“Nanchi Kiumbi kya ino Myaka ya Katataka—Kimusungila Ñanyi Bwikalo mu Kimye kya Kulutwe?”
1 Bantu bavula mwaya ntanda balanguluka bingi pa jino jipuzho. Nangwa kya kuba bantu balenga bya kulenga-lenga pa myaka yavula, kibafita ku muchima, mambo makatazho akatazha bantu pa myaka yavula akitwajijila ne lelo jino. (Yoba 14:1; Sala. 90:10) Nanchi kwepi bantu ko bakonsha kutana bukwasho?
2 Mu ñondo wa October ne November, tukekala na jishuko jiikajila ja kukumbwila bakwetu jino jipuzho. Nanchi jino jipuzho tukejikumbwila mu ñanyi jishinda? Tukejikumbwila kupichila mu kutambwisha talakiti ya Mbila ya Bufumu Na. 36. Ino talakiti iji na mutwe wa kuba’mba “Nanchi Kiumbi kya ino Myaka ya Katataka—Kimusungila Ñanyi Bwikalo mu Kimye kya Kulutwe?” Mu moba a kutatwilako a ñondo wa October, tukatambikanga magazini a Ulupungu lwa kwa Kalinda ne a Loleni! Kepo kutatula pa Kimo, October 16, kufika pa Kitanu, November 17, tukekala na mwingilo wa kutambwisha talakiti ya Mbila ya Bufumu Na. 36. Mu uno mukwekele tukatesha muchima ku kushajika talakiti ya Mbila ya Bufumu Na. 36 mu moba a mulungu. Ku mpelo ya milungu, tukatambikanga talakiti pamo na magazini akashajikwanga pa kyo kyo kimye.
3 Nanchi Mukengila na Muchima Yense Nyi? Bakulumpe mu kipwilo, bankwasho ne bapainiya bwafwainwa kutangijila uno mukwekele, mambo bo baji pa lutwe mu uno mwingilo. Basapwishi bavula bapimpula bwikalo bwabo pa kuba’mba bengileko bupainiya bwa kukwasha mu ñondo umo nangwa mu bañondo bonse babiji ba kutambwishishamo talakiti. Bamo bafukula kwingila kimye kyabaya mu butumwa kukila kyo bengila kimye kyonse.
4 Batangijila Masambijilo a Buku pa kipwilo baji na mwingilo wabaya wa kutundaika yense uji mu jibumba jabo kwingila na ngovu mu uno mukwekele wa kutambwisha talakiti ya Mbila ya Bufumu Na. 36. Kampe paji basapwishi bakoka mu mwingilo wa busapwishi. Bakulumpe mu kipwilo bafwainwa kufwakesha bano bantu ne kumona byo bakonsha kwibakwasha. Kampepo pakonsha kwikala kunengezha kwa kuba’mba musapwishi wafikapo a kengijilenga pamo mu bujimi na bantu bakoka mu bano bañondo. Kyafwainwa kukwasha bano basapwishi kutatula mwingilo ke kwingijisha ñambilo yapeela pa kutambwisha talakiti ya Mbila ya Bufumu Na. 36.
5 Kabiji jino jikekala jishuko ku Basambi ba Baibolo baji pepi na kupwisha buku wa Kuyuka kabiji bafikapo kwikala basapwishi babula kubatizwa kutatula kwingila mu butumwa. Nangwatu bakyanyike bakonsha kwingila bulongo mu uno mwingilo uleta lusekelo.
6 Kikebewatu ke ñambilo yapeela. Mwakonsha kwamba’mba:
◼“Mbena kukwasha mu kukumbanya ano mawi anema ku bisemi byonse mu kino kimasa-masa. Ino talakiti yenu. Mwane mwiitange.” Pa kutambwisha talakiti ya Mbila ya Bufumu Na. 36 kyakonsha kukilapo kuwama ke twendetu kwakubula kyola kyabaya mo tusendela mabuku.
7 Kusambakana kwa Kuya mu Mwingilo wa mu Bujimi Kwakokozhewa Bulongo: Bakulumpe mu kipwilo bafwainwa kumona kuba’mba nnengezhezho ya busapwishi yanengezhewa bulongo kabiji ibena kwingila. Kikatakata utangijila mwingilo wa mu bujimi wafwainwa kumona kuba’mba manyaunda a kwingijilamo busapwishi bwa ku nzubo ne nzubo koaji ne nyaunda ya busulu pa kuba’mba bonse bakonshe kwingila na muchima yense mu uno mwingilo. Konse ko kya konsha kubiwa, kusambakana kwa kwinengezha kuya mu mwingilo kwafwainwa kukokozhewa pa juba pa juba mu moba a mulungu, ku mpelo ya milungu ne mu bimye bya mabanga. Kwafwainwa kwikala lunengezho lwa kusambakana kwa kuya mu bujimi mu bimye bya mabanga pa kuba’mba bana basukulu, ne ba mingilo ne bakwabotu batanwengako.
8 Bya Kuba na Babula Kutanwa pa Mazubo: Kikonkwanyi kyetu ke kya kwamba na bena mazubo bavula kufika ponse po twakonsha kupezha. Umvwe kya kuba mwabula kutana muntu pa nzubo, nembai keyala ne kubwelako kimye kikwabo. Umvwe mwabula kutanapo bena mazubo mu mulungu wapelako wa uno mukwekele, mwakonsha kusha kope ya Mbila ya Bufumu Na. 36 pa mpunzha bena nzubo po bafwainwa kwiimona bino pa bena kubula kumweka ku bantu bapitatu mu jishinda. Bakulumpe mu kipwilo kyenu bakonsha kubula kipwilo kusha kope ya Mbila ya Bufumu Na. 36 pa mazubo pabula bantu kimye kitanshi umvwe babena kwingijila ku mapunzha a ku mizhi nangwa ku mapunzha kuji nyaunda yabaya yo mwakonsha kubula kupwisha mu kimye kya uno mukwekele.
9 Twikale ba Kwingila na Ngovu! Bipwilo byafwainwa kwingila na ngovu pa kuba’mba bipwishe nyaunda yabyo uno mukwekele saka akyangye kupwa pa November 17. Umvwe nyaunda yenu yabaisha, basapwishi bamo bakonsha kwingila bunke, ku mpunzha ko kyakonsha kubiwa kabiji kwabula kuswaswala. Uno mutanchi ukakwasha kusapwila ku bavula bafwainwa kumvwa. Monai kuba’mba mwanemba ne kusunga mazhina a bonse bamwesha lusekelo.
10 Kechi kyafwainwa kuoda talakiti ya Mbila ya Bufumu Na. 36 ne, mambo yatumwa kala ku bipwilo byonse. Bapainiya beikajila, ba kimye kyonse ne bakukwasha pa muntu pa muntu bakatambula makope 100 a kutambwisha, bino basapwishitu bakatambula makope 30 pa muntu pa muntu. Nanchi abya mwinengezha kusakisha kwikala bapayankana mu uno mwingilo wiikajila nyi? Byo tujipo na jishuko ja kubulako bakwetu bya laya Lesa mu kimye kya kulutwe kyafwenya kala pepi!