

[Mabulañano pa peja 3]

Binembelo bitulumbulwila bulongo mupashi wazhila byo aji