Kusapwila ku Nzubo ne Nzubo
1. Bwipuzho ka bujipo pa mambo a mwingilo wa ku nzubo ne nzubo, kabiji mambo ka?
1 “Aba bayuka bingi mashinda avula a kusapwilamo Bukine baswa kuba’mba mukwekele wa kusapwila ku nzubo ne nzubo Mafunjisho a mu Binembelo, mu ano moba, ke jishinda jawama bingi ja kusapwilamo Bukine.” Bino byambo kufuma mu Zion’s Watch Tower wa July 1, 1893, bimwesha buneme bwa mwingilo wa ku nzubo ne nzubo. Bantu kuzhokoloka ntanda yonse bamumona uno mwingilo kwikala kayukilo ka kuyukilako Bakamonyi ba kwa Yehoba. Abya jino jishinda ne luno jikingila bulongo byo kiji kuba’mba kibakatazhe bingi kutana bantu pa nzubo mu byalo bimo nyi?
2. Binembelo ka mwafuma mwingilo wa kusapwila ku nzubo ne nzubo?
2 Wa mu Binembelo Kabiji Wanema: Kusapwila ku nzubo ne nzubo kwafuma mu Binembelo. Yesu watumine baana ba bwanga 70 kuya babiji babiji ku mazubo a bantu. (Luka 10:5-7) Aku Yesu ufwatu, Baibolo waamba pa baana banji ba bwanga amba: “Moba onsetu mu nzubo ya Lesa ne kwabo, kechi balekele kufunjisha ne kusapwila mambo awama” ne. (Byubilo 5:42) Mutumwa Paulo naye wafunjishenga na mukoyo ku nzubo ne nzubo.—Byubilo 20:20.
3. Ñanyi buwame bumo buji mu kusapwila ku nzubo ne nzubo?
3 Kusapwila ku nzubo ne nzubo kwatwajijila kwikala jishinda janema bingi ja kukumbenyamo mambo awama ano moba. Kwitulengela ‘kwipuzhamo’ bantu bafwainwa mu jishinda jatanchikwa bulongo. (Mat. 10:11) Bantu javula bekala bakasuluka pa nzubo. Kwisambako nabo kilungi na kilungi—kumvwa jiwi jabo, kumona mwekanyikilo ya kilungi kyabo, kabiji ne kutalatala mwaya lubanza wabo—kwitulengela kuyuka bintu byo batemwa ne byo baakamwa. Javula kitupa jishuko ja kwisamba nabo kimye kyabaya.
4. Twakonsha kulenga byepi kusapwila ku nzubo ne nzubo kwikala bulongo?
4 Ubaiko Lupimpu mu Mingilo Yenu: Mutumwa Paulo wapimpulanga mutanchi wa kwingijilamo mingilo yanji “na mambo a mambo awama.” (1 Ko. 9:23) Kampe twakonsha kupimpulako mutanchi wetu wa kusapwila kimye bantu bavula kyo batanwa pa nzubo, nabiji mabanga, kumpelo ya milungu, nangwa pa moba a kukokoloka. Sungai po mwanemba mazubo po mwabula kutana bantu, kabiji esekai kubwelako pa juba jikwabo mu yewo mulungu nangwa pa kimye kikwabo mu pa jojo juba.
5. Nga aba babula butuntulu bwa mubiji bwakosa bakonsha kuvwangiwamo byepi mu mwingilo wa ku nzubo ne nzubo?
5 Nangwatu boba babula butuntulu bwa mubiji bwakosa bakonsha kwingilako mwingilo wa kusapwila ku nzubo ne nzubo. Kampe twakonsha kunengezha kuya na bano bantu ku mazubo ko bakonsha kufika, ne kwibakwasha kwingila pakonsha kupelela bulume bwabo. Nyenga umo wajinga na kikola kya kukatazhiwa kupema, wakonsheshetu kusapwila pa nzubo imo mu maminiti 30. Pano bino, panyuma ya kwingilako mwingilo wa kusapwila na jibumba waumvwine bingi bulongo!
6. Mambo ka o twafwainwa kumwena’mba kusapwila ku nzubo ne nzubo kwaikala lubaji lwa kimye kyonse lwa mwingilo wetu?
6 Bantu bavula baji nobe mikooko batanwa kimye kya mwingilo wa ku nzubo ne nzubo. Musapwishi umo wakonkosheshe ku kinzhilo kabiji bamwambijile amba: “Twelai. Ne muyuka. Na balombenga kwi Lesa kuntuminapo muntu wakukwasha, kepo naji kumvwa muntu saka akonkonsha ku kinzhilo. Waji kuñumvwa kabiji ne kwimutuma.” Kino kintu kibena kumwesha’mba Yehoba ubena kupesha jino jishinda ja kusapwilamo. (Mat. 11:19) Monai kuba’mba mwingilo wa kusapwila ku nzubo ne nzubo waikala lubaji lwa kimye kyonse lwa mwingilo wenu.