Nanchi Kipwilo Kyenu Kiji na Nyaunda Yabayanyi?

¹ Kala kutatwilatu mumataunyi amu Yudea shoo nemumizhi yamu Ngalilea, Yesu wasapwijilenga monse mwaya nyaunda yabena Isalela. (Mako 1:38, 39 Luka 23:5) Neatweba twafwainwa kwisamba mambo awama nabantu bavula. (Mako 13:10) Nangwa byonkabyo, uno kemwingilo wakosa bingi. Mamboka?

² Bipwilo byavula mu Zambia byaikela mumapunzha amumizhi abaya bingi. Basapwishi bamba milaka yamubyalo bingi bakonsha kwingijilanga mumapunzha muji bantu bavula, nakusapwila ku bantu bamba mulaka wabo. Twakonsha kuba byepi pakuba’mba tukwashe bantu bekala mumanyaunda abaya kuba’mba bafunde bukine bwa Yehoba, Yesu, ne Bufumu?

³ Tanchikai Bulongo: Mukulumpe utangijila mwingilo wamubujimi nemulongo utala panyaunda bafwainwa kutangijila kipwilo kuba’mba kingile bulongo mingilo yawama. Mwakonsha kutanchikapo Bibelushi bimo mambo bavula popobekalako nakimye kyobakonsha kusapwilako juba jonse. Umvwe kemwingijile mumanyaunda aji mwalepalepa, tanchikai kuba’mba mukengileko kimye kyabaya mumwingilo wamubujimi umvwe kyakonsheka, samwasendela nejimo kajo kakuja kimye kyapachaile. Mwafwainwa kwendeshako kwikala nakupwila kwakwinengezha kuya mumwingilo kukila kimye kyomupwijilamo kimye kyonse pakuba’mba mushaleko nakimye kyakunyakasa kuya kuyoyo nyaunda, nangwa mwakonsha kukapwijila kwipi nanyaunda yomu sakusapwilamo. Bikai bantu mutumabumba tuchetuche pakuba’mba bonse bekaleko namazubo akusapwilako. Nengezhainga kuya nakusapwila mumanyaunda amumizhi mwalepa saka kubena kukya bulongo nemikwakwa sayakiwama.

⁴ Aba babena kuya nakusapwila bantu bamba milaka ingi bakonsha kubula kutaya kimye kyakusapwilamo umvwe baikela jimo namutanchi wamazhina, makeyala nekuyukilapo jimo pobabena kuya. Nembai manyaunda kuba’mba jibumba jimo jamwingilo jifike pabonse bena oo makeyala amuyoyo mpunzha.

⁵ Monai’mba mwasenda mabuku avula. Umvwe nyaunda kechi musapwilamo javulane, kyawama kusha talakiti nangwa magazini yakala pamazubo onse pomwabula kutana bantu. Tambikai talakiti ya Nanchi Mukeba Kuyuka Byavula pa Mambo a Baibolo Nyi? kubonse bomubena kusambakana kabiji mushenga imo pamazubo pomwabula kutana bantu.

⁶ Kwatankanai: Kwingijila munyaunda yabaya kukebewa bonse baji mukipwilo kukwatankana. Umvwe mwaingijisha motoka, bonse baya nayoyo motoka bafwainwa kupanako mali akebewa. Kikebewa kulangulukapo bulongo umvwe mwatana bena mazubo babena kukeba kwisamba nenu. Kimye kyonse monai kuba’mba pabonse mumanyaunda mwafikapo, kabiji vulukai kubwela kuboba babena kupembelela bomwalaile umvwe kimye kyakubwelako kyafika. Umvwe mukeba kutwajijila kwisamba pakimye kyabaya namuntu ubena kukeba kufunda bukine, nanchi kuba mwalayañana nanji bulongo’mba mukamonañane kimye kingi kuchina kukelwesha bakwenu nenyi?

⁷ Tanchikai bulongo kuba’mba mukabweleko nakumona boba bamwesheshe lusekelo lwakukeba kufunda bukine. Umvwe mikwakwa iji kuyoyo mpunzha kechi iji namazhina nangwa mazubo kechi aji namanambalane, monai’mba mwanemba mapu nangwa nembai byakwenda pakuba’mba mukeye jibiji nakutana yewo muntu ubena kukeba kufunda bukine kimye kyomukabwelako.

⁸ Byotwashukwapo kumvwina mukambizho wakwa Yesu wakuba’mba: “Mu mizhi yonse yo mukatwelamo, nangwa mukatampe nangwa muchuchu, ipuzhaimo muntu wafwainwa”! (Mat. 10:11) Kwakubula nangwa kuzhinaukatune, Yehoba ukemupesha pakwibikishako kwenu byomwifuukwila kwipana anweba bene kwingila uno mwingilo ufwetañana!