Kwita Bantu Kwiya ku Kivuluko Kukatatula pa 1 March
1. Mukwekele wa kwita bantu ku Kivuluko ukatatula ñanyi juba, kabiji mambo ka uno mwaka kyo twaikela na moba avula a kwichilamo bantu?
1 Pa Kitanu pa 1 March po po tukatatula mukwekele wa kwita bantu kwiya na kutanwa ku Kivuluko kikekalako pa 26 March. Uno mwaka tukekala na moba avula a kutewilamo bantu kukila myaka yapitapo. Kino kiketukwasha kupana tupepala twa lwito ku bantu bavula kikatakata inge kya kuba kipwilo kiji na nyaunda ikatampe.
2. Bakulumpe bakanengezha byepi jishinda ja kutambwilamo tupepala twa lwito ne bya kwingila mu nyaunda yenu yonse?
2 Nengezhai Bulongo: Bakulumpe mu kipwilo bakemubula byo mukengila mu nyaunda yonse ne bya kusha tupepala twa lwito pa mazubo po mukabulanga kutana bantu. Umvwe kya kuba twapwisha kupana tupepala twa lwito ku bantu pa mazubo mu nyaunda yonse yo twingijilamo bino tupepala twashalapo, twakonsha kwitusampanya ku mapunzha akwabo kutanwa bantu. Kalama wa mwingilo ukamona kuba’mba tupepala twa lwito twanembwapo bulongo ne kwitubika pa kutambwila mabuku nangwa magazini, bino kechi wafwainwa kubikapotu tonse ne. Twakonsha kusendapotu tupepala to twakonsha kupana ku bantu mu yewo mulungu.
3. Ñanyi bintu byo tukalabijila kimye kyo tukasampanyanga tupepala twa lwito?
3 Byo Tukambanga. Tukambangatu byambo bicheche pa kuba’mba tukakonshe kwita bantu bavula. Pa jipa 4 paji ñambilo imo yo twakonsha kwambilamo kwesakana na nyaunda yetu. Nangwa byonkabyo, kechi twafwainwa kwisambatu na muntu lubilo lubilo inge kya kuba witutambwila bulongo nangwa inge uji na mepuzho avula ne. Byo tukasampanyanga tupepala twa lwito pa Bibelushi, twafwainwa ne kusha magazini inge kyakonsheka. Pa 2 March tukasampanyanga tupepala twa lwito kechi kutatula mafunjisho a Baibolo ne.
4. Mambo ka o twafwainwa kwingila na kizaku mu uno mukwekele?
4 Twaketekala kuba’mba bantu bavula bakeya na kutanwa ku Kivuluko ne ku jashi jikambanga pe Yesu. (1 Ko. 11:26) Jino jashi jikamba ne pa lufu lwanji byo lwitukwasha. (Loma 6:23) Kabiji jikamba ne pa ene mambo o kyanemena kumuvulukanga. (Yoa. 17:3) Atweba bonse twafwainwa kwingilako na kizaku mu uno mukwekele!