Mashinda a Kwisambilamo

Bañanyi Bakonsha Kukumbula Mepuzho Anema a mu Bwikalo Bwetu?

Panai uno talakiti ku bena nzubo pa kuba’mba bamone mutwe wa talakiti, kabiji ambai amba; “Byepi mwane. Tuji na mukwekele wa kubulako bantu mu ntanda yonse pa ano mambo awama aji mu uno talakiti. Ne anweba mwakonsha kusendako uno talakiti.”

Inge mubena kukeba kusha uno talakiti pabula bantu, mushai pa mpunzha pa kuba’mba bantu bangi kechi bakonsha kumumona ne, kabiji kange mumuvungevunge pavula ne.

Inge bena nzubo bakeba kufunjilapo byavula nangwa kwambapo bimo, mwakonsha kwibepuzha byo balangulukapo pa bwipuzho bwina mutwe wa uno talakiti buji pa jipa jitanshi. Vungululai talakiti ne kutanga kinembelo kya Salamo 119:144, 160. Balumbulwilai amba uno talakiti ubena kwamba pa Keyala wakonsha kwibakwasha kutana mikumbu yanema ya mu Baibolo. Mwakonsha ne kwibamwesha vidyo wa mu Kizungu wa kuba’mba, “Why Study the Bible?” Saka mukyangye kuya, bamweshai ka mutwe ka kuba’mba: “Ñanyi bwipuzho pa ano bo mubena kukeba’mba bukumbulwe?” ne kwibambila kusalapo bwipuzho bumo pa mepuzho asatu ajipo. Babuulai amba mukabwela na kwibamwesha bya kutana mikumbu kwingijisha keyala wa jw.org. Byo mukabwelako, mukesambe mukumbu kupichila mu kuchinta panembwa’mba MAFUNJISHO A MU BAIBOLO > MEPUZHO AKUMBULWA MU BAIBOLO.

Inge mubena kusha tupepala twa lwito ku kushonkena kwa kijiji, bapai talakiti pamo na kapepala ka lwito ne kwamba’mba, “Kununga pa uno talakiti, tubena kwimwita kwiya na kutanwako ku kushonkena kwa kijiji.”

Kyamba kya Usopa August 1

Inge kyakonsheka, pa kusha Kyamba kya Usopa pa Kibelushi, mwakonsha kwamba’mba: “Mwane twimupako ne uno magazini wa Kyamba kya Usopa, ubena kukumbula bwipuzho bwa kuba’mba, Nanchi Lesa wimuta muchima nyi?”

Labainga! July-August

Inge kyakonsheka, pa kusha Labainga! pa Kibelushi, mwakonsha kwamba’mba: “Mwane twimupako ne uno magazini wa Labainga!, ubena kukumbula bwipuzho bwa kuba’mba, Mulunda Wawama Wafwainwa Kwikala Byepi?”