Kakitenguluzha Ka Mepuzho

◼ Nanchi musapwishi wamukazhi wafwainwa kuvwala kya kumutwe inge uji na musapwishi wamulume saka abena kufunjisha lufunjisho lwa Baibolo pangye nyi?

Umvwe musapwishi wamukazhi ubena kufunjisha lufunjisho lwa Baibolo lwa jonse, saka paji ne musapwishi wamulume wafwainwa kuvwala kya kumutwe. (1 Ko. 11:3-10) Kyamba kya Usopa kya Kibemba kya July 15, 2002, pa jipa 27, kyaamba amba: “Luno ke lubaji lwa kufunjisha muntu lwatanchikilwa jimo kuba’mba ubena kufunjisha ye wafwainwa kutangijila. Na mambo a bino, lufunjisho lwa Baibolo lwaikala ke lubaji lwa kufunjisha kipwilo. Umvwe mwanamukazhi Kamonyi wabatizhiwa ye ubena kufunjisha luno lufunjisho saka paji ne mwanamulume Kamonyi wabatizhiwa, mwanamukazhi wafwainwa kuvwala kya kumutwe.” Kino kyakonsha ne kwingila inge paji wamulume musapwishi wabula kubatizhiwa. Umvwe mubena kufunjila mu nzubo, pangye nangwatu ku mpunzha kukwabo mwafwainwa kulondela bino.

Umvwe mukyangye kutendeka kufunjisha uno muntu Baibolo pa lufunjisho lwa pangye ne, nyenga kechi wakonsha kuvwala kya kumutwe ne nangwa paji wamulume wabatizhiwa. Pano umvwe nyenga ubena kumweshatu byo bafunjisha lufunjisho lwa Baibolo mu buku wa kufundamo pa lwendo lwa bubiji kechi wafwainwa kuvwala kya kumutwe ne. Byo kiji kuba’mba mafunjisho a pangye atendeka pachepache, kupichila mu kubwelako javula, basapwishi bafwainwa kumona bintu byavwangwamo ne kimye kyo bafwainwa kutendeka kuvwala kya kumutwe.