Monaingapo Bimye bya Kulenga Baana ba Bwanga

1. Kwepi ko twakonsha kutana baana ba bwanga?

¹ Paulo ne bakwabo bena Kilishitu balenganga baana ba bwanga kupichila mu kusapwila ku nzubo ku nzubo, pa bisankanyi, ne kimye kyo baji pa lwendo, ko kuba’mba basapwilanga konse konse. Byo muji bamwingilo wa Bufumu bengila na mukoyo kulenga baana ba bwanga, nanchi mwakonsha kubaishako mwingilo wenu wa mu bujimi nyi? Nanchi mwakonsha kumonangapo tubimye twa kukebelamo bafwainwa ne kwibasapwila nyi? Ñanyi mashinda amo bakwetu basapwishi ba mambo awama o balengelamo baana ba bwanga?

2. Kya kumwenako ka kyo mwakonsha kushimikizha kimwesha buwame bwa kuta muchima ku tubimye twa kusapwila mambo awama twapusana pusana?

² Bavula babena kwingila bingi bulongo kwingijisha mashinda a kusapwilamo bantu konse ko batanwa. Basapwishi bamo basapwila konka ko bengila. Royd waingilanga pa mukochi waingijishanga kimye kya pachaile kwipuzha bakwabo mo baingijilanga byo balanguluka pa binembelo byapusana pusana. “Mulanguluka’mba ‘jibwe’ jatongolwa pa Mateo 16:18 jimenako ñanyi?” Nangwa “Ñanyi ‘jibwe ja kwituntulako’ jatongolwa pa Loma 9:32?” Jibumba ja bakwabo mo baingijilanga jakonkananga pamo na kuteleka ku ndumbulwilo ya Binembelo. Na mambo a ino misambo, bakwabo bavula mo baingijilanga ne Royd banungulukile kufika ku kwipana ne lubatizhilo. Wamwenepo jishinda ja kwisambilamo mambo awama.

3. Jishinda ka jingila bulongo ja kutatwilamo mafunjisho a Baibolo?

³ Basapwishi ba Bufumu bamo inge baingijisha jishinda jawama ja kubujilamo bantu kutatula nabo lufunjisho lwa Baibolo mufuma byawama. Juba jimo lukelo kipwilo kiji na basapwishi 105 bebikileko kushinkamana bantu bo batainenga pa mazubo amba batatule nabo lufunjisho lwa Baibolo. Basapwishi makumi atanu na asatu ne batanu na umo bo baingijile maawala abiji mu mwingilo wa busapwishi kabiji batatwile mafunjisho a Baibolo kukila pa 15.

4. Mukambizho ka wanema wapaine Yesu ye twafwainwa kutako muchima, kabiji pa kuba tumufikizhe twafwainwa kwibikako kuba ka?

⁴ Twajijilai Kukebamo Bafwainwa: Byo muji basapwishi ba Bufumu, kimo kimye mwakonsha kwingijisha mashinda atongolwa mu kino kibaba. Bino kyawama bingi kuyuka bisho biji kuyoyo mpunzha kimye kyo mubena kulanguluka pa mashinda a kwingijisha pa kusapwila. Ne kyakilapo kunema twayai bonse tulamenga mukambizho wa kwa Yesu wa kukebamo bantu bafwainwa ne kwibakwasha kwikala baana ba bwanga.—Mateo 10:11; 28:19.