Tuji Nakyakwingijisha Kyakatataka Kyakutatwilamo Mafunjisho a Baibolo!
1 Mwanamukazhi umo mwina America wajinga mwina Loma Katolika waitabijile kyakine kine kabiji walaminenga mafunjisho abo nabukishinka. Kabiji wayanga nenakupopwela ku Vatican. Kamonyi wakwa Yehoba umo byoamusolomokele, waitabile kuba’mba bamufunjishenga Baibolo panzubo. Mamboka? Mambo wakebelenga kufunda byamba Baibolo mambo kuchechi koayanga kechi bamufunjishenga lufunjisho lwa Baibolo lwapanzubone. Kino kyamwekele kibena kwitufunjishapoka? Kibena kwitufunjisha kuba’mba kechi twayuka kana ñanyi wakonsha kuswa kufunda Baibolo ne.—Sapwi. 11:6.
2 Abya mwakikankazhamapo kala kubula bantu’mba tufunjisha muntu yense ukeba kufunda Baibolo nyi? Nanchi bonse mukimasa-masa kyenu bayuka kuba’mba twingila uno mwingilo pakubula mfwetonyi? Twakonsha kuba byepi pakuba’mba bayuke? Kupichila mukyakwingijisha kyakatataka! Ke talakiti yanengela yamapeja 6, ijinamutwe wakuba’mba Nanchi Mukeba Kuyuka Byavula pa Mambo a Baibolo Nyi? Twayai tupitulukemo muino talakiti, kulondela kamutwe kamo kamo.
3 “Mamboka a Kutangila Baibolo?” Bishinka byoilumbulula ino talakiti biji bingi bulongo. Ilumbulula kuba’mba Baibolo iji na “mizhilo ya Lesa,” imwesha byakumusolomoka mumilombelo kuba’mba emukwashe, nebyakutambwila bupe bwa bumi bwamyaka nemyaka. (1 Tesa. 2:13) Talakiti yatongola “bukine bupana maana,” buji mu Baibolo nabiji byubiwa inge twafwa ne ene mambo panopantanda kyopaikela makatazho. Ilumbulula “mafunde a Lesa ajimu Baibolo” kuba’mba umvwe ketwiengijishe etulengela kwikala bulongo nekwituletela lusekelo, luketekelo nebyubilotu bikwabo byawama. Talakiti yatongola nekishinka kikwabo kyotwafwainwa kutangila Baibolo—bungauzhi pamambo akimye kyakulutwe bwitumwesha bintu bikobiwa katataka.—Lum. 21:3, 4.
4 “Bukwasho Bwakwimukwasha Kumvwisha Baibolo”: Talakiti yaamba’mba: “Atweba bonse tukeba bukwasho pakuba’mba tumvwishe Mambo a Lesa.” Kepo yalumbulula nejishinda jakufunjilamo Baibolo amba: “Javula kyawama kufunda Baibolo pachepache, kutatwila ku mafunjisho atanshi.” Talakiti byoyaamba patokatu’mba “mu Baibolo momuji buno bukine,” yatongola mukushinkamika’mba buloshuwa wa Nanchi Lesa Ukebaka ukakwasha ubena kufunda “kumvwisha Binembelo pamitwe yapusana-pusana.” Kamutwe kalondelapo kaipuzha jipuzho jalutundaiko.
5 “Nanchi Mwakonsha Kwikalapo na Kimye kya Kufunda Baibolo Mulungu ne Mulungu nyi?” Talakiti yalumbulula’mba lufunjisho lwa Baibolo lwakonsha kubiwa pakimye nepampunzha pawamina ubena kufunda, nabiji pampunzha pazhindama nzoo, munzubo yayewo muntu nangwa pafoni. Bañanyi bomwakonsha kwikala nabo pa luno lufunjisho? Talakiti yakumbula’mba: “Bamukisemi kyenu bonse. Inge mukeba mwakonsha kwitako nebalunda nenu. Umvwe kechi mukeba ne, mwakonsha kwikalatu bunke pakwimufunjisha.” Lufunjisho lwakonsha kwikala lwamaawala anga? Yalumbulula’mba: “Bamo mulungu nemulungu basalululapo kimye kyakufunjilamo Baibolo. Umvwe mwakonsha kwikala na kimye kyabaya nangwa kicheche mulungu nemulungu, Bakamonyi bakatwajijila kwiya komuji na kwimukwasha.” Kino kyokishinka kikatampe! Twafwainwa kupimpula mutanchi wetu kwesakana nabwikalo bwayense ubena kufunda Baibolo.
6 “Lwito lwa Kwimwita’mba Mufunde”: Muji kakupashi pakonsha kunemba watambula talakiti umvwe ukeba buloshuwa wa Nanchi Lesa Ukebaka nangwa inge ukeba muntu umo akamufwakashishe nekumulumbulwila lufunjisho lwa Baibolo byolubiwa. Nkupo yabuloshuwa wa Nanchi Lesa Ukebaka yamweshiwa yonse byonka byoiji mumusombelo wayo. Abya nanchi kechi mwamona ino talakiti byoikatundaika bantu bamichima yakishinka kutambwila bukwasho nenyi? Pano, kino kyakwingijisha kyakatataka twakonsha kwikingijisha byepi bulongo?
7 Bañanyi Bomwakonsha Kutambika Talakiti? Ino talakiti mwakonsha kwiipana kubantu nangwa kwiisha pamazubo pomwabula kutana bantu. Mwakonsha kwiisampanya kunzubo nenzubo, mumukwakwa nemumanyaunda abusulu. Ipanaiko nekubantu baswa nangwa bakana kutambula mabuku etu. Ipachikai mumagazini nangwa mumabuku akwabo omusakwibashila. Umvwe mubena kunemba makalata tuminai pamo nayo. Aba bomubena kwisamba nabo pafoni babulai’mba mubena kukeba kwibatuminayo. Kasamusendanga ino talakiti kimye kyonse kyomubena kuya nakupota bintu mumashitolo, palwendo, nangwa mubusapwishi bwakushukilwa. Ipanai kumuntu yense wimufwakashisha. Itambikai kubalongo benu, bakwenu momwikela kipikipi, bomwingila nabo kunkito, bakwenu bomufunda nabo nebomwiyukatu nabo. Esekai nangovu kupana ino talakiti kubantu bonse bomubena kusambakana! Kika kikwabo?
8 Umvwe Bakeba Ponkapotu: Bantu bamo bakeba kwibafunjisha lufunjisho lwa Baibolo kimye kitanshi kyomwibafwakashisha. Onkao mambo, pakuya mumwingilo wamubujimi, monai kuba’mba mwasenda mabuloshuwa abiji a Nanchi Lesa Ukebaka—imo yaubena kukeba kufunda, imo yenu. Umvwe muntu ubena kukeba kufunda, tatulaiko ponkapotu. Zhikulai papeja 2 nekutanga kibaba kya “Byomwafwainwa Kwingijisha uno Buloshiwa.” Kepo muye mu Lufunjisho 1 nekumumwesha byakufunda. Nanchi kechi kyapelatu nenyi?
9 Umvwe Nteleki Wenu Ukeba Kimye Kyakuba’mba Alangulukepo: Saka pakyangye kupita kimye kikatampe, musolomokai jibiji. Pakuyako jibiji, monai kuba’mba muji nabuloshuwa wa Nanchi Lesa Ukebaka. Mumweshai bijimo papeja 2. Mulekai asalepo mutwe wamusekesha. Zhikulaipo, nekutatula kwisamba palolo lufunjisho loasala.
10 Kubwelako Komwashile Magazini: Umvwe mwashile talakiti pamo namagazini, pakubwelako mwakonsha kwamba bino amba: “Kimye kitanshi, nemushijile magazini wa Kyamba kya Usopa. Apo kampe mwamumwene mutwe yense wamagazini waamba kuba’mba Kyamba kya Usopa Kibena Kubijika Bufumu bwa Yehoba. Lelo nasaka namba nemulumbulwile buno Bufumu byobuji nebyobwalumbulula komuji nekisemi kyenu.” Kepo muzhikule palufunjisho 6 mubuloshuwa wa Nanchi Lesa Ukebaka. Kutatula napalagalafu mutanshi, tangai nekwisamba namwina nzubo kwesakana nakimye kyoaji nakyo. Kepo mumvwañane juba jakukabwelako nakupwisha lufunjisho.
11 Kange Mwikale Kwakubula Matalakitine: Mukulumpe utangijila mwingilo wamubujimi nebalongo batala pamabuku kimye kyonse bafwainwa kumona’mba matalakiti avula a Nanchi Mukeba Kuyuka Byavula pa Mambo a Baibolo Nyi? poaji pakipwilo. Bikai amo kupokochi nangwa mukikwama, mumotoka, komwingijila, kusukulu, pepi nakibelo pakulupukila munzubo—paji ponse pomwafwainwa kwiatana bukiji. Kabiji sendaiko amo mukyola kyamubusapwishi akwingijisha kimye kyomwatana muntu wakwisamba nanji pamambo a Baibolo.
12 Yehoba Apeshe Kwibikako Kwenu: Kikonkwanyi kyabena Kilishitu bonse kekyakufunjisha bantu bonse bukine. (Mat. 28:19, 20) Abya pakino kimye mubena kufunjisha lufunjisho lwa Baibolo lwapanzubonyi? Umvwe ibyo, nanchi mwakonsha kumonapo kimye kyakufunjisha nemukwabo mumutanchi wenu wamulungu nemulungunyi? Inge pakino kimye mufwaye wakufunjisha, twaketekela namba mukekalapo nawakufunjisha Baibolo. Lombai Yehoba kupesha kwibikako kwenu kwakutana muntu wakufunjisha. Apa bino mwingile monka mwayila yoyo milombelo.—1 Yoa. 5:14, 15.
13 Tuji nakyakwingijisha kyakatataka kyakutatwilamo mafunjisho! Kiyukai bulongo. Kisampanyai pakubula mfweto. Ingilai papelela ngovu yenu ‘kuba byawama, kwikala banonshi ba mu mingilo yawama, mwikale bampanyi ba kukwashañana’ byomwafunda pamambo a Byambo bya Lesa.—1 Timo. 6:18.
[Kitenguluzha pa peja 4]
BIMYE BYAKUSAMPANYINYAMO TALAKITI
◼ Mumisambo yajuba nejuba
◼ Umvwe muntu waswa kutambula buku wetu
◼ Pamazubo pomwabula kutana bantu
◼ Kimye kyotubwelako
◼ Umvwe twatana muntu mubusapwishi bwamumukwakwa
◼ Kimye kyotubena kusapwila munyaunda yabusulu
◼ Pakusapwila busapwishi bwakushukilwa
◼ Pakunemba makalata
◼ Kimye kyomuji mulwendo
◼ Umvwe muntu witufwakashisha
◼ Kimye kyotubena kwisamba nabalongo betu, bakwetu motwikela kipikipi, botwingila nabo kunkito, bakwetu bakusukulu nebotwiyukatu nabo