Umvwe Mwabula Kutana Bantu pa Nzubo
1. Lukatazho ka lutanyiwa javula pa kwingila mwingilo wa ku nzubo ne nzubo?
1 Mu mapunzha avula kibena kushupa bingi kutana bantu pa mazubo abo. Mu bino “bimye byakatazha,” bavula kibena kwibalengela kwingila kimye kyabaya bingi pa kubatu’mba bamone mwa kwikwashisha. (2 Timo. 3:1) Bamo bafumapo kuya na kupota bintu mu mashitolo nangwa kuyatu na kukaya. Twakonsha kwibatana byepi bantu ba uno mutundu ne kwibasapwila mambo awama?
2. Twakonsha kumona byepi amba twabwelako ku mazubo ko twabujile kutana bantu?
2 Nembai Bulongo Byonse Bibena Kukebewa: Kintu kitanshi kya kuba ke kunemba mazubo po mwabula kutana bantu. Kuba kino kwanema bingi kikatakata umvwe mwingijila mu nyaunda yenu bimye byavula. Nanchi munembapo jizhina ja mukwakwa, nambala ya nyaunda, jizhina jenu ne juba nyi? Mwakonsha kusha pa kunembela byambo bikwabo umvwe anwe bene nangwa musapwishi mukwabo wabwelako ku mazubo ko mwabujile kutana bantu. Pa kupwisha kusapwila, vulukai kupana kapepala nangwa byambo byo mwanemba ku muntu mwina nyaunda kanatu umvwe kya kuba wimwitabizha kubwelako ku mazubo ko mwabujile kutana bantu. Nembai pa kapepala kangi bantu bamwesha lusekelo bo mwataine bo mukeba’mba mukabweleko.
3. Mashinda ka amo o twakonsha kwisambilamo na boba babula kutanwa pa mazubo?
3 Esekai pa Kimye Kikwabo: Kampe bamo bo mwabujile kutana pa mazubo mukachi ka mulungu bakonsha kutanyiwa mu bimye bya mabanga nangwa ku mpelo ya milungu. Nanchi mwakonsha kulenga mutanchi wenu kuba’mba mukabweleko pa kimye pafwainwa nyi? (1 Ko. 10:24) Umvwe ne, mwakonsha kupana kapepala po mwanemba mazubo o mwabujile kutanapo bantu ku musapwishi wakonsha kubwelako pa kimye kikwabo. Mu jishinda jikwabo, mwakonsha kunembela boba bo mwabujile kutana pa mazubo nangwa kweseka kwisamba nabo pa lamya. Aba basapwishi bakankalwa kwingila bulongo mu mwingilo wa ku nzubo ne nzubo na mambo a kubelabela, bakonsha kutemwa bingi kwimukwasha kuba kino.
4. Kyamwekele ka kimwesha buneme bwa kubwelako ku mazubo kubula kutanwa bantu?
4 Kyamwekele kimo kimwesha buneme bwa kweseka kwisamba na boba babula kutanwa pa mazubo. Basapwishi byo batwajijile na kubwelako ku nzubo imo pa myaka isatu kwa kubula kumutanapo mwina nzubo, kyapeleleko bamutainepo. Kyatanyiwe kuba’mba pa ino myaka yonse wakebeshenga bingi Bakamonyi kuba’mba atendeke jikwabo lufunjisho lwa Baibolo lo afunjilenga saka akyangye kuvilukila ku yoya mpunzha.
5. Nyaunda yakonsha kuyukanyikwa byepi amba yaingijiwa yonse?
5 Pwishai Kwingijila mu Nyaunda Yenu: Nyaunda yakonsha kuyukanyikwa byepi amba yaingijiwa yonse? Iyukanyikwa umvwe kya kuba ubena kwingijilamo waingila na ngovu kwambapo na muntu umo pa nzubo ne nzubo. Kyakonsha kuwama kusha talakiti nangwa magazini wa kala pa mazubo pabula kutanwa bantu kwa kubula kwimumona ku bantu babena kupita kikatakata mu manyaunda mo tubula kwingijila javula. Mwafwainwa kupwisha kwingijila mu nyaunda mu bañondotu bana. Umvwe mwapwisha, utala pa nyaunda ukapitulukamo kuba’mba anembe pa mapepala anji bibena kukebewa.
6. Mambo ka o twafwainwa kusapwila bantu bonse baji mu nyaunda yetu mambo awama?
6 Tukeba bantu bavula kwikala na jishuko ja kwita pa jizhina ja Yehoba ne kupuluka. (Loma 10:13, 14) Kino kyavwangamo ne boba bo tubula kutana pa mazubo kimye kyo twingila mwingilo wa ku nzubo ne nzubo. Byonka byajinga mutumwa Paulo, ibikilai kikonkwanyi kya “kusapwila [bulongotu] mambo awama a bupe bwa Lesa.”—Byubilo 20:24.