Nanchi Mwakonsha Kusapwila Kimye kya Mabanga Nyi?
1. Kwesekana na byaambile shayuka umo, kimye ka mutumwa Paulo kyo asapwilanga ku nzubo ku nzubo?
1 Kwesekana na buku wa Daily Life in Bible Times, mutumwa Paulo wasapwilanga ku nzubo ku nzubo “kutendeka na kimye kya 16 koloko kufika ne bufuku.” Kechi twayuka kana uno ye wajinga mutanchi wanji yealondelanga ne, pano bino twayuka kuba’mba Paulo wakebeshanga ‘kuba bintu byonse na mambo a mambo awama.’ (1 Ko. 9:19-23) Kuba bino kwavwangilemo kusapwila ku nzubo ku nzubo pa kuba’mba esambenga na bantu bavula.
2. Mambo ka kimye kya mabanga kyo kyawamina kusapwila?
2 Basapwishi mu mapunzha avula basapwila kimye kya lukelo mukachi ka mulungu. Nga anweba, nanchi kino kimye kijitu bulongo mu nyaunda yenu nyi? Painiya umo waambile biji nyaunda yanji amba: “Kyakatazha bingi kutana bantu pa nzubo kimye kya mute. Pano bino, bantu bavula batemwa kutanwa pa mazubo kimye kya mabanga.” Kusapwila kimye kya mabanga kwawama bingi, mambo mwakonsha kutana banabalume pa mazubo ne kwibasapwila mambo awama. Bena nzubo baswa kwisamba nabo mambo kechi bekala na bya kuba byavula ne. Umvwe kino kyafwainwa kwingila bulongo ku mpunzha yenu, bakulumpe mu kipwilo bakonsha kunengezha kuyanga mu mwingilo mabanga.
3. Twakonsha kumwesha byepi amba tuji na milangwe kimye kyo tubena kusapwila mabanga?
3 Kwingijisha Milangwe: Kyanema bingi kulangulukapo bulongo kimye kyo mubena kusapwila mabanga. Kyakumwenako, umvwe kya kuba mwatana mwina nzubo wapayankana pa kimye kyo mwamufwakesha, nabiji kimye kya kuja kajo ka mulajilo, kyawama ku kabwelako kimye kikwabo. Umvwe pafiita, mwafwainwa kwimena kwatoka pa kuba’mba bena nzubo bemumone. Itongolai jizhina jenu ne kwibabula kyo mwaendela. Kyanema bingi kwingila babiji babiji nangwa bavula, babiji umvwe baya pa nzubo bakwabo bashala na kupembelela. Ne ene mambo a kubila bino ke kukeba kwizhikijila. Kechi mwafwainwa kuya na kusapwila kimye kilajilapo bantu ne. (2 Ko. 6:3) Umvwe wakinkalankulo umvwa moyo inge bwaila, mwakonsha kumusapwila saka pa kitoka.—Mana 22:3.
4. Mapesho ka afumamo mu kusapwila mabanga?
4 Mapesho: Twikala bingi na lusekelo umvwe twasapwila bantu babula kutanwa pa nzubo. Kabiji umvwe twaikala na kimye kyabaya kya kusapwila tukakwasha bantu ‘kukapuluka ne kuyukisha bulongo bukine.’ (1 Timo. 2:3, 4) Nanchi mwakonsha kupimpulako mutanchi wenu pa kuba’mba musapwilengako mabanga nyi?