Kutendeka Mafunjisho a Baibolo Mu ka Kimyetu Kacheche ne pa Foni
1, 2. Twakonsha kwalula byepi mutanchi wetu wa kufunjisha Baibolo pa kuba’mba tukwashe bantu bapayankana?
1 Bantu lelo jino bapayankana bingi. Nangwa byonkabyo, bavula bakeba bintu bya ku mupashi. Pano twakonsha kwibakwasha byepi pa kuba’mba bayuke bya ku mupashi? (Mat. 5:3) Basapwishi bavula bafunjisha bantu Baibolo mu ka kimyetu kacheche nangwa pa foni. Abya mwafwainwa kubaishako mwingilo wenu mu jino jishinda nyi?
2 Pakuba’mba tutendeke mafunjisho a Baibolo, twafwainwa kwinengezha kumwesha lufunjisho lwa Baibolo byo lubiwa pa kimye kiji kyonse patanyiwa jishuko. Kyafwainwa kubiwa byepi kabiji kwepi ko kyafwainwa kubiwa?
3. Mambo ka a kutendekela lufunjisho lwa Baibolo pa mwisambo mutanshi, kabiji kino kyafwainwa kubiwa byepi?
3 Mu ka Kimyetu Kacheche: Inge mwatana muntu ubena kukeba kwisamba nenu bya mu Baibolo, zhikulaitu pa palagalafu imo yo mwanengezhela jimo, nabiji palagalafu itanshi ya mu lufunjisho 1 mu buloshuwa Nanchi Lesa ukebaka, ne kutendeka kumulumbulwila. Tangai palagalafu, ne kwipuzha bwipuzho, kabiji ne kwisambapo pa kinembelo kimo nangwa bibiji byamweshiwa mu palagalafu. Javula kino kyakonsha kubiwa mu ka kimyetu kacheche mu maminiti atanu nangwa jikumi. Umvwe awo muntu wamwesha kizaku mu mwisambo, mubulai’mba mukeya na kwisamba palagalafu yalondelapo imo nangwa abiji kimye kikwabo.—Mashinda akwabo a kwingijisha kutendekelamo mafunjisho ponkapotu aji mu Mwingilo Wetu wa Bufumu wa January 2002, peja 6.
4. Twakonsha kutendeka byepi lufunjisho lwa Baibolo mu ka kimyetu kacheche kimye kyo twabwelako?
4 Jishinda jintutu jimo jakonsha kwingijishiwa kutendekelamo Mafunjisho a Baibolo pa kimye kya kubwelako. Kya kumwenako, mwakonsha kumumwesha buloshuwa wa Nanchi Lesa ukebaka ne kwisamba pa jizhina ja Lesa, kwingijisha lufunjisho 2, mapalagalafu 1-2. Pa kubwelako jikwabo, mwakonsha kwisamba pa bilumbulula Baibolo pa byubilo bya kwa Yehoba, kwingijisha mapalagalafu 3-4. Pa mwisambo ukalondelapo mwakonsha kwisamba mapalagalafu 5-6 kabiji ne kipikichala kiji pa peja 5 kulumbulula kufunda Baibolo byo kwitukwasha kuyuka Yehoba. Abye byonse byafwainwa kubiwa mu ka kimyetu kacheche.
5, 6. (a) Mambo ka bantu bamo o bakonsha kukebela kufunda Baibolo pa foni? (b) Jishinda ka jo twakonsha kwingijisha pa kubula muntu kufunda pa foni?
5 Pa Foni: Bantu bamo bakonsha kutemwa kufunda Baibolo pa foni kukila kwisamba nabo meso na meso. Akimonai kino kyamwekele: Kimye nyenga kyo asapwijilenga ku nzubo ne nzubo, wasambakene mwanamukazhi wakyanyike umo inetu wapayankene bingi na mingilo. Nyenga byo akankelwe kumutana pa nzubo jikwabo, walangulukile kumutumina foni. Uno mwanamukazhi wakyanyike walumbulwile’mba kechi wajinga na kimye kya kukonsha kufunda Baibolo ne. Nyenga wamwambijile’mba nangwa pa foni ponka “wakonsha kufunda kintu kipya kimo nangwa bibiji mu maminiti 10 nangwa 15.” Wamukazhi wakumbwile’mba, “Nanchi inge kwingijisha foni kyawama!” Ponkapo lufunjisho lwa kimye kyonse lwatendekele pa foni.
6 Abya bamo bo mufwakesha bakonsha kukeba kufunda pa foni nyi? Mwakonsha kweseka jishinda jintutu jimo jaambiwapo kala, nangwa mwakonsha kwambatu’mba: “Inge mukeba, twakonsha kufundanga Baibolo pa foni. Abya kino kyafwainwa kwi mupelela nyi?” Kupichila mu kwalula mutanchi wetu wa lufunjisho lwa Baibolo na bwikalo bwa bantu, twakonsha kwibakwasha ‘kumona maana a kumuyuka Lesa.’—Mana. 2:5; 1 Ko. 9:23.