Kwipuzhamo Bantu Bafwainwa
1 Kimo kimye, kyakonsha kwitushupa bingi kulondela mikambizho ya kwa Yesu ya byo twafwainwa kwingila mwingilo wa kusapwila. Waambile’mba: “Mu mizhi yonse yo mukatwelamo, nangwa mukatampe nangwa muchuchu, ipuzhaimo muntu wafwainwa.” (Mat. 10:11) Twakonsha kwingila byepi bulongo uno mwingilo wa kwipuzhamo bantu bafwainwa byo kiji kuba’mba bantu bavula lelo jino kechi batanwa javula pa mazubo abo ne?
2 Talatalai Bulongo Nyaunda Yenu: Patanshi mwafwainwa kutalatala bulongo nyaunda yenu. Kimye ka bantu kyo batemwa kutanwa pa mazubo? Bakonsha kutanyiwa kwepi na kimye kya mute? Abya kujipo juba jimo mukachi ka mulungu nangwa kimye kyo bakonsha kwikala na kizaku kya kukeba kuteleka umvwe mwibafwakesha nyi? Kupimpula ñiñijilo yenu kuba’mba iswañane na mutanchi ne bwikalo bwa bantu baji mu nyaunda yenu, kwakonsha kwimukwasha kwingila bingi bulongo.—1 Ko. 9:23, 26.
3 Basapwishi bavula batana’mba bantu bavula batanyiwa pa mazubo abo kimye kya mabanga. Pa kino kimye kya mabanga, bena mazubo bamo kyo kimye kyo bakokela ne kukeba kuteleka ku mwisambo. Kwingijila mu nyaunda ya busulu ne mu mapunzha avula bantu nao ke mashinda amo a kumwenamo bantu ne kwibasapwila mambo awama.
4 Mukachi ka ñondo umo wa kwingijilamo mwingilo wiikajila, kipwilo kimo kyanengezhezhe kusapwilanga pa Kibelushi ne pa Mulungu na kimye kya mute, kabiji pa Kisatu ne pa Kitanu na kimye kya mabanga. Kabiji banengezhezhe ne busapwishi bwa kusapwilanga kwingijisha lamya ne kwingijila mu nyaunda ya busulu. Luno lunengezho lwalengejile bantu kwikala na kizaku kikatampe kya kwingila mwingilo, kya kuba’mba kipwilo kyafuukwilepo mulanguluko wa kutwajijila na luno lunengezho.
5 Bwelaiko Pa Kimye Kyafwainwa: Umvwe kimye kyo mwabwela jibiji mu nyaunda yenu mwakankalwa kutana bantu pa mazubo, juba jitanshi jo mwamonañana na muntu ne mobatu akwabo o mumonañananga na kwisamba, mwafwainwa kumulayanga juba jikwabo jo mukabwelako. Kabiji monai kuba’mba kine mwabwelako. (Mat. 5:37) Umvwe kyakonsheka, mwakonsha kunemba nambala ya lamya ya mwina nzubo. Kino kyakonsha ne kwimukwasha kwamba na uno muntu jibiji.
6 Kwibikishako kwetu kwa kwipuzhamo bantu bafwainwa ne kubwelako na kukosesha bantu bamwesheshe lusekelo, kine kukalengela Yehoba kwitupesha.—Mana. 21:5.