Nanchi Mwakonsha Kupimpulako Mutanchi Wenu Nyi?

1. Mambo ka o twafwainwa kupimpula mutanchi wetu wa kusapwila?

¹ Byo tuji bena Kilishitu, twaswa lwito lwa “kukwata bantu.” (Mat. 4:19) Byonka biji bantu bakwata masabi, tukengilanga bulongo mu mwingilo wa kukwata bantu inge twatanchika kimye kya kusapwila, kimye bantu kyo batanwa pa mazubo. Mabanga bantu bavula batanwa pa mazubo. Javula bekalatu pa nzubo na kukokoloka kabiji bakonsha ne kutambwila benyi. Nanchi mwakonsha kupimpulako mutanchi wenu pa kuba’mba musapwilengako pa kyokyo kimye nyi?—1 Ko. 9:⁠23.

2. Mashinda ka amo o twakonsha kwingijisha kusapwila bantu bavula mambo awama?

² Kusapwila Mabanga: Kwinengezhezha jimo kusapwila kimye kya mabanga kwakonsha kwitukwasha kusapwila bantu bavula mambo awama. (Mana. 21:5) Bakyanyike bakonsha kusapwilako panyuma ya kukotoka ku sukulu. Bakwabo nabo bakonsha kwingilako panyuma ya kukotoka ku nkito. Mafunjisho a buku amo akonsha kubikako lunengezho lwa kusapwila awala umo saka bakyangye kutendeka lufunjisho lwa mulungu ne mulungu.

3. Mu mashinda ka o mwakonsha kusapwilamo mabanga mu nyaunda yenu?

³ Kusapwila ku nzubo ne nzubo mabanga kwakonsha kwitukwasha kwisamba na bantu babula kutanwatanwa pa nzubo. Mu manyaunda avula, mwingilo wa mu mikwakwa ne kusapwila ku mvula bantu wakonsha kubiwa bulongo mabanga. Bavula bekitana kuba’mba kimye kya mabanga kyawama bingi kubwelako ne kutendeka mafunjisho a Baibolo.

4. Mambo ka o kyanemena kwikala na milangwe ne kulangulukilako bantu kimye kya kwingilako mwingilo wa kusapwila mabanga?

⁴ Kupima Bintu Kukebewa: Kupima bintu bulongo kukebewa pa kwingila mwingilo wa kusapwila mabanga. Javula kiwama bingi kusapwilatu mabanga, mu kifulo kya kusapwila kimye bena nzubo kyo babena kukeba kuya na kulaala. (Fili. 4:5) Umvwe mwakonkosha ku kinzhilo, mwafwainwa kwimana po bakonsha kwimumona, kabiji ne kwilumbulwila bulongo. Bukiji bukiji babulai ene mambo o mwaishila. Umvwe mwafikila pa kimye kyatama, kampe babena kuja, babulai amba musakwiyako kimye kikwabo. Kimye kyonse saka mulangulukilangako bena nzubo.—Mat. 7:12.

5. Twakonsha kuchinuzhuka byepi bizumba kimye kyo tubena kusapwila mabanga?

⁵ Twafwainwa ne kuyuka bizumba byakonsha kufumamo. Inge mubena kusapwila mabanga nangwa panyuma ya kuba juba japona kala, kyawama bingi kwenda babiji nangwa mu mabumba. Endainga mu kyeya mwa kuba saka mwendela pamo na bakwenu. Sapwilaingatu mu mapunzha mo mwamona kuba’mba muji bukikizhi. Chinuzhukainga mapunzha atama kwendamo bufuku.—Mana. 22:3.

6. Mfweto ka ikwabo yakonsha kufumamo mu kusapwila mabanga?

⁶ Kusapwila mabanga kwakonsha kwitupa jishuko ja kwingilako mu mwingilo na bapainiya ba kukwasha ne ba kimye kyonse. (Loma 1:12) Nanchi mwakonsha kupimpulako mutanchi wenu pa kuba’mba mwingileko mu luno lubaji nyi?