Bya Kusapwila mu Nyaunda ya Busulu
1. Buwame ka buji mu kusapwila mu manyaunda a busulu?
1 Nanchi mwakonsha kutemwa kusapwila mu nyaunda mo batambwila benyi kabiji mo mwakonsha kutana bantu javula nyi? Mu nyaunda yenu ya kipwilo mwakonsha kwikalapo mapunzha amo aji bino. Mu ñanyi jishinda? Kupichila mu kufwakesha mashitolo ajimo. Basapwishi basapwila mu mashitolo batana bingi buwame.
2. Mwingilo wa kusapwila mu mapunzha a busulu wakonsha kunengezhiwa byepi?
2 Bipwilo bimo byapewa kwingijila mu manyaunda a busulu. Mulongo wingila mwingilo wa kumona nyaunda yonse ya kipwilo wakonsha kunengezha ma Territory Map Cards (S-12) a ano mapunzha mwavula busulu. Bipepala panembwa ma mapu a nyaunda mwikala bantu kuvwangako ne nyaunda ya busulu pafwainwa kunembwa’mba ano mapunzha a busulu kechi afwainwa kwingijiwamo byonka bingijiwa mu mapunzha mwikala bantu ne. Mu manyaunda akwabo, mapunzha a busulu akonsha kwingijiwamo pa kimye kimotu kibena kwingijiwa mu mapunzha mwikala bantu. Umvwe mukyangye kusapwilako mu mpunzha ya busulu, tendekelai kusapwila mu mashitolo acheache.
3. Ki ka kyakonsha kwitukwasha kwingila bulongo umvwe ke tusapwile mu mashitolo?
3 Ingijishai Jishinda Japela: Umvwe mubena kusapwila mu mashitolo, kyanema bingi kuvwala byonkatu byo muvwala ku kupwila pa Nzubo ya Bufumu. Kabiji kyawama kuya mu shitolo kimye kyo mwamona’mba kechi mubena kuselakena bantu ne. Umvwe kyakonsheka, twelaimo umvwe mwamona’mba kafwamo bantu babena kupembelela kupota bintu. Ipuzhai kuba’mba mwisambe na mukulumpe wa nkito nangwa muntu ubena kupotesha. Ipipishai mwisambo ne kwamba bishinka. Mwakonsha kwamba’mba ka?
4-6. Twakonsha kwamba’mba ka umvwe tubena kusapwila ku muntu upotesha mu shitolo nangwa mukulumpe wa nkito?
4 Umvwe mubena kwisamba na mukulumpe wa nkito, mwakonsha kwamba byambo nabiji amba: “Bantu boba busulu bapayankana bingi na nkito kya kuba’mba kechi javula jo twibatana pa mazubo ne, o ene mambo o twimwendela kuno ko mwingijila. Magazini etu amba bingi pa bintu byubiwa ano moba mwaya ntanda yonse.” Apa bino mwaambapo kishinka kimo kipi kufuma mu magazini.
5 Nangwa mwakonsha kwingijisha jino jishinda japela amba: “Bantu bavula bakeba bingi kuyuka byavula pa mambo a Baibolo, bino kimye kibakepela. Ino talakiti yalondolola lunengezho lwa kufunda kwa kubula kulipila lubiwa kwimukwasha kutana mikumbu ku mepuzho enu a mu Baibolo.” Apa bino mwatongola mapeja 4-5 aji mu talakiti wa Nanchi Mukeba Kuyuka Byavula pa Mambo a Baibolo Nyi?
6 Umvwe awo muntu wamwekana kupayankana, mwakonsha kumushilatu talakiti ne kwamba’mba: “Nkeya jibiji kimye kikwabo kyo mukakepelwa mingilo. Nkakeba bingi kuyuka byo mukalangulukapo pa ino talakiti.”
7. Twakonsha kukwasha byepi bantu botwatana mu nyaunda ya busulu kuba’mba batwajijile kubaisha lusekelo lwabo?
7 Kubaisha Lusekelo lwa Bantu: Mwakonsha ne kufunjisha lufunjisho lwa Baibolo mu nyaunda ya busulu. Painiya wiikajila watwalanga magazini kimye kyonse ku mupoteshi. Uno mwanamulume byo amwesheshe lusekelo mu byo atangilenga, painiya wamubujile lunengezho lujiko lwa kufunda Baibolo kwingijisha buloshuwa wa Nanchi Lesa Ukebaka. Lufunjisho lwanengezhewe kutendeka ponkapotu kumufunjishilanga pa nkito ponka po engijila. Na mambo a kumona bintu byo byajinga, painiya wisambilengatu nanji mu maminiti 10 nangwa 15. Twayai ne atweba tutwajijile na kukeba bantu batongwelwa jimo kupichila mu kusapwila mu nyaunda ya busulu.