Mambo a Bufumu Na. 38 oa Kusampanya mu November!

1. Ñanyi mepuzho epuzha bantu pa bafu, kabiji ano mepuzho akakumbulwa byepi mu November?

¹ Lufu ke mulwanyi wa bantu bonse, nangwa mwaitabila mu bintu bya mutundu ka. (1 Ko. 15:26) Bavula kechi bayuka kuji bafu ne, kabiji bazhinauka kuba’mba kana bakamonañana nabo jibiji nangwa ne. Onkao mambo, bipwilo mwaya ntanda yonse bikasampanyanga mu ñondo yense talakiti wa Mambo a Bufumu Na. 38, uji na mutwe wa kuba’mba Umvwe Muntu Wafwa Wakonsha Kwikala Mumi Jibiji Nyi? Uno mukwekele wiikajila ukatendeka pa November 1. Panyuma ya uno mukwekele wa kusampanya Mambo a Bufumu Na. 38 tukeingijishangatu nobe matalakiti akwabo mu mwingilo.

2. Talakiti wa Mambo a Bufumu Na. 38 walengwa byepi?

² Byo Bamulenga: Uno talakiti bamulenga mu jishinda ja kuba’mba umvwe mwamuchimpa moalepulukila, pa jipa jitanshi pafwainwa kumweka byambo bya kuba’mba “Abya mwakonsha kukumbula amba . . . ee? ine? kampe?” Umvwe ubena kutanga wazhikula uno talakiti, ukamona Baibolo byo akumbula bwipuzho bwa mutwe wa uno talakiti ne mulaye wa mu Baibolo byo anema kwi aye. Kabiji ukayuka ne ene mambo o kyanemena kuketekela mu Baibolo. Jipa ja kunyuma ya uno talakiti paji bwipuzho bwa kulangulukapo ne kumutundaika kukeba kufunda byavula.

3. Tukasampanya byepi uno talakiti wa Mambo a Bufumu Na. 38?

³ Byo Tukamusampanya: Uno mukwekele ukekalatu byonka bikala mukwekele wa kusampanya tupepala twa Kivuluko ne kushonkena kwa nkambi. Bakulumpe mu kipwilo bakemubula mashinda a kusampenyamo uno talakiti mu nyaunda kwesakana na nkalata yo batambwijile ya April 1, 2013. Bipwilo biji na nyaunda icheche ya kwingijilamo byafwainwa kukwashako bipwilo biji pepi biji na nyaunda ikatampe. Pa kutambula talakiti wa Mambo a Bufumu Na. 38, monai kuba’mba mwatambulatu matalakiti o mwafwainwa kupwisha mu mulungu umo. Umvwe mwapwisha mazubo onse aji mu nyaunda yenu, mukwekele saka akijiko, mwafwainwa kuya na kusapwila pa mvula bantu. Umvwe mwapwisha matalakiti onse ñondo saka akyangye kupwa, mwafwainwa kushanga mabuku a kusha mu yeo ñondo. Pa Kibelushi kitanshi, tukatatu muchima pa mukwekele wa kusampanya uno talakiti kechi pa kutendeka mafunjisho a Baibolo ne. Kumpelo ya mulungu, twafwainwa ne kusha magazini umvwe kyakonsheka. Nanchi mubena kwinengezha kuba’mba mukengileko bingi mu uno mukwekele wiikajila nyi?