Mepuzho Kufuma Kubatanga

Nanchi kijitu bulongo nyenga kuvwala kitambala ku mutwe pa kutuntulula majashi a Baibolo mu mulaka wa kwamba na maboko pa kupwila kwa bwina Kilishitu nangwa pa kupwila kukatampe nyi?

Kwesakana na mwayilatu bintu, nyenga wa bwina Kilishitu wafwainwa kuvwala kitambala ku mutwe inge ubena kwingila mingilo yafwainwa kwingila mwatawanji nangwa mulongo mu kipwilo. Bino byo byaamba jifunde jaambile mutumwa Paulo amba: “Mwanamukazhi ulomba nangwa kwaula na Mupashi kasa abula kuvwala ku mutwe, wapelula mutwe wanji” mambo “mutwe wa mwanamukazhi ye mulume wanji.” (1 Ko. 11: 3-10) Umvwe nyenga wavwala kitambala kya mushingi ku mutwe wanji mu bimye bya uno mutundu, umwesha kuba’mba ubena kunekenena luno lunengezho lwa Lesa luji mu kipwilo kya bena Kilishitu. —1 Timo. 2: 11, 12.a

Pano kyakonsha kwikala byepi inge nyenga ke atuntulwile mu mulaka wa kwamba na maboko jashi jibena kwamba mulongo? Mu jino jishinda twakonsha kwamba’mba nyenga ke ntuntuluzhitu wa mulaka. Kibena kulumbulula kuba’mba aye kechi ye ubena kufunjisha ne, ubena kufunjisha ke mulongo ubena kwamba jojo jashi jo abena kutuntulula. Nangwa byonkabyo, kutuntulwila mu mulaka wa kwamba na maboko kwapusana bingi na kutuntulula kufuma mu mulaka umo wa kwamba kutwala mu mulaka mukwabo wa kwamba. Pa kutuntulula milaka ya kwamba, banteleki bakonsha kuta muchima ku bibena kwamba ñambi kabiji ne kuteleka ku bibena kwamba ntuntuluzhi. Kupusanako na byo kikala pa kutuntulwila mu mulaka wa kwamba na maboko, banyenga batuntulula kufuma mu mulaka wa kwamba kutwala mu mulaka mukwabo wa kwamba javula kechi bekala ne pakuba kebebamone ku bantu bavula ne. Kimo kimye pa kutuntulula bakonsha kwikala kya kwikala nangwa inge baimana, batala kwi ñambi mu kifulo kya kutala ku luonde. Onkao mambo kechi kyafwainwa nyenga ubena kutuntulula kufuma mu mulaka wa kwamba kutwala mu mulaka mukwabo wa kwamba kuvwala kitambala ku mutwe ne.

Kununga pa bino, na mambo a kuyilako palutwe mu bya kulengalenga byo bengijisha pa kutuntulwila majashi mu mulaka wa kwamba na maboko, ntuntuluzhi ye ye bakonsha kuta maana bingi banteleki. Awo ubena kutuntulula ye ye bamwesha pa malangalanga, pano mwine ubena kwamba jashi kimo kimye kechi wakonsha ne kumwekana ku luonde ne. Onkao mambo, nyenga byo aji na mwingilo wa kutuntulwila mu mulaka wa kwamba na maboko wafwainwa kuvwala kitambala ku mutwe.

Pano nga luno lupimpu lwalamata byepi mwingilo wa kutuntulwila mu mulaka wa kwamba na maboko majashi a mu Sukulu wa Mwingilo wa Lesa, bimwesho, ne mikumbu kimye kya Lufunjisho lwa Baibolo lwa Kipwilo, Kupwila kwa Mwingilo ne Lufunjisho lwa Kyamba Kya Usopa? Nanchi nyenga ubena kutuntulwila mu mulaka wa kwamba na maboko mu bino bimye naye wakonsha kuvwala kitambala ku mutwe wanji nyi? Mu bimye bimo kechi kyakonsha kunema nyenga kuvwala kitambala ku mutwe ne, byo kiji kuba’mba bonse mu luonde bayuka’mba kechi ye ubena kutangijila kupwila ne. Kya kumwenako, nyenga kechi wakonsha kuvwala kitambala ku mutwe umvwe ubena kutuntulula mikumbu ibena kukumbula ba mu luonde, majashi abena kwamba banyenga nangwa bimwesho ne. Nangwa byonkabyo, pa kutuntulula majashi abena kwamba balongo pa kuno kupwila, kutuntulula bibena kwamba mulongo ubena kutangijila Lufunjisho lwa Kyamba kya usopa, Lufunjisho lwa Baibolo lwa Kipwilo nangwa pa kutangijila kwimba nyimbo, nyenga wafwainwa kuvwala kitambala ku mutwe. Pa kimye kya kupwila, nyenga wakonsha kutuntulula bibena kwamba balongo, banyenga, baana ne bakulumpe mu kipwilo. Na mambo a bino, kyakonsha kuwama bingi nyenga kuvwala kitambala ku mutwe mu kimye kya kupwila konse.

[Tubyambo twa mushi]