Matalakiti Akatataka Anembwa Bingi Bulongo!
1. Ñanyi bintu byakwingijisha mu mwingilo byo banemba mu jishinda jawama ja katataka?
1 Pa kushonkena kwa nkambi kwa mu 2013, kwajinga na mutwe wa kuba’mba ‘Mambo A Lesa bo Bukine!’ matalakiti atanu alupwilwe. Kabiji talakita mukwabo wa Mambo a Bufumu Na. 38 wa kuba amba “Umvwe Muntu Wafwa Wakonsha Kwikala Mumi Jibiji Nyi?” wanungwako ku ano matalakiti. Ano matalakiti 6 anembwa bingi bulongo. Mambo ka o be anembela mu jino jishinda? Twakonsha kwingijisha byepi luno lunengezho lwakatataka pa kupana ano matalakiti ku nzubo ku nzubo?
2. Ano matalakiti anembwa mu jishinda jakonsha kwitukwasha kuba ka?
2 Mambo ka o Beanembela mu Jino Jishinda?: Pa kuba’mba twingile bulongo mwingilo wa ku nzubo ku nzubo, tulondela mashinda ana alondelapo: (1) Kwipuzha bwipuzho bwakonsha kulengela mwina nzubo kulangulukapo ne kuswa kwisamba. (2) Kutanga kinembelo kufuma mu Baibolo. (3) Kupa mwina nzubo buku wa kutanga. (4) Kupwizha bupwizho bo mukakumbula kimye kikwabo, ne kunengezha kubwelelako. Ano matalakiti anembwa mu jishinda jakonsha kwitukwasha kulondela ano mashinda.
3. Ñanyi mashinda o twakonsha kulondela pa kupana matalakiti akatataka mu mwingilo?
3 Bya Kwingijisha ano Matalakiti: (1) Panyuma ya kwimuna bena nzubo, bamweshai bwipuzho bwa mutwe wa talakiti buji na mikumbu ya kuba’mba ‘ee,’ ‘ine’ nangwa ‘kampe,’ ne kwibepuzha byo bakonsha kukumbula. (2) Vungululai talakiti ne kumona ka mutwe kaamba’mba “Baibolo Waamba’mba”. Inge kyakonsheka, tolai Baibolo ne kutanga kinembelo kyo bamwesha pa talakiti. Bena nzubo inge kechi bapayankana ne, isambai nabo ka mutwe ka bubiji pa jipa 2 kaamba pa kwitabila byaamba Baibolo byo kwakonsha kwimukwasha mu bwikalo bwenu. (3) Bapai talakiti ne kwibatundaika kumutanga pa kimye kyabo. (4) Pa kupwisha kwisamba, bamweshai bwipuzho buji pa ka mutwe ka kuba amba “Kyo Mwakonsha Kulangulukangapo” ne kunengezha kubwelako na kwisamba byamba Baibolo.
4. Twakonsha kwingijisha byepi matalakiti akatataka kimye kyo twabwelako jibiji ku muntu ye twataine?
4 Kwisamba na muntu kimye kyo mwabwelako jibiji nako kwapela. Mwakonsha kwingijisha kinembelo kiji panshi ya kamutwe kaamba’mba ‘Kyo Mwakonsha Kulangulukangapo’ ne kukumbula bwipuzho bo mwaipwizhe kimye kitanshi. Pa kupwisha kwisamba, bamweshai kipikichala kya buloshuwa wa Mambo Awama kiji pa talakiti ne kwibamwesha lufunjisho luji mu buloshuwa lwaambapo byavula pa byo mwaji kwisambangapo. Bapai buloshuwa ne kwibabula’mba ye ye mukesambapo kimye kyo mukabwelako jikwabo. Kwakubula nangwa kutaya kimye ne, mwatendeka Lufunjisho lwa Baibolo. Mu jishinda jikwabo, mwakonsha kwibashila talakiti mukwabo ne kunengezha kubwelako jikwabo na kwisamba pa yewo talakiti.
5. Twaingijisha byepi matalakiti mu mwingilo wetu wa kusapwila?
5 Pa myaka kukila pa 130, twaingijisha bingi matalakiti mu mwingilo wetu wa kusapwila. Nangwa kya kuba anembwa ne kulengwa mu mashinda apusana pusana, etukwasha bingi mu mwingilo wa kusapwila. Onkao mambo, twayai twiyeke na kwingijisha ano matalakiti akatataka ne kutwajijila kusampanya maana alumbuluka a mu Baibolo ntanda yonse.—Mana. 15:7a.