Kusampanya Tupepala twa Kwichilapo Bantu ku Kivuluko!
1. Mukwekele ka ukekalako mwaya ntanda yonse juba ja kivuluko saka jikyangye kufika?
1 “Kasa muba bibye mu kundanguluka amiwa.” (Luka 22:19) Na mambo a uno mukambizho wa kwa Yesu, bapopweshi ba Yehoba bakapwila pamo na bantu bamwesha lusekelo pa March 30, 2010 na kuvuluka lufu lwa kwa Yesu. Kukekala kusampanya tupepala twa kwichilapo bantu ku kivuluko mwaya ntanda kutendeka pa March 13 kufika pa March 30.
2. Tukapananga byepi tupepala twa lwito?
2 Bya Kupana Tupepala: Mwakonsha kumupa mwina nzubo kapepala wimwena mwine biji pa nkupiko, bino mwaamba’mba: “Bantu bavula mwaya ntanda bakavulukanga lufu lwa kwa Yesu mabanga pa March 30. Nemuletela kano kapepala ka kwimwitako pamo na kisemi kyenu. Ne balunda nenu bakonsha kwiya.” Tongolai kimye ne mpunzha kukekela kivuluko. Umvwe kyakonsheka, mwakonsha ne kutanga uno mukambizho uji mu Baibolo pa Luka 22:19. Byo kiji kuba’mba kimye kya kusampanyinyamo tuno tupepala mu nyaunda yonse kyakepa, kyawama kubula kutaya kimye kyabaya na muntu umo.
3. Bañanyi bo tuketako?
3 Umvwe kipwilo kiji na nyaunda ikatampe, bakulumpe mu kipwilo bakonsha kwimubula kusha tuno tupepala twa lwito pa mazubo po mwabula kutana bantu pa kimye kitanshi. Umvwe kyakonsheka mwakonsha kushila bantu magazini pamo na kapepala ka lwito. Monai kuba’mba mwaitako bantu bo mwisambilepo nabo, bo mufunjisha Baibolo, bo mwingila nabo, bakwenu baana basukulu, balongo benu, bo mwikala nabo kipi kipi ne bakwabotu bo mwayuka.
4. Kusanchila Yehoba pa butemwe bo amwesha pa kunengezha bukuzhi kuketulengela kuba byepi?
4 Inengezhai Kwingilako Pakatampe: Kimye kya kivuluko kyawama bingi kwingilako pakatampe. Nanchi mwakonsha kwingilako bupainiya bwa kukwasha nyi? Nanchi muji na baana nangwa bomufunjisha Baibolo babena kuba bulongo ku mupashi nyi? Umvwe ibyo, monai bakulumpe mu kipwilo bamone kana bafikilamo kwikala basapwishi babula kubatizwa ne kwingilako mu uno mukwekele. Kusanchila Yehoba pa butemwe bo amwesha pa kunengezha bukuzhi kuketulengela kwita bantu bavula kechi kushinkwakotu atweba bene ne.