Mukwekele Wiikajila wa Kusha Talakiti October 20–November 16!
1 Kutendeka pa Kimo, October 20 shoo ne milungu yonse ina, tukengilako mwingilo wiikajila wa kusha talakiti wa bukumo waamba’mba Nanchi Mukeba Kuyuka Bukine Nyi? Kyaketekelwa kuba’mba uno mukwekele wiikajila wa ntanda yonse ukalengela bantu kukebesha kuyuka bukine.—Yoano 17:17.
2 Ino talakiti yapana mikumbu ya mepuzho anema atanu na bumo: “Nanchi Lesa kine wituta muchima nyi?” “Nanchi makondo ne buyanji bikapwa nyi?” “Nanchi tutwajijila kwikala bomi umvwe twafwa nyi?” “Luketekelo ka lo tuji nalo pa mambo a bafu?” “Nakonsha kulomba byepi pa kuba’mba Yehoba omvwe milombelo yami?” ne “Nakonsha kutana byepi lusekelo mu bwikalo?” Machechi a Kilishitendomu akankalwa kupana mikumbu yafwainwa ya ano mepuzho. Nangwatu bantu bavula babula bena Kilishitu balangulukapo bingi pa bino bintu, bino kechi bakonsha kuyuka’mba mikumbu yaumvwanyika iji mu Baibolo ne. Onkao mambo, twaketekela kuba’mba ino talakiti bantu bavula bakeitemwa bingi.
3 Pwishai Nyaunda Yenu: Ibikishaiko kupwisha nyaunda yenu yonse yo musapwilamo ku nzubo ne nzubo. Umvwe muji na nyaunda ikatampe, bakulumpe mu kipwilo bakonsha kwimutundaika kusha talakiti pa nzubo po mwabula kutana bantu pa kimye kyonka kitanshi. Mwafwainwa kusha ino talakiti ku bakinkalankulo, ku balongo benu ba ku mubiji, bakwenu ku nkito nangwa bakwenu mo mufunjila sukulu ne bantutu bo mukelwa kwisamba nabo jonse. Kampe mwakonsha kunengezha bulongo mingilo yenu kuba’mba mukengileko bupainiya bwa kukwasha mu October nangwa mu November. Abya mujipo na mwana nangwa ye mufunjisha Baibolo ubena kukomenako ku mupashi wakonsha kufikilamo kwikala musapwishi wabula kubatizwa kuba’mba tukengile nanji mu uno mukwekele nyi? Umvwe po aji, bulai bakulumpe mu kipwilo.
4 Bya Kwamba: Ambaitu byambo bicheche, mambo kuba kino kukemukwasha kwamba na bantu bavula. Shikishaitu mwina nzubo mepuzho atanu na bumo aji pa nkupiko ne kumumwesha mukumbu mu talakiti. Kuba bino kukalengela basapwishi bonse kuyuka byo bafwainwa kupimpulako mwakwambila kwesakana na bantu baji mu nyaunda. Umvwe muntu wamwesha lusekelo, nengezhai kukabwelako. Kumpelo ya milungu mu uno mukwekele, tukashanga ino talakiti pamo na magazini a bukumo. Mukwekele byo akapwa pa November 16, tukashanga buku wa Baibolo Ufunjisha. Matalakiti akashalapo panyuma ya uno mukwekele akonsha kwingijishiwa byonkatu byo twingijisha matalakiti akwabo onse.
5 Tendekai Mafunjisho a Baibolo: Ino talakiti yanengezhiwa kikatakata kwitukwasha kutendekelamo mafunjisho a Baibolo. Kimye kyo mubena kubwelako ku bantu bamwesheshe lusekelo, mwakonsha kwibepuzha’mba, bukine ka bwa mu Baibolo bwimutekeneshe nangwa kwimukwasha? Mumweshai kunyuma ya peja kuji lunengezho lwa kufunda na bantu Baibolo, kabiji mupai buku wa Baibolo Ufunjisha. Umvwe kyakonsheka, isambai jifuka jimo nangwa abiji kufuma mu kitango muji mutwe ye asala.
6 Yehoba ubena kukeba bantu bakumupopwela na “mupashi ne na bukine.” (Yoa. 4:23) Twayai atweba bonse tukengileko mu uno mukwekele wa kukwasha bantu kuyuka bukine!