‘Baishai Michima Yenu’
1. Ñanyi mutembo atweba umo umo ye tuji nanji?
1 Mu bulongo bwetu bwa bwina Kilishitu, atweba umo umo tuji na mutembo wa kuleta lusekelo mu kipwilo. (1 Pe. 1:22; 2:17) Luno lusekelo lwiya umvwe ‘twabaisha michima yetu’ ya kwitemwa atwe bene na bene. (2 Ko. 6:12, 13) Mambo ka o kyanemena kuyuka bulongo balongo ne banyenga yetu?
2. Mambo ka o kyanemena kwikala balunda na bakwetu ba mu lwitabilo?
2 Bulunda Bukoselako: Byo twiyukisha bulongo na bakwetu ba mu lwitabilo, tunemeka bingi lwitabilo lwabo, kuchinchika, ne byubilo byabo bikwabo byawama. Kechi tuta muchima ku bilubo byabo ne, kabiji mfungwa ya bulunda bwetu ne abo ibailako. Inge twiyukisha bulongo, kitulengela kwikosesha ne kwikomesha atwe bene na bene. (1 Tesa. 5:11) Twikala ke ‘bakwikosesha michima’ atwe bene na bene kuchina byubilo byatama bya ino ntanda ya kwa Satana. (Kolo. 4:11) Byo tubena kupita mu ano moba apelako akatazha, tuji bingi na lusekelo pa kwikala na balunda bawama mukachi ka bantu ba Yehoba!—Mana. 18:24.
3. Twakonsha kwikala byepi bakukosesha bakwetu michima?
3 Bakwetu mo twiyukila bakonsha kwitukosesha ne kwitutekenesha inge twaponena mu meseko akatampe. (Mana. 17:17) Mwina Kilishitu umo wiumvwinenga kulengululwa uvuluka’mba: “Najinga na bakwetu baambilenga bintu byalutundaiko pe amiwa kunkwasha kuba’mba nshinde milanguluko yo najinga nayo ya kwiumvwa watutu.” Bakwetu ba uno mutundu ke kya bupe kifuma kwi Yehoba.—Mana. 27:9.
4. Twakonsha kwibayuka byepi bulongo bakwetu mu kipwilo?
4 Mweshai Lusekelo mu Bakwenu: Twakonsha kubaisha byepi muchima wa kutemwa bakwetu ba mu lwitabilo? Kununga pa kwimuna bakwetu kimye kya kupwila kwa bwina Kilishitu, letaipo mwisambo walumbuluka mwisambenga. Kwa kubula kutemwa twakwipuzhaipuzha, bamweshai lusekelo. (Fili. 2:4; 1 Pe. 4:15) Jishinda jikwabo jo twakonsha kumwesheshamo butemwe ku bakwetu ke kwibetako ku kya kuja. (Luka 14:12-14) Nangwa kampe mwakonsha kunengezha’mba mukengijile nabo pamo mu mwingilo wa mu bujimi. (Luka 10:1) Byo twibikako kwibayuka bulongo balongo betu, tutundaika mutende mu kipwilo.—Kolo. 3:14.
5. Ñanyi jishinda jimo jo twakonsha kwikelamo na balunda bakwabo?
5 Nanchi tuji na kasela ka kusalatu balunda netu ba mafumbi o tujimo nangwa boba batemwa bintu byo twatemwa nyi? Abino bintu kechi byafwainwa kwitulengela kukepesha balunda netu bo twafwainwa kwikala nabo mu kipwilo ne. Davida ne Yonafwanyi, kabiji Luta ne Naomi baikele ke balunda na muntu nangwa kya kuba bapusene mu myaka ya kusemwa ne mu nkomeno yabo. (1 Sam. 18:1; Luta 4:15) Nanchi mwakonsha kwikala na balunda bakwabo nyi? Kuba bino kwakonsha kwimuletela mashuko o mwabula nangwa kuketekela ne.
6. Mfweto ka imo iji mu kubaisha michima yetu ya kutemwa balongo betu?
6 Byo tubaisha michima yetu ya kutemwa bakwetu, twikosesha atwe bene na bene ne kutundaika mutende mu kipwilo. Kabiji, Yehoba aye mwine witupesha na mambo a butemwe bo tumwesha ku balongo betu. (Sala. 41:1, 2; Hebe. 6:10) Nga mambo ka a kubula kwibikila kikonkwanyi kya kwiyukisha bulongo na balongo bavula?