Nanchi Muji na Nyaunda ya Kyenu Kyenu Nyi?
1 Nyaunda ya kyenu kyenu ke yoya yo bemupa kwingijilangamo. Yakonsha kwikela kwafwainwa pa kuba’mba kimupelela kufikako bukiji bukiji kabiji ne kusapwila kampe bunke bwenu nangwa na mukwenu musapwishi. Nangwa kya kuba kyanema bingi kutundaika lunengezho lwa kipwilo lwa busapwishi bwa bujibumba umvwe kyakonsheka, kwikala na nyaunda ya kyenu kyenu ya kwingijilamo pa bimye bikwabo kwakonsha kwimukwasha kusapwila bulongo, kikatakata mu bipwilo biji na nyaunda ikatampe.—Byubilo 10:42.
2 Byawama Bifumamo: Bamo bamwenamo bintu bikwabo byawama mu kusapwila mu nyaunda ya kyabo kyabo ku bwipi na ko bengijila kimye kya pachaile nangwa panyumatu ya kukotoka ku nkito. Bakwabo nabo batanamo lusekelo mu kwingijila pamo na kisemi ku bantu bo bekala nabo kinkalankulo pa awala umo nangwa kukilapo saka bakyangye kuya ku Lufunjisho lwa Buku lwa Kipwilo. Kyafumamo, kubwelako ne mafunjisho a Baibolo atainwe ajinga ku bwipi na ko bekela, kabiji kino kyalengela kwingijisha bulongo ngovu, ne kimye, kabiji ne kwingijisha bulongo mali. Na mambo a kuba byavula byakonsha kubiwa mu kimyetu kicheche, kwikala na nyaunda ya kyenu kyenu kwakonsha kwimukwasha kwingilako bupainiya bwa kukwasha pa kimye pa kimye nangwatu kunembeshako bupainiya bwa kimye kyonse. Kunungapo, kwingijila mu nyaunda ya kyetu kyetu kabiji ne kwipwiluluka na bena mazubo kwakonsha kwibalengela kwituketekela kabiji ne atweba kupimpula misambo yetu kwesekana na byo babena kukeba, kabiji kino kilengela mwingilo wetu kwingijiwa bulongo.
3 Painiya wamukazhi ye batundaikile ku mukulumpe wa kijiiji kutambula nyaunda ya kyanji kyanji, waambile’mba: “Naumvwijile bino byo bambujile kabiji ponkapotu nayukanyikilwe ne kulenga bulunda na bena mazubo mu nyaunda yami. Napimpwile kimye kya kwibafwakeshamo ne kutatula kwibafwakesha pa kimye kyafwainwa. Kyafuminemo ke kya kuba’mba, bantu ba kuya na kumona bavujijileko kufuma pa 35 kufika ku 80 mu ñondo umo, kabiji nji ne na mafunjisho a Baibolo a pa nzubo atanu na abiji.”
4 Bya Kutambula Nyaunda ya Kyenu Kyenu: Inge mukeba kutambula nyaunda ya kyenu kyenu, isambai na kalume utala pa nyaunda. Kasulukai kwitapo musapwishi mukwabo wa kwingila nanji, kabiji ne kusunga po mwanemba mazubo po mwabula kutana bantu. Mwafwainwa kweseka kupwisha kwingijila mu nyaunda mu bañondotu bana. Inge mwatana lukatazho mu kuba kino, mwakonsha kwipuzha mukulumpe wa Lufunjisho lwa Buku lwa Kipwilo nangwa bakwenu kuba’mba bemukwashe. Ku mpelo ya bañondo bana, mwakonsha kubwezha nyaunda yo mwapwisha kwingijilamo nangwa mwakonsha kwipuzha kuba’mba mukengijilemo ne jikwabo. Nangwa byonkabyo, kechi mwafwainwa kwingijilanga mu nyaunda imotu myaka yonse ne, bino mwafwainwa kwiibwezha kuba’mba bakwabo nabo bakengijilemo. Inge muji mu kipwilo muji nyaunda yakepa kabiji kechi kyapela kutambula nyaunda ya kyenu kyenu ne, kampe mwakonsha kwipuzha mukulumpe wa lufunjisho lwa buku kwimupako lubaji lumo lwa nyaunda.
5 Mwingilo wetu wa kusapwila “panopantanda ponse” ke mwingilo wakatazha bingi. (Mat. 24:14) Kikebewa kukwatankana bingi bulongo. Kunungapo pa busapwishi bwa bujibumba, kusapwila mu nyaunda ya kyetu kyetu kwakonsha kwitukwasha kusapwila mambo awama ku bantu bavula.
[Mepuzho a Lufunjisho]
1. Nga nyaunda ya kyenu kyenu yo ika?
2. Byawama ka biji mu kwikala na nyaunda ya kyenu kyenu?
3. Ki ka kyafuminemo mwi painiya umo watambwile nyaunda ya kyanji kyanji?
4. Mwakonsha kutambula byepi nyaunda ya kyenu kyenu kabiji ne kwingijilamo?
5. Ki ka kikebewa pa kuba’mba tufikizhe mwingilo wetu wa kusapwila?