Kusampanya Tupepala twa Kwichilapo Bantu ku Kivuluko Kukatendeka pa 2 April
1. Uno mwaka tukatendeka kimye ka kusampanya tupepala twa kwichilapo bantu ku Kivuluko kabiji uno mukwekele ubiwa pa mwaka pa mwaka wanemena ka?
1 Kutendeka pa 2 April kufika pa 17 April, tukasampanyanga tupepala twa kwichilapo bantu ku kintu kyanema bingi kyubiwa pa mwaka, ko kuba’mba Kivuluko kya Lufu lwa kwa Kilishitu. Pa myaka ya kunyuma, bantu bavula bamwesha lusekelo, baswa tupepala twa lwito to twibapa mu uno mukwekele ubiwa pa mwaka pa mwaka. Kyakumwenako, pa juba ja Kivuluko, mwanamukazhi umo watumijile ofweshi wa musampi lamya ne kwamba’mba: “Byo naji kufika pa nzubo, najikutana kapepala ka kwichilapo bantu pa kibelo. Mbena kukeba kutanwako, bino kechi nayuka kimye ne.” Mulongo wamulondolwejile po banemba kimye pa kano kapepala. Pa kupwisha kwisamba, uno mwanamukazhi walayile kuba’mba, “Nsakutanwako ku Kivuluko mabanga ano!”
2. Twakonsha kwamba’mba ka pa kusha kano kapepala?
2 Tuketusampanya Byepi: Byo kiji kuba’mba tuji na kimye kicheche kya kusampenyamo tuno tupepala mu nyaunda yetu yonse, kyawama kubula kwamba byambo byavula. Twakonsha kwamba bino amba: “Muji byepi. Tubena kukeba kupa kisemi kyenu kano kapepala ka kwichilapo bantu ku Kivuluko kyanema kyubiwa pa mwaka kikekalako mwaya ntanda yonse pa juba ja pa mulungu, pa 17 April. [Pai bena nzubo kapepala.] Jino juba ke ja kuvuluka lufu lwa kwa Yesu. Kukambiwa jashi ja mvula bantu jo mukabula kupanapo mali, jilondolola byo twakonsha kumwenamo mu bukuzhi bwa kwa Kilishitu. Kano kapepala kabena kumwesha kimye ne mpunzha kukekela kivuluko mu nyaunda yetu.”
3. Twakonsha kuba byepi pa kuba’mba twite bantu bavula?
3 Umvwe kipwilo kiji na nyaunda ikatampe, bakulumpe mu kipwilo bakonsha kwimubula kusha tuno tupepala twa lwito pa mazubo po mwabula kutana bantu kikulutu mwitubika pa mpunzha pakonsha kubula kwitumona ku bantu bangi. Monai kuba’mba mwaitako bantu bo mwisambilepo nabo, balongo benu, bo mwingila nabo pa nkito, bakwenu baana basukulu, ne bakwabotu bo mwayuka. Kimye kyo mubena kushila bantu tuno tupepala pa kibelushi ne pa mulungu, mwakonsha ne kwibashila magazini umvwe kyakonsheka. Nanchi mwakonsha kwingilako bupainiya bwa kukwasha mu April ne kwingilako pakatampe mu uno mukwekele wawama nyi?
4. Mambo ka o tubena kukebela bantu bamwesha lusekelo kutanwa ku Kivuluko?
4 Byo kikawamapo bano bantu bamwesha lusekelo kwimwena abo bene kikobiwa! Bakeumvwina abo bene butemwe bukatampe bwa Yehoba bo amwesheshe pa kwitupa bukuzhi. (Yoa. 3:16) Bakafunda pa Bufumu bwa Lesa byo bukaletela bantu bintu byawama. (Isa. 65:21-23) Kabiji bakebambila kumona baasha ne kwibakebelapo muntu wa kwibafunjisha Baibolo kuba’mba bakafunjilepo byavula. Tubena kulomba’mba aba bakeba kufunda bukine bakaswe tuno tupepala twa lwito ne kutanwako pamo ne atweba ku Kivuluko!