Mukwekele Wiikajila wa Kuyukanyikisha Kivuluko!
1. Basapwishi ba Bufumu bakengila mwingilo ka mwaya ntanda yonse kutendeka pa March 21, 2009, kabiji mambo ka?
1 Pa Kina, April 9, 2009, bapopweshi ba Yehoba Lesa mwaya ntanda yonse bakapwila na kuvuluka kyubilo kya butemwe bwanji bukatampe pa bantu. (Loma 5:6-8) Twaketekela’mba kukekala bantu bavula bingi bakeba kufunda bukine bakeya na kupwila pamo ne atweba na kuvuluka lufu lwa kwa Yesu. Tupepala twa kwichilapo bantu ku Kivuluko tukasampanyiwa ntanda yonse kutendeka pa March 21.
2. Bishinka ka byo mwafwainwa kulabijila kimye kyo mubena kwita bantu?
2 Bishinka bya Kulabijila: Ingijishai bulongo bipikichala, mepuzho, ne binembelo byamweshiwa pa kapepala ka kwichilapo bantu. Kya kumwenako, mwakonsha kumumwesha kipikichala kiji pa nkupiko ne kwamba’mba: “Naiya na kwimwita namba mukeye na kuvulukila pamo ne atweba lufu lwa kwa Yesu, lukavulukwa pa Kina April 9, 2009.” Apa bino mwaamba pa mutwe uji pa kapepala ka kwichilapo bantu ne mepuzho aipuzhiwapo. Monai’mba mwabula bena nzubo kwitako ba mu kisemi kyabo ne bantu bakwabotu bo bakeba kwiya nabo.
3. Mwakonsha kuba byepi pa kubwela ku boba bo mwashijile tubipepala twa lwito kimye kyo kwajinga mukwekele?
3 Inge kipwilo kyenu kiji na nyaunda yabaya, bakulumpe mu kipwilo bakonsha kwimubula’mba mukashenga tubipepala twa kwichilapo bantu pa mazubo po mukabulanga kutana bantu. Ku mpelo ya mulungu, mwakonsha kushajika magazini pamo na tubipepala twa kwichilapo bantu. Monai’mba mwaita boba bo mwalaile kubwelako, bo mufunjisha Baibolo, balongo benu, bakwenu baana ba sukulu, bo mwingila nabo, bakinkalankulo, ne bantutu bakwabo bo mwayuka. Mwaka wapwa, nyenga umo waichile balongo banji 30, kabiji wibavulwilengamo inge papita kimye pa buneme bwa kino kivuluko. Watemenwe bingi byo amwene bantu 25 pa boba bo aichile batanwako, kabiji pa bano, bana baswile kufunda Baibolo.
4. Bintu ka byo twafwainwa kutendekako kunengezha lonka luno, kabiji mambo ka?
4 Nengezhezhai Jimo Lonka Luno: Basapwishi bavula bakonsha kwingila na ngovu mu ñondo wa March ne April. Inge muji na baana nangwa bo mufunjisha Baibolo babena kununguluka, kino kyo kyakonsha kwikala kimye kyawama kuba’mba bekale basapwishi babula kubatizwa. Kino kyo kimye kya kutendeka kunengezhezha jimo kwingila papelela bulume bwenu mu uno mukwekele wa kuyukanyikisha kuvuluka bintu bibiji mwamwekejile butemwe bukatampe.—Yoa. 3:16; 15:13.