Mwingijishainga Kimye Kyonse
1. Talakiti wa Kuyuka Bukine wawama kumwingijisha pa kuba ka?
1 Talakiti wa Nanchi Mukeba Kuyuka Bukine Nyi? bamunengezha kwitukwasha kutendeka mafunjisho a Baibolo. Bino twakonsha ne kumwingijisha pa kukusa nkunwa ya bukine. (Sapwi. 11:6) Panshipo paji mashinda a bya kwingijisha bulongo uno talakiti.
2. Twakonsha kwingijisha byepi uno talakiti pa kutendeka mwisambo?
2 Pa Kutendeka Mwisambo: Mwakonsha kupa mwina nzubo talakiti ne kumumwesha mepuzho atanu na bumo aji pa nkupiko, apa bino mwamwipuzha’mba: “Ńanyi bwipuzho bomulangulukapo pa ano mepuzho?” Umvwe wakumbula, isambai nanji mukumbu wa mu Baibolo uji mu talakiti wa bwipuzho bo a kusala, ne kutanga kinembelo kijipo. Tangai ne kwambapo pa biji pa nkupiko ya talakiti, apa bino mwasha buku wa Baibolo Ufunjisha. Nangwa kya kuba wakana kutambula buku, kijitu bulongo mambo washalako na talakiti, naye wakonsha kulengela bukine kwikizha mizhazhi mu muchima wanji.—Mat. 13:23.
3. Inge mwina nzubo wapayankana, twakonsha kuba byepi?
3 Inge Mwina Nzubo Wapayankana: Mwakonsha kwamba’mba: “Ñanyi byo kiji kuba’mba muji na bya kuba byavula, nsakwimushila uno talakiti. Muji mepuzho atanu na bumo alangulukapo bantu bavula, ne mikumbu ya mu Baibolo ya ano mepuzho. Pa kwiyako jikwabo, nkakeba kuyuka byo musa kulangulukapo.”
4. Twakonsha kwamba’mba ka pa kusha talakiti kimye kyo tuji mu busapwishi bwa mu mukwakwa?
4 Kimye kyo Tuji mu Busapwishi bwa mu Mukwakwa: Mwakonsha kwamba’mba: “Nkimwipuzheko mwane, nanchi mwakishikishapo kala bwipuzho bumo pa ao nyi?” [Lekai akumbule.] Umvwe kechi wapayankana ne, mwakonsha kwisamba nanji mukumbu uji mu talakiti ne kumushila buku wa Baibolo Ufunjisha.
5. Twakonsha kwingijisha byepi uno talakiti umvwe pa nzubo bantu kafwapo?
5 Inge pa Nzubo Kafwapo Bantu: Mu manyaunda amo, basapwishi basha mabuku pa mazubo pabula bantu. Umvwe byobyo kiji mu nyaunda yenu, mambo ka a kubujila kusha talakiti wa Kuyuka Bukine? Pa kubwelako mwakonsha kwamba’mba: “Byo twaishile kechi twimutainepo ne, popo twashile talakiti pa kibelo. Ñanyi bwipuzho bo mwakonsha kutemwa kuyuka mukumbu?”
6. Mambo ka talakiti ya Kuyuka Bukine o yawamina pa kusapwila?
6 Talakiti wa Kuyuka Bukine waamba bukine mu byambo byapela kumvwa. Uzakula michima ya bantu ba mu bupopweshi ne bisho byapusana pusana. Nangwatu banyike ne basapwishi bakatataka kechi wakonsha kwibakatazha kushila bantu ne. Nanchi mubena kumwingijisha nyi?