Ingijishai Matalakiti mu Kutatula Misambo
1 Abya kechi mwaswa kuba’mba kusapwila bulongo kukebewa anwe bene kutendeka mwisambo nenyi? Kikatazha ke byambo bya kutendekelapo kwamba abyo byakonsha kulengela muntu kwikala na kizaku kya kumvwa ne kwambapo. Ñanyi jishinda jo mwakonsha kutatwilamo mwisambo bulongo?
2 Basapwishi bavula batana kuba’mba kwambatu byambo bicheche, ne kutambika talakiti imo ya matalakiti etu alumbulula Baibolo kwakonsha kukwasha kutatula mwisambo. Mitwe yao ne bipikichala bijimo byawama bingi kabiji bikebula ne bantu. Matalakiti kechi alengela muntu kumvwa mukose’mba uji na bya kutanga byavujisha ne. Byambo bikala mu matalakiti byumvwanyika bingi bulongo kabiji mwakonsha kwibingijisha kutatula kufunjisha muntu Baibolo.
3 Umvwai byaambile Kamonyi umo: “Bantu bavula kechi bakeba kutaya kimye na kutanga ne, mambo a kukalakana na byabo. Bino matalakiti ajitu na byambo bicheche kabiji kechi byavujisha kya kuba bantu kebebichine kwibitanga ne. Amiwa natangilenga bingi matalakiti avula kabiji o ankwashishe ne kufunda bukine.” Kechi twafwainwa kusula bulume bwa Byambo bya Lesa bwalumbululwa mu bino byambo bicheche binembwamo ne.—Hebe. 4:12.
4 Mashinda Ana Apela: Bavula bengila bingi bulongo kimye bengijisha ino ntatwilo yapela. (1) Mweshai yewo muntu matalakiti acheche o muji nao ne kumushikisha yoatemwapo. (2) Byo asalapo imo, mushikishai jipuzho jo mwanengezha bulongo jibena kulumbulula kishinka kikatampe kiji mu yoyo talakiti. (3) Pa kukumbula jo jo jipuzho, tangai palagalafu muji yewo mukumbu nangwa kinembelo kiji mu talakiti. (4) Umvwe wamwesha lusekelo lwa kukeba kufunda, twajijilai kwisamba nanji biji mu talakiti nangwa kumumwesha lufunjisho mu buloshuwa wa Nanchi Lesa Ukebaka nangwa kitango kimo mu buku wa Kuyuka kibena kwamba pa byo mubena kwisambapo. Mu jino jishinda mwakonsha kutatula lufunjisho lwa Baibolo ponkapotu. Mashinda alondelapo akonsha kwimukwasha kunengezha mwakwambila kwingijisha matalakiti amo ana.
5 Mutwe wa talakiti ya “Nani mu Cituntulu Ateka Icalo?” wakonsha kwingijishiwa mu bujipuzho.
◼ Umvwe ye mubena kwisamba nanji wakumbula amba, “Lesa” nangwa’mba “Kechi nayuka ne,” tangai mikuku ya byambo itanshi ibiji pa peja 2 ne palagalafu itanshi pa peja 3. Ambai pa 1 Yoano 5:19 ne Lumwekesho 12:9. Umvwe awo muntu wazhinauka ne kukana’mba kafwako Satana Diabola nangwa waitaba kuba’mba ye ubena kulama ntanda, mwakonsha kutwajijila kwisamba pa ka mutwe ka kuba’mba “Icishibilo Ukufuma ku Mibele ya Calo.” Umvwe ukeba kuyukilapo ne bikwabo mulumbulwilai kwafumine Diabola, kwingijisha bishinka pa mapeja 3 ne 4 mu ino talakiti.
6 Talakiti ya “Ñanyi Luketekelo Lotuji Nalo ku Batemwe Betu Bafwa?” yakonsha kulengela muntu kukeba kumvwa. Mwakonsha kutatula mwisambo pa kushikisha amba:
◼ “Nanchi mwalangulukapo kala amba tukamonañanapo jibiji na batemwe betu bafwa nyi?” Pa nyuma yakukumbula, yai pa palagalafu ya bubiji pa peja 4 mu ino talakiti ne kutanga Yoano 5:28, 29. Apa bino mulumbulule kuba’mba itukwasha kumvwisha byambo, pa ka mutwe katanshi mu ino talakiti. Mubulai kuba’mba mwakonsha kwisambila nanji pamo.
7 Talakiti ya “Ipakishe Ubumi bwa Lupwa” yafwainwa bisemi byonse. Pa kwingijisha ino talakiti mwakonsha kwamba’mba:
◼ “Kampe ne nuwa mwaitaba kuba’mba bisemi biji bingi na makatazho. Nanchi mulangulukapo kika kyakonsha kubiwa pa kuba’mba bisemi bikale byakosa?” Pa nyuma ya kuba awo muntu wakumbula, mubulai bishinka biji mu palagalafu itanshi pa peja 6. Monaipo kinembelo kimo kiji pa mapeja 4 ne 5 mu ino talakiti, ne kulumbulula mo byatala. Kepo ne kutatula lufunjisho lwa Baibolo.
8 Talakiti ya “Ene Mambo Omwakonsha Kuketekala Baibolo” yakonsha kwingijishiwa mu ino ñambilo yalondelapo:
◼ “Bavula baumvwapo kala jashi ja kwa Kaina ne Abela, jiji mu buku mutanshi mu Baibolo. Buku wa Ntendekelo waambapo ne pa muka Kaina. Abya mwayuka koafumine nyi?” Ingijishai palagalafu yapelako pa peja 2 ya ino talakiti pa kuba’mba mukumbule. Lumbululai kuba’mba ino talakiti yaamba ne pa bintu byanema byatongola Baibolo bikamweka kulutwe na lwendo. Kutatula na palagalafu ya busatu pa peja 5, twajijilai na kwisamba, aku samwingijisha binembelo bijimo.
9 Kusampanya matalakiti alumbulula Baibolo ke jishinda jimo jaingila bulongo na kusapwilamo mambo awama pa kimye kyabaya. Mambo apela pa kwiasenda konse ko mubena kuya, mwakonsha kwiengijisha bulongo mu mwingilo wa ku nzubo ne nzubo ne mu busapwishi bwa kushukilwa. Matalakiti engila bingi bulongo mu mwingilo wetu. Kasa musendanga matalakiti apusana-pusana, ne kwiengijisha bulongo mu kutatula misambo.—Kolo. 4:17.