Ingijishainga Kimye Kyenu Bulongo mu Mwingilo
Bakamonyi ba kwa Yehoba baingijile maola 1,945,487,604 mu mwingilo mu mwaka wa mwingilo wa 2014, kibena kumweshatu patoka kuba’mba twapayankana bingi mu mwingilo wa Yehoba! (Sala. 110:3; 1 Ko. 15:58) Byo kiji kuba’mba “kimye kyashalako kyakepa,” nanchi kyayilamo kuba’mba twingijishenga kimye kyetu kyanema kwisamba na bantu bavula mu mwingilo nyi?—1 Ko. 7:29.
Kwingijisha kimye kyetu bulongo mu mwingilo kukebewa kupimpulako bintu bimo. Kya kumwenako, inge mwaingilanga jiola jimo nangwa kukilapo mu lubaji lumo lwa mwingilo kwa kubula kwisambapo na muntu, nanchi mwakonsha kupimpulako byo mwingila pa kuba’mba mutaane bantu ba kwisamba nabo nyi? Bwikalo bwaenda kupusana pusana monka mwayila mapunzha. Nangwa byonkabyo, mashinda alondelapo akonsha kwimukwasha kwingijishanga kimye kyenu bulongo pa kuba’mba mubulenga ‘kupumatu mu mwela.’—1 Ko. 9:26.
Kusapwila ku Nzubo ku Nzubo: Pa myaka yavula, basapwishi batendekelapo kwingilako busapwishi bwa ku nzubo ku nzubo. Byo kiji kuba’mba bantu bavula bengila mu kimye kya mute, nanchi mwakonsha kwingilako busapwishi bwa ku nzubo ku nzubo mu kimye kya mabanga, bantu bavula kyo bekala pa mazubo na kukokoloka nyi? Kimye kya mute, mwakonsha kwingilako busapwishi bwa mu mukwakwa nangwa mu mapunzha a busulu kabiji mwakonsha kufuma byawama.
Busapwishi bwa ku Mvula Bantu: Mwafwainwa kubika matebulu ne bya kutulapo mabuku mu mikwakwa iji mu nyaunda ya kipwilo mupita bantu bavula. (Monai Mwingilo Wetu wa Bufumu wa September 2013, ji. 2.) Inge bantu bavula baleka kupitamo mu yoyo mikwakwa mo mubila busapwishi bwa ku mvula bantu, Kavoto ka Mwingilo mu Kipwilo kakonsha kufuukulapo kutwala kya kutulapo mabuku ku mpunzha kubena kupita bantu bavula.
Kubwelamo ne Mafunjisho a Baibolo: Nanchi mwakonsha kubwelamo ku bantu bo mwalayañene nabo ne ku mafunjisho a Baibolo kimye kyo mubula kwingila mbaji ikwabo ya mwingilo nyi? Kya kumwenako, inge mutaana bantu bavula pa Kibelushi lukelo mu mwingilo wa ku nzubo ku nzubo, nanchi mwakonsha kuya ku mafunjisho a Baibolo mute nangwa mabanga nyi?
Nangwa kya kuba tubala kimye inge twaya mu mwingilo, bino lusekelo lwetu lubaya inge ke mufume byawama. Inge mwamona amba mu mbaji imo ya mwingilo kechi mubena kufuma byawama pa kyokyo kimye ne, esekaiko mbaji ikwabo. Lombai lutangijilo kwi Yehoba “Mwine mwina mwingilo wa kunowa” pa kuba’mba mwingijishe kimye kyenu bulongo mu mwingilo!—Mat. 9:38.