Ipuzhainga Bantu Umvwe Bakeba Kufunda Baibolo
1. Ki ka kyavwangwa mu kwingila mwingilo witupele Yesu wanembwa mu Mateo 28:19, 20?
1 Yesu witupele mwingilo wa ‘kusambisha bantu kwaluka ke baana ba bwanga . . . , ne kwibafunjisha.’ (Mat. 28:19, 20) Onkao mambo, kimye kyonse twafwainwa kwipuzhanga bantu umvwe bakeba kufunda, kechi pa jubatu kipwilo jo kyasala kutendekelamo mafunjisho a Baibolo jonka ne. Ano mashinda alondelapo akonsha kwimukwasha.
2. Bañanyi bo twakonsha kushikisha umvwe bakeba kufunda Baibolo?
2 Bepuzhai Umvwe Bakeba Kufunda Baibolo: Kushikisha bantu umvwe bakeba kufunda Baibolo, kuketulengela kwikala na jishuko ja kutanapo muntu wa kufunjisha Baibolo. (Sapwi. 11:6) Nanchi mwakyesekapo kwipuzha muntu umvwe ukeba kufunda Baibolo kimye kitanshitu kyo mwamutana nyi? Kipwilo kimo mu kyalo kya United States kyaesekele na ngovu mu ñondo yense kuba byonka bino. Batemenwe bingi byo batendekele kufunjisha bantu Baibolo bajinga 42! Kange mulangulukenga’mba bantu bamwesha lusekelo bo mutana bayuka’mba mukeba kwibafunjisha Baibolo ne. Umvwe mwabwelako kimye kikwabo, bashikishai umvwe bakeba kwibafunjisha. Inge bakana, kechi mambo ne. Mwakonsha kutwajijila kwibafwakesha kuba’mba lusekelo lwabo lutwajijile. Nanchi mwakipuzhapo ba kinkalankulo, bakilongo, bakwenu mo mwingijila ne mo mufunjila umvwe bakeba kufunda Baibolo nyi? Kabiji mwakonsha ne kwipuzha bo mufunjisha Baibolo umvwe bajipo na balunda nangwa balongo babo bakonsha kukeba kufunda Baibolo.
3. Kingijisho ka kyawama kyo tuji nakyo kya kutendekelamo mafunjisho a Baibolo, kabiji kimye ka kyo twakonsha kwikingijisha?
3 Kingijisho kya Kwimukwasha Kutendekelamo Lufunjisho: Kingijisho kyawama kutendekelamo mafunjisho a Baibolo ke talakiti wa Nanchi Mukeba Kuyuka Bukine Nyi? Mwakonsha kupa bantu bo mutana pa mazubo kikale baswa kutambula mabuku akwabo nangwa ne. Mwakonsha kwingijisha uno talakiti umvwe mubena kwingijila mu nyaunda ya busulu, mu mukwakwa, pa kutuma makalata ne pa kubwelako ku bantu. Kabiji mwakonsha kumusha pa mazubo po mwabula kutana bantu. Mambo ka a kubujila kusenda uno talakiti pa lwendo, pa kuya na kupota bya kupotapota ne pa nkito? Pa jipa japelako ja uno talakiti balondololako pacheche lunengezho lwetu lwa kufunjisha bantu Baibolo kabiji paji ne buku wa Baibolo Ufunjisha.
4. Twakonsha kwingijisha byepi talakiti wa Kuyuka Bukine kutendekelamo lufunjisho lwa Baibolo?
4 Panyuma ya kupa muntu uno talakiti, mwakonsha kutongola mepuzho aji pa jipa jitanshi ne kumushikisha’mba, “Pa ao mepuzho, bwipuzho ka bo mwatemwishapo?” Apa bino mwisambe mukumbu uji mu talakiti kabiji ne kutanga nangwa kulumbulula byambo biji pa jipa japelako, byaamba pa lunengezho lwetu lwa kufunjisha bantu Baibolo. Umvwe mwauba byobyo, mwakonsha kumumwesha mo balondolola bulongo yewo mutwe mu buku wa Baibolo Ufunjisha, mupai buku ne kumwambila’mba mukabwelako kuba’mba mukatwajijile na mwisambo wenu.
5. Mambo ka o twafwainwa kwipuzhizhanga bantu umvwe bakeba kufunda Baibolo?
5 Nyaunda yetu ikiji na bantu babena kukebesha kuyuka bintu bifunjisha Baibolo. Kushikisha bantu umvwe bakeba kufunda Baibolo, kuketulengela kwikala na mashuko avula a kukwashishamo bantu kwenda mu jishinda jaya ku bumi.—Mat. 7:13, 14.