Mukwekele Wiikajila Kutendeka pa October 16 kufika pa November 12!
1 “Mpelo ya Bupopweshi bwa Bubela iji Pepi!” Uno ye mutwe wa Mbila ya Bufumu Na. 37 kasampanyiwa ntanda yonse kutendeka ñondo wiya. Mu kichika kitanshi kya ñondo wa October tukashanga magazini a Kyamba kya Usopa ne Awake! Kutatulatu pa Kimo October 16, kukafika ne pa Mulungu November 12, tukevwanga mu mukwekele wa kusampanya Mbila ya Bufumu Na. 37. Kumpelo ya milungu mu uno mukwekele, tukashanga ino talakiti pamo na magazini akatataka.
2 Bañanyi Bakengilanga: Aba bonse babena kusapwila mambo awama bafwainwa kukengilako pakatampe mu uno mwingilo. Bamo bakakonsha kwingilako bupainiya bwa kukwasha. Abya mujipo na baana nangwa bomufunjisha Baibolo babena kukomenako ku mupashi nyi? Bakwashai bepuzhe bakulumpe mu kipwilo bebamone umvwe bakonsha kufikilamo kwikala basapwishi babula kubatizwa. Bakulumpe mu kipwilo bafwainwa kwisamba na basapwishi bakoka pa kuba’mba bebatundaike kwingilako, kampe, kupichila mu kwingijila pamo na basapwishi bafikapo.
3 Matalakiti a Mbila ya Bufumu Na. 37 akatumwa ku bipwilo byonse kuba’mba basapwishi bakatambule makope 24, kabiji ne bapainiya ba kimye kyonse bakakonshe kutambulako makope afika ku 48. Basapwishi ne bapainiya bonse bakanembenga kibelengelo kya matalakiti o bakashanga kabiji kino kibelengelo bafwainwa kwikinemba kunyuma ya sawakya wa mwingilo wabo kumpelo ya October ne November. Munembeshi ukavwanganga kibelengelo kya kipwilo kyonse pamo ne kwikituma ku ofweshi wa musampi ku mpelo ya ñondo yense. Makope onse a Mbila ya Bufumu Na. 37 akashalapo panyuma ya kupwisha uno mukwekele akonsha kwingijishiwa mu mbaji iji yonse ya mwingilo.
4 Bya Kwamba: Ambaitu byambo bicheche mambo kuba kino kukemukwasha kwamba na bantu bavula pa kusampanya mambo a bufumu. Mwakonsha kwambatu’mba: “Mbena kwingilako mwingilo ubena kwingijiwa ntanda yonse wa kusampanya ano mambo anema ku bantu. Kope yenu ye”. Mwane mwiitange. Kyakonsha kuwama kubula kusenda kyola kya ma buku pa kuya ku bantu. Monai kuba’mba mwanemba mazhina a bantu bakamwesha lusekelo.
5 Bya Kupwisha Nyaunda Yenu: Mu Kifulo kya kusampanyatu Mbila ya Bufumu mu busapwishi bwa mu mikwakwa, teshai muchima kusapwila ku nzubo ne nzubo ne mu nyaunda ya busulu. Nembai mazubo po mwabula kutana bantu, ne kweseka kubwelako kimye kikwabo nangwa juba jikwabo mu yewo mulungu. Kutendeka pa Kimo November 6, mwakonsha kusha kope pa mazubo po mwabula kutana bantu. Pano bino umvwe kipwilo kiji na nyaunda ikatampe yo kyakonsha kubula kupwisha mu kino kimye kyapanwa, bakulumpe mu kipwilo bakonsha kufuukulapo’mba Mbila ya Bufumu ishiwenga pa mazubo pabula kutanwa bantu kimye kya uno mukwekele yense.
6 Konaunwa kwa “Babilona Mukatampe” kwafwenya kala pepi. Bantu bafwainwa kufumamo mwi aye saka akyangye konaunwa. (Lum. 14:8; 18:8) Inengezhai lonka luno kuba’mba mukengileko pakatampe mu uno mukwekele wa ntanda yonse wa kuyukisha bantu bonse kuba’mba mpelo ya bupopweshi bwa bubela iji pepi!