Kukosesha Bulunda mu ino Ntanda Mwabula Butemwe
“Bino bintu nemukambizha, namba mwitemwe anwe bene na bene.” —YOA. 15:17.
1. Mambo ka bena Kilishitu ba mu myaka kitota kitanshi o bafwainwe kwikala na bulunda bwakosa?
BUFUKU bwanji bwapeleleko panopantanda, Yesu watundaikile baana banji ba bwanga bakishinka kwikala na bulunda bwakosa abo bene na bene. Kimye kya mabanga waambile kuba’mba butemwe bo bakemweshanga abo bene na bene bo bukebayukanyikisha amba baana banji ba bwanga. (Yoa. 13:35) Batumwa bafwainwe kwitemwa pa kuba’mba bakonshe kushinda meseko ajinga kulutwe yabo kabiji ne kwingila mwingilo Yesu ye akonsheshe kwibapa. Kya kine, bena Kilishitu ba mu myaka kitota kitanshi bayukanyikilwe mambo a kwipana kwabo kwi Lesa ne kwi abo bene na bene.
2. (a) Ki ka kyo twakebesha kuba, kabiji mambo ka? (b) Mepuzho ka o tusakwisambapo?
2 Lelo jino, byo kyawamapo kupwanañana na jibumba ja ntanda yonse jilondela kya kumwenako kya bena Kilishitu ba mu myaka kitota kitanshi! Tukebesha kukokela mukambizho wa kwa Yesu wa kwitemwa kya kine atweba bene na bene. Nangwa byonkabyo, mu ano moba apelako, bantu bavula baikala ba kubula bukishinka kabiji ba kubula muchima wa bumuntu. (2 Timo. 3:1, 3) Bulunda bwabo ke bwa pa kakimye kachechetu kabiji bwa kusaka kwisangajika abo bene. Pa kuba’mba tulame kayukilo ketu ka kwikala bena Kilishitu ba kine, twafwainwa kuchinuzhuka bino byubilo. Onkao mambo, twayai twisambe pa ano mepuzho alondelapo: Bulunda bwawama bwaimena pa ka? Twakonsha kwikala byepi na balunda bawama? Kimye ka kyo twakonsha kupwisha bulunda? Kabiji twakonsha kutwajijila byepi kwikala na bulunda bwawama?
Bulunda Bwawama Bwaimena pa Ka?
3, 4. Bulunda bwakosa bwaimena pa ka, kabiji mambo ka?
3 Bulunda bwakosa ke bobwa bwaimena pa kutemwa Yehoba. Mfumu Solomone wanembele’mba: “Muntu wakonsha kushinda mukwabo ujitu bunke, bino inge babiji kechi akebakonshe ne. Nangwa lutambo wa mizhinge isatu kechi uchibika bukiji ne.” (Sapwi. 4:12) Umvwe Yehoba waikala muzhinge wa busatu mu bulunda, abwa bulunda bukatwajijila.
4 Kya kine, aba babula kutemwa Yehoba, nabo bakonsha kwikala na bulunda bwawama. Pano bino umvwe bantu baikala balunda na mambo a kutemwa Lesa, bulunda bwabo bukosa. Umvwe paikala kupusana, balunda ba kine beubila bintu mu jishinda jisangajika Yehoba. Umvwe balwanyi ba Lesa basaka kuleta mabano, bano balwanyi bakamona kuba’mba bulunda bwa bena Kilishitu ba kine kechi bupwa ne. Mu mpito yonse, bakalume ba Yehoba bepana kufwa, kukila kusatukila bakwabo. —Tangai 1 Yoano 3:16.
5. Mambo ka bulunda bwa kwa Luta ne Naomi o bwakosejile?
5 Kwa kubula nangwa kuzhinaukatu ne, twakonshatu kwiyowa bulunda na boba batemwa Yehoba. Akimonai kya kumwenako kya kwa Luta ne Naomi. Bano banabakazhi bajinga na bulunda bwawama bwa boba banembwapo mu Baibolo. Mambo ka bulunda bwabo kyo bwakosejile? Luta waambile kyalengejile byo aambijile Naomi amba: “Balongo benu bakekala ke balongo bami ne Lesa wenu ukekala ke Lesa wami... . Aye Yehoba angube bibi ne bibi ne kukilapotu inge nangwa lufu lwangabanya amiwa ne anweba.” (Luta 1:16, 17) Luta ne Naomi batemenwe bingi Lesa, kabiji buno butemwe bwibalengejile kuyuka byo bakonsheshe kwiubila abo bene. Ne kyafuminemo, bonse babiji Yehoba wibapesheshe.
Bya Kutana Balunda Bawama
6-8. (a) Ki ka kilengela bulunda kukosa? (b) Mwakonsha kwitendekelako byepi kwikala na balunda?
6 Kya kumwenako kya kwa Luta ne Naomi kimwesha kuba’mba bulunda bwawama kechi bwiyatu bwine ne. Kutemwa Yehoba kyo kitendekesho. Kwikala na bulunda bwakosa kikebewa kwibikako ne kwipana anweba bene. Nangwatu baana baji mu bisemi bya bena Kilishitu bipopwela Yehoba, bafwainwa kwingila na ngovu pa kuba’mba bekale na bulunda bwakosa. Pano mwakonsha kutana byepi balunda bawama?
7 Tendekelaipo. Mutumwa Paulo watundaikile balunda nanji ku kipwilo kya ku Loma amba, “ikalai na muchima wa kusekelela benyi.” (Loma 12:13) Muntu inge ubena kwenda mu jishinda utamuna kulu kumo kumo. Byonkabyo, ne kusekelela benyi kwavwangamo kuba kintu kimo kimo pa kimye pa kimye. Kafwako muntu mukwabo wakonsha kwimufuukwilako pa mambo a kusekelela benyi ne. (Tangai Byambo bya Mana 3:27.) Jishinda jimo jo mwakonsha kusekelelamo benyi ke kupichila mu kwitako ba mu kipwilo bapusana pusana kuba’mba mujiile nabo pamo bya kuja. Nanchi mwibikila kikonkwanyi kya kusekelela ba mu kipwilo kyenu nyi?
8 Jishinda jikwabo jo mwakonsha kwitendekelako kwikala na balunda ke kupichila mu kwingila na bakwenu bapusana pusana mu mwingilo wa kusapwila. Umvwe mwafika pa nzubo ya muntu kabiji mwaumvwa ye muji nanji saka amba kufuma panshi ya muchima pa mambo a byo atemwa Yehoba, mukafwenya kwipi na yewo muntu.
9, 10. Kya kumwenako ka Paulo kyo amwesheshe, kabiji twakonsha kumulondela byepi?
9 Baishai butemwe bwenu. (Tangai 2 Kolinda 6:12, 13.) Nanchi mwakiumvwapo kala kuba’mba kafwako nangwa umo mu kipwilo wakonsha kwikala mulunda nenu nyi? Umvwe kiji bino, nanchi muchinuzhuka boba bakonsha kwikala balunda nenu nyi? Mutumwa Paulo wamwesheshe kya kumwenako kyawama kya kubaisha butemwe bwanji. Pa kimye kimo, kechi walangulukilepo kwikala na bulunda na boba babujile kwikala Bayudea ne. Nangwa byonkabyo, waikele ‘mutumwa wa Bangetila.’ —Loma 11:13.
10 Kunungapo, Paulo kechi waikalangatu na balunda ba mafumbi anji ne. Kya kumwenako, aye ne Timoti bajinga balunda ba kine kine nangwa kya kuba bapusene mu myaka ne nkomeno. Ne lelo jino, bakyanyike basangalala bingi kwikala na balunda bakikulumpe mu kipwilo. Vanessa uji na myaka ya kusemwa kukilako pacheche pa 20 waamba’mba: “Nji na mulunda nami wa pa muchima uji na myaka ya kusemwa ya mu ma 50. Nakonsha kumubula byonse biji ku muchima wami byonkatu byo nakonsha kubula balunda nami ba jifumbi jami. Kabiji wanta bingi muchima.” Mwakonsha kwisampa byepi buno bulunda? Vanessa waamba’mba: “Nebikileko bingi pa kuba’mba ngikale na buno bulunda kechi bwaishiletu abo bwine ne.” Nanchi mukeba kwikala na balunda babula ba jifumbi jenu nyi? Yehoba kine ukemupesha na mambo a byo mwibikako.
11. Twakonsha kufunjilako ka ku kya kumwenako kya kwa Yonafwanyi ne Davida?
11 Ikalai bakishinka. Solomone wanembele’mba: “Mutemwe wobe ukutemwa bimye byonse, kabiji mulongo wasemekelwa mambo a kimye kya kumona bya malwa.” (Mana. 17:17) Byo anembelenga bino byambo, Solomone wafwainwa walangulukilenga pa bulunda bwajinga pakachi ka shanji Davida ne Yonafwanyi. (1 Sam. 18:1) Mfumu Saulo wasakilenga kuba’mba mwananji Yonafwanyi akaswane pa bufumu bwa bena Isalela. Bino Yonafwanyi waswile kuba’mba Yehoba wasajile Davida kwikala mfumu. Kupusanako ne Saulo, Yonafwanyi kechi wamubijile Davida kichima ne. Kechi waumvwine kutama pa mambo a munema watambwijile Davida ne, nangwa kumvwina bubela bwakumbenye Saulo pa mambo a kwa Davida ne. (1 Sam. 20:24-34) Nanchi ne atweba tuji byonka byajinga Yonafwanyi nyi? Umvwe balunda netu batambwila mashuko mu kipwilo, nanchi tumvwa bulongo nyi? Umvwe baikala na makatazho, nanchi twibatekenesha ne kwibakwasha nyi? Umvwe muntu witubula byatama pa mambo a mulunda netu, abya tufikenatu kwitaba nyi? Inyi tuba byonka byaubile Yonafwanyi ne kuzhikijila mulunda netu mu bukishinka nyi?
Umvwe Bulunda ke Bukebe Kupwa
12-14. Makatazho ka bafunda Baibolo bamo o bapitamo, kabiji twakonsha kwibakwasha byepi?
12 Umvwe ufunda Baibolo watendeka kupimpula bwikalo bwanji, wakonsha kwikala na makatazho pa mambo a balunda. Wakonsha kwikala na bakwabo bo esamba nabo pano bino babula kulondela byubilo bya mu Baibolo. Kala kampe bo apwanañananga nabo kimye kyonse. Nangwa byonkabyo, pano wamona kuba’mba byubilo byabo byakonsha kumongola, kabiji wasalapo kukepeshako kwendañana na bano balunda nanji. (1 Ko. 15:33) Nangwa byonkabyo, wakonsha kuba kealanguluke kuba’mba umvwe ke abule kwendañana nabo, ukekala wabula bukishinka.
13 Umvwe mufunda Baibolo pano mwatanwa mu ano makatazho, vulukai kuba’mba mulunda wawama ukatemwa kuba’mba mubena kupimpula byubilo byenu. Wakonsha ne kusaka kufunda pe Yehoba pamo ne anweba. Pakuba balunda babubela ‘bakemunena bibi’ byo mubula “kwichampakanya nabo pamo mu bincha.” (1 Pe. 4:3, 4) Kya kine, anweba kechi yenu mwabula bukishinka kwi abo ne, balunda nenu bo babula bukishinka kwi anweba.
14 Umvwe bafunda Baibolo bebakana ku balunda nabo bakala babula kutemwa Lesa, ba mu kipwilo bakekala balunda nabo. (Nga. 6:10) Nanchi anweba bunke bwenu mwayukapo bamo bafunda Baibolo babena kutanwa ku kupwila nyi? Nanchi pa bimye bimo mwibakwasha kupichila mu kupwanañana kwawama nyi?
15, 16. (a) Twafwainwa kuba byepi umvwe mulunda netu waleka kwingijila Yehoba? (b) Twakonsha kumwesha byepi byo twatemwa Lesa?
15 Pano ibyepi umvwe mulunda nenu wa mu kipwilo wafuukulapo kuleka kwingijila Yehoba, kampe keakebewe ne kupangiwa mu kipwilo? Kino kyakonsha kwimuletela bingi bulanda. Pa kulondolola byo eumvwine mulunda nanji byo alekele kwingijila Yehoba, nyenga umo waambile’mba: “Kyankolele bingi ku muchima. Namwene namba mulunda nami wakosele mu bukine, nanchi ne. Nalangulukile namba kampe waingijilanga Yehoba na mambotu a kusaka kusangajika kisemi kyanji. Natendekele kwipima amiwa mwine. Nanchi nji na bishinka byawama bindengela kumwingijila Yehoba nyi?” Uno nyenga waubilepo byepi? Waambile’mba: “Natwikile Yehoba kisendwa kyami. Nasaka kumwesha Yehoba kuba’mba kechi namutemwatu na mambo a kuba’mba wampa balunda mu kipwilo ne.”
16 Kechi twakonsha kuketekela kwikala balunda ne Lesa umvwe twaikala balunda na boba basalapo kwikala balunda na ino ntanda ne. Mwana wa bwanga Yakoba wanembele’mba: “Kechi mwayuka’mba, bulunda na bya panopantanda bo bulwanyi ne Lesa, nenyi? Byonkabyo awa usaka kwikala ke mulunda ne bya panopantanda wialula mwine ke mulwanyi ne Lesa.” (Yako. 4:4) Twakonsha kumwesha amba twamutemwa Lesa kupichila mu kuketekela amba uketukwasha kuchinchika inge twaikala bakishinka kwi aye. (Tangai Salamo 18:25.) Nyenga waambiwapo pa kutendeka wanembele’mba: “Nafunjile kuba’mba kechi twakonsha kulengela muntu kutemwa Yehoba nangwa kwitutemwa atweba ne. Kya kine, kino ke kya kwifukwila muntu mwine.” Pano twakonsha kuba byepi pa kuba’mba twikale na bulunda bwawama na boba baji mu kipwilo?
Kukosesha Bulunda Bwawama
17. Balunda bawama besamba byepi bene na bene?
17 Lumvwañano lwawama lulengela kwikala na bulunda bwawama. Byo mutanga mashimikila a mu Baibolo a kwa Luta ne Naomi, Davida ne Yonafwanyi, Paulo ne Timoti, mukamona kuba’mba balunda ba kine bekasulukila ne kwipa mushingi. Pa mambo a byo twafwainwa kumvwañana na bakwetu, Paulo wanembele’mba: “Byambo byenu bikale na bupe moba onse, byalungwa na mukele.” Paulo watazhizhenga ku byo twafwainwa kwamba ku boba “baji pangye,” ko kuba’mba babula mu bulongo bwetu bwa bwina Kilishitu. (Kolo. 4:5, 6) Kya kine, umvwe bantu babula bena Kilishitu bakwetu bakebewa kwamba nabo na mushingi, kyakonsha kukilamo ku balunda netu mu kipwilo!
18, 19. Twafwainwa kumonanga byepi lujimuno lo tutambwila ku balunda netu bena Kilishitu, kabiji bakulumpe mu kipwilo kya ku Efisesa bapaine ñanyi kya kumwenako kwi atweba?
18 Balunda bawama banemeka milanguluko ya bakwabo, misambo yabo yafwainwa kwikala yawama kabiji ya kubula kupita mu mbaji. Mfumu wa maana Solomone wanembele’mba: ‘Manyi ne binunka bulongo bisangajika muchima, byonkabyo ne bulunda bwawama bupana maana nabo mo monka.’ (Mana. 27:9) Nanchi bino byo byo mumona lujimuno lonse lwimujimunako mulunda nenu nyi? (Tangai Salamo 141:5.) Umvwe mulunda nenu wimujimunako pa byubilo byenu bimo, mubapo byepi? Nanchi mumona kuba’mba wamwesha butemwe bubula kwaluka nyi, inyi muzhingila?
19 Mutumwa Paulo wajinga na bulunda bwakosa na bakulumpe mu kipwilo kya ku Efisesa. Kyamweka nobe wibayukile kimyetu kitanshi kyo baitabijile. Nangwa byonkabyo, byo apwijile nabo japeleleko, wibapele lujimuno lwa kubula kupita mu mbaji. Baubilepo byepi? Balunda nanji Paulo kechi bazhingijile ne. Mu kifulo kya kuzhingila, bamusanchijile pa mambo a kwibata muchima, kabiji bajijile pa kulanguluka kuba’mba kechi bakamumonapo jibiji ne. —Byu. 20:17, 29, 30, 36-38.
20. Mulunda wawama uba ka?
20 Balunda bawama kechi batambwilatu lujimuno ne, bino ne abo bapana. Kya kine, twafwainwa kumona kimye kya ‘kuba mingilo [yetu] atweba bene.’ (1 Tesa. 4:11) Kabiji twafwainwa kuyuka kuba’mba atweba bonse umo umo “tukeambila mambo kwi Lesa.” (Loma 14:12) Bino umvwe kyakonsheka, mulunda wawama uvululako mulunda nanji mu butemwe pa mambo a mizhilo ya Yehoba. (1 Ko. 7:39) Kya kumwenako, ibyepi umvwe mulunda nenu wabula kutwela mu masongola watendeka kwifwalama na muntu wabula mwina Kilishitu? Nanchi mukalekatu kwa kubula kumukwasha na mambo a kuchina’mba bulunda bwakapwa nyi? Nangwa umvwe mulunda nenu wakana lujimuno, mukobapo byepi? Mulunda wawama ukabula bakafunga kuba’mba bakwashe mulunda nanji wivwanga mu byubilo byatama. Mwafwainwa kukosa pa kuba’mba mube bino. Bulunda bwaimena pa kutemwa Yehoba kechi bukapwa ne.
21. Atweba bonse kimye kimo tuba ka, bino mambo ka o kyanemena kwikala na balunda ba mu kipwilo?
21 Tangai Kolose 3:13, 14. Kimo kimye, tukalenga bakwetu “mambo,” nangwa abo kwitulenga mambo. Yakoba wanembele’mba: “Atweba bonse twituntula mu bintu byavula.” (Yako. 3:2) Nangwa byonkabyo, kikebewa ku balunda kechi bimye byo twilenga mambo ne, bino kikebewa ke kwilekela mambo. Byo kyanemapo kukosesha bulunda kupichila mu kwisamba patoka ne kwilekela mambo! Inge twamwesha buno butemwe, pakekala ‘kukwatankana kwalumbuluka.’
Musakukumbula’mba Ka?
•Twakonsha kutana byepi balunda bawama?
•Bintu ka byakonsha kupwisha bulunda?
•Twakonsha kuba byepi pa kuba’mba tukoseshe bulunda bwawama?
[Kipikichala pa peja 18]
Ki ka kyalengejile bulunda bwa kwa Luta ne Naomi kukosa?
[Kipikichala pa peja 19]
Nanchi mumwesha bumpanyi kimye kyonse nyi?