Bunonshi Bufuma kwi Lesa
NANCHI Lesa ukemupa bunonshi umvwe mwaikala ba kishinka nyi? Ee, bino kechi mutundu wa bunonshi bo mwaketekela ne. Akilangulukai pe Maliya inanji Yesu. Malaika Ngabaliela wamwekele kwi aye ne kumwambila’mba obewa “watokwa bingi” kwi Lesa kabiji ukasema Mwana Lesa. (Luka 1:28, 30-32) Bino kechi wajinga munonshi ne. Yesu byo asemenwe Maliya walambwile “tutela tubiji, nangwa twana twa nkunda tubiji,” twalambulanga bayanji kwi Yehoba mwayijile kisho.—Luka 2:24; Bena Levi 12:8.
Nanchi kishinka kya kuba’mba Maliya wajinga muyanji kilumbulula’mba kechi bamupesheshe kwi Lesa nenyi? Bamupesheshe mambo byo ayile na kupempula mulongo wanji Elisabeta, “Elisabeta wayujile na Mupashi Wazhila; ponkapo wabijikiletu, ne kwamba’mba, Obewa [Maliya] wakila mu kubilwa bibusa mu banabakazhi, ne kya munda yobe nakyo kyaubilwa bibusa.” (Luka 1:41, 42) Maliya waikajile inanja mwana Lesa yenkawa umo panopantanda.
Yesu naye wajinga muyanji. Kechi wasemenwetu ne kukomena mu buyanji ne, bino wajinga muyanji mu bwikalo bwanji bonse bwa panopantanda. Waambijile mwanamulume wakebelenga kwikala mwananji wa bwanga amba: “Balubwala baji na mimbwa, bañonyi nabo baji na bitoto; pakuba Mwana muntu wabulwa ne pa kushamina mutwe wanji.” (Luka 9:57, 58) Bino kwiya kwa kwa Yesu Kilishitu kwalengejile baana banji ba bwanga kwikala na bunonshi bukatampe. Mutumwa Paulo wanembele’mba: “Waalukile ke muyanji, amba, anweba monka mu buyanji bwanji mwaluke ke banonshi.” (2 Kolinda 8:9) Bunonshi bwa mutundu ka Yesu bo apele baana banji ba bwanga? Nga lelo jino kiji byepi?
Bunonshi bwa Mutundu Ka?
Bunonshi bwa ku mubiji javula bulengela kubula kwikala na lwitabilo, mambo munonshi wakonsha kuketekela mu mali mu kifulo kya Lesa. Yesu waambile’mba: “Kyakatazha bingi banonka byavula kutwela mu bufumu bwa Lesa!” (Mako 10:23.) Kino kimwesha’mba bunonshi Yesu boapele baana banji ba bwanga kechi bwa ku mubiji ne.
Kabiji bena Kilishitu bavula ba mu kitota kitanshi bajinga bayanji. Petelo wakumbwile mwanamulume kilema maulu kufuma munda ya inanji byo amulombele mali amba: “Mali a siliva ne a ngolode kechi nji nao ne; pakuba kyo nji nakyo, nsakwimupa. Mu jizhina ja Yesu Kilishitu mwina Nazala, endai.”—Byubilo 3:6.
Byambo bya mwana wa bwanga Yakoba nabyo bimwesha’mba mu kipwilo kya bwina Kilishitu mwavujile bayanji. Wanembele’mba “Umvwai balongo bami batemwe; aye Lesa kechi wasalulwile abo bayanji ba panopantanda ba lwitabilo, amba bekale banswanyi ba bufumu bo alayile ku abo bamutemwa, nenyi?” (Yakoba 2:5) Kabiji mutumwa Paulo waambile’mba kechi bavula ‘ba maana mwayila buntunshi’ nangwa “babilobo” “nangwa bavula bashiñama baichilwe mu kipwilo kya bwina Kilishitu” ne.—1 Kolinda 1:26.
Umvwe Yesu kechi wapele baana banji ba bwanga bunonshi bwa ku mubiji ne, bunonshi bwa mutundu ka bo ebapele? Nkalata yatumine Yesu ku kipwilo kya Simulina, waambile’mba: “Nayuka bya malwa byobe, ne buyanji bobe (byonkabyo wi munonshi)” (Lumwekesho 2:8, 9) Bena Kilishitu ba Simulina nangwa bayanjile, banonkele bunonshi bwakila siliva ne ngolode. Banonkele mambo bajinga na lwitabilo ne bukishinka kwi Lesa. Lwitabilo lwanema bingi mambo kechi bonse “baji na lwitabilo ne.” (2 Tesalonika 3:2) Aba babula lwitabilo bayanji kwi Lesa.—Lumwekesho 3:17, 18.
Bunonshi Bufuma mu Kwikala na Lwitabilo
Mu ñanyi mashinda mwanemena lwitabilo? Aba baji na lwitabilo banonka “kuvula kwa lusa lwanji ne kutekanya kwanji ne kukoka muchima kwanji.” (Loma 2:4) Kabiji batambula “kulekelwa kwa bundengamambo [bwabo]” na mambo a lwitabilo lwabo mu kitapisho kya kwa Yesu. (Efisesa 1:7) Kunungapo bekala na maana afuma mu “mambo a Kilishitu” ekalatu na boba baji na lwitabilo. (Kolose 3:16) Byo balomba kwi Lesa na lwitabilo, “mutende wa Lesa ubula kuyukanyika” ulama michima ne milanguluko yabo, kwibalengela kwikala balusekelo.—Filipai 4:7.
Kununga pa bintu byonse byawama byo bamwenamo, aba baitabila mwi Lesa kupichila mu Mwananji, aye Yesu Kilishitu baji na luketekelo lwa kwikala na bumi bwa myaka ne myaka. Byambo bya kwa Yesu Kilishitu byayukanyikwa bingi ke bya kuba’mba: ‘Lesa byo ebatemwisha ba panopantanda, wapaine Mwananji yenkawa umo amba, bonse bamwitabila kechi bonaike ne, poso amba bekale na bumi bwa myaka.’ (Yoano 3:16) Luno lwitabilo lwanema lukosa bingi inge muntu wayuka Shanji ne Mwana mambo Yesu waambile’mba: “Kabiji buno bo bumi bwa myaka, namba bemuyuke anweba, Lesa yenka wa kine, ne Yesu Kilishitu ye mwatumine.”—Yoano 17:3.
Mapesho a Lesa byo aikala a ku mupashi, tumwenamo byawama mu bwikalo bwetu bonsetu. Monai kya kumwenako kya kwa Dalídio wikala mu Brazil. Saka akyangye kufunda maana aamba pa nkebelo ya Lesa wajinga kitomi. Kino kyaletanga bingi lukatazho mu kisemi. Kabiji kino kyalengejile kubula kwingijisha mali bulongo. Byo atendekele kufunda Baibolo na Bakamonyi ba kwa Yehoba wapimpwile bwikalo bwanji.
Maana o afunjile Dalídio amulengejile kusankilapo byubilo byatama. Waubilenga bingi bulongo ku mupashi akyo kyamulengejile ne kwamba’mba: “Naseulukangatu mu bishimikwa bya maalwa; pano luno ngya na kusapwila ku nzubo ku nzubo.” Watendekele mwingilo wa kimye kyonse wa kusapwila Mambo a Lesa. Luno lupimpu kechi lwamulengejiletu kwikala na butuntulu bwa mubiji bwawama ne, bino bwamulengejile ne kuyuka bya kwingijisha mali bulongo. Dalídio waambile’mba: “Mali onaonaunanga na kutomena maalwa, luno neengijisha kukwashishamo bakwetu nangwa kupotamo bintu byo nkeba.” Kabiji luno uji na balunda bakine bo apwanañana nabo banemeka bintu bya ku mupashi byonka byo ebinemeka. Dalídio luno ubena kwikala mutende kabiji watana lusekelo lo abujile kwikalapo nalo saka akyangye kuyuka Lesa.
Twayai tumone kya kumwenako kikwabo kya kwa Renato kya byo aikale bwikalo bwawama na mambo a kwikala na lwitabilo mwi Yehoba Lesa. Umvwe mwamumona luno byo asangalala kuba mwaitaba amba mwana ye batayile ne. Kimye kyo asemenwe bainanji bamutayile. Bamubikile mu kyola ne kumusha munshi ya kipona, saaji na bikozha pa mubiji ne kalongolo saka kakyangye kupona. Banabakazhi babiji bamwene mu kyola saka muvuñunya munshi ya kipona. Patanshi balangulukile amba kampe paji walubako kamenshi. Byo bamwene’mba muji kana kanenda bukiji bukiji bekatwajile ku kipatela kyajinga pepi.
Umo pa bano banabakazhi wajinga Kamonyi wa kwa Yehoba kabiji wabujile Rita, mukwabo Kamonyi pa uno mwana. Rita wasafwangizhe memi avula bingi kabiji wajingatu na mwana wamukazhi umo. Wakebeshe bingi kwikalapo na mwana wamulume. Onkao mambo wamutambwile Renato kwikala ke mwananji.
Rita wamubujile Renato saka akijitu mwanyike amba kechi mwananji wa kwisemena ne. Bino wamulaminenga mu butemwe ne na kifyele kabiji wibikileko kumufunjisha mafunde a mu Baibolo. Byo akomene watatwile kutemwa bukine bwa mu Baibolo. Kabiji lusanchilo lwanji pa byo bamupulwishe lwabayijileko. Ulakasha mipolo kimye kyonse kyo atanga byambo bya nyimbi wa masalamo aye Davida bya kuba’mba: “Batata ne bamama umvwe bandekelela, Ponkapo Yehoba ukantola.”—Salamo 27:10.
Kumwesha lusanchilo pa byonse byamubila Yehoba, Renato wabatizwe mu 2002 kabiji waikele mwina Kilishitu musapwishi wa kimye kyonse mu mwaka walondejilepo. Ne luno kechi wakiyuka bashanji ne bainanji bamusemene ne, kabiji kampe kikapwilamotu kwakubula kwibayuka. Bino Renato wayuka kuba’mba bupe bwanema bo atambwila ke kuyuka ne kwikala na lwitabilo mwi Yehoba, Shanji wamutemwa kabiji wamuta muchima.
Kampepo nenuwa mukeba kufwenya kwipi ne Lesa ne kwikala na bulunda bwakosa nanji bulengela bwikalo kuwama. Bonse banonshi ne bayanji bakonsha kwikala balunda na Yehoba Lesa ne Mwananji Yesu Kilishitu. Kimo kimye kuba bwimuletela bunonshi bwa ku mubiji ne, bino bwakonsha kwimuletela mutende ne lusekelo bibula kupotwa na mali. Byambo biji mu Byambo bya Mana 10:22 bya kuba’mba: “Mapesho a Yehoba o alengela muntu kunonka; kabiji mingilo yanji kechi inungako kintu ne,” bya kine.
Yehoba Lesa wata bingi muchima bantu beya kwi aye: “Mama! inge mwakokejile mikambizho yami, inge mutende wenu waikajile nobe mukola, kabiji inge bololoke bwenu bwaikajile nobe manyaki a pa kalunga ka mema.” (Isaya 48:18) Kabiji walaya kwibapesha bantu baji na byubilo byawama beya ko aji na muchima umo amba: “Mfweto ya kwipelula ne ya kwakamwa Yehoba bo bunonshi ne buneme ne bumi.”—Byambo bya Mana 22:4.
[Kipikichala pa peja 13]
Nangwa kya kuba Yesu wajinga muyanji kisemi kyanji kya panopantanda bekipesheshe bingi kwi Lesa
[Mabulañano pa peja 14]
Lwitabilo mwi Lesa lundengela kwikala na mutende ne lusekelo