Mukwekele wa Kwita Bantu Kwiya na Kutanwa ku Kivuluko Ukatendeka pa 17 March
1. Ñanyi mukwekele ukatendeka pa 17 March?
1 Pa mwaka pa mwaka mu moba a Kivuluko tusapwila pa lufu lwa kwa Yesu. (1 Ko. 11:26) Onkao mambo, tukeba bantu kutanwako ne kwiumvwina Yehoba mu butemwe bwanji byo apaine bukuzhi. (Yoa. 3:16) Uno mwaka mukwekele wa kwita bantu kwiya ku Kivuluko ukatatula pa Kibelushi pa 17 March. Nanchi mwinengezha kwingilako pakatampe nyi?
2. Twakonsha kwaamba’mba ka pa kusha kapepala ka kwichilapo bantu?
2 Byo Twakonsha Kwamba: Twakonsha kwambatu byambo bicheche. Amba: “Muji byepi. Tubena kukeba kupa kisemi kyenu kano kapepala ka kwichilapo bantu ku Kivuluko kyanema kyubiwa jimo pa mwaka, kikekalako mwaya ntanda yonse pa 5 April. Kabiji kukekala ne jashi ja mvula bantu jo mukabula kupanapo mali, jikalondolola nkebelo ya lufu lwa kwa Yesu ne byo abena kuba luno. Kano kapepala ka kwichilapo bantu kamwesha keyala ne kimye kikatendeka kupwila muno mu nyaunda yetu.” Kimye kyo tukashilanga bantu kano kapepala kumpelo ya mulungu, twafwainwa ne kwibashila magazini umvwe kyakonsheka.
3. Twakonsha kuba byepi pa kuba’mba twite bantu bavula?
3 Twakonsha Kwita Bantu Bavula: Kikonkwanyi kyetu ke kya kwita bantu bavula. Monai kuba’mba mwaitako bantu bo mufunjisha Baibolo, bo mwisambilepo nabo, balongo benu, bo mwingila nabo pa nkito, bakwenu baana basukulu, bakinkalankulo ne bakwabotu bo mwayuka. Bakulumpe mu kipwilo bakemubula bya kupwisha nyaunda yenu. Mukwekele ye twikala nanji kila mwaka wa kwita bantu ku Kivuluko mufuma byawama. Kimye wamukazhi umo kyoaishile na kutanwa ku Kivuluko mwaka wapwa, asha wipaine kumukwasha kukeba musapwishi wamwichile. Nangwa byonkabyo, uno wamukazhi waambile’mba kechi wayukilepo nangwa umo ne, bamupeletu kapepala ku basapwijilenga ku nzubo ku nzubo.
4. Bishinka ka byakonsha kwitulengela kwingilako pakatampe mu uno mukwekele?
4 Kampe pa bantu bakatanwako ku Kivuluko pakekala ne muntu ye mwapele kapepala. Kikale baswa nangwa bakana, kwibikishako kwenu kukapana bukamonyi. Tupepala totukapananga tukamwesha’mba Yesu ke Mfumu wa bulume. Kwingilako kwenu pakatampe mu uno mukwekele kukamwesha ku bonse ba mu nyaunda yenu, bakwenu basapwishi, ku kijisha aye Yehoba kuba’mba kine musanta pa bupe bwa bukuzhi.—Kolo. 3:15.