Kunungulula Lusekelo lwa Bantu Batambwile Talakiti ya Mbila ya Bufumu Na. 36
1 Nanchi mwapwisha kutambwisha matalakiti a Mbila ya Bufumu Na. 36 o mwatambwile nyi? Ino talakiti iji na jipuzho jo twafwainwa kulangulukapo atweba bonse ja kuba’mba: “Nanchi Kiumbi kya ino Myaka ya Katataka—Kimusungila Ñanyi Bwikalo mu Kimye kya Kulutwe?” Mwaka wa 2000 byo afwenyenyenga pepi, bantu bavula baketekejile kumona byavula bingi mu kino kiumbi kya myaka yakatataka. Talakiti ya Mbila ya Bufumu Na. 36 yaamba pa bimo bantu byo baketekejile ne kwituvulula kuba’mba byubilo bya ino ntanda kechi byafwainwa kuketekelwa mu buwame ne. Kiumbi kya myaka ya Bukalama bwa kwa Kilishitu Yesu kyo kyonka kikaleta mutende ne bukikizhi ku bantu. Luketekelo lwetu lwa kuyuka kuba’mba buno Bufumu bukekalako, lo lwitutundaika kutambwisha talakiti ya Mbila ya Bufumu Na. 36 ku uji yense ye twakonsha kusolomoka.
2 Byafuma mu Kutambwisha Talakiti ya Mbila ya Bufumu: Kutambwisha talakiti ya Mbila ya Bufumu kwajingako ku nyuma kwe, kwatundaika bingi mwingilo wetu. Pa mambo a talakiti ya Mbila ya Bufumu Na. 35, musampi wa mu Canada wanembele kuba’mba: “Uno mukwekele wiikajila wa mu bujimi waingijiwenga mu kubambakana na basapwishi ne bapainiya, kabiji beyowele mankumanya a lutundaiko avula.” Kwakubula nangwa kuzhinaukatu ne, ne anweba mwamwesha kubambakana kwenu mu kutambwisha talakiti ya Mbila ya Bufumu Na. 36.
3 Uno mukwekele wa kutambwisha talakiti ya Mbila ya Bufumu ukapwa pa November 17, 2000. Nanchi nyaunda yenu ingijilamo kipwilo yaingijiwamo yonse nyi? Umvwe kechi mwaingijilamo monse ne, bakulumpe mu kipwilo kampe bakonsha kwimulomba kutwajijila na uno mukwekele kufika ne ku mpelo ya November.
4 Nanchi mu nyaunda yenu bantu babena kutambwila byepi talakiti ya Mbila ya Bufumu Na. 36? Pa bano bantu, bamo bakanemba pa ka kupashi ne kulomba buloshuwa wa Nanchi Lesa Ukebaka nangwa jisambijilo ja Baibolo ja pa nzubo. Nangwa byonkabyo, bavula bamwesha lusekelo lwa kukeba kufunda pa mambo a kiumbi kya myaka kechi bobapo kimo ne, kanatu umo wa mu Bakamonyi ba kwa Yehoba wabwelako jibiji. Bonse bakeba kufunda bafwainwa kwibafwakesha jibiji. Ñanyi kimye kyakonsha kuwama kuba byo byo? Kechi kyafwainwa kubanda ne.
5 Monai ano mankumanya ajinga pa kufwakesha jibiji kwashajile matalakiti a Mbila ya Bufumu Na. 35. Mu kyalo kya Ireland, painiya wapaine talakiti ya Mbila ya Bufumu ku mwina lesitilanti. Uno mwanamukazhi watemenwe bingi buluwe bwajingamo kabiji wabujile nyenga kubwelako jibiji. Nyenga wabweleleko pa nyuma ya moba abiji ne jisambijilo ja Baibolo jatatwile. Mu kyalo kya Denmark, bashile kope wa Mbila ya Bufumu, pa nzubo imo pabujile bantu. Jonkajo juba mwanamukazhi waikalanga pa yo yo nzubo watumine ka kupashi ku ofweshi ya musampi. Ba pa ofweshi batumine kano ka kupashi ku kipwilo kiji kwipi na koekela. Mulungu ne kupwatu ne, banyenga babiji bamufwakashishe ne jisambijilo jatatwile. Mu yenkao mulungu uno mwanamukazhi watainwe ku kupwila pa Nzubo ya Bufumu kimye kitanshi!
6 Byo Mwakonsha Kwamba Umvwe Mwabwelako: Kufwakesha jibiji botwashijile talakiti ya Mbila ya Bufumu ke kintu kyapela bingi kabiji ke lubaji lumo lwawamisha mu butumwa bwetu. Pa kubwelako sendai talakiti ya Mbila ya Bufumu Na. 36, apo kampe mwatana kuba’mba mwina nzubo ufwayo. Mwakonsha kweseka kwamba ino ñambilo.
7 Pa nyuma ya kuvululako mwina nzubo jizhina jenu, mwakonsha kwamba’mba:
◼“Nemushijile ka buku ka mapepala abiji kaji na mutwe wa kuba’mba ‘Nanchi Kiumbi kya ino Myaka ya Katataka—Kimusungila Ñanyi Bwikalo mu Kimye kya Kulutwe?’ Nanchi mwikyumvwa byepi byo mubatangenga kuba’mba katatakatu Kiumbi kya Myaka ya Bukalama bwa kwa Kilishitu Yesu kikalete bwikalo bwawama mu Paladisa pano pa ntanda? [Mweshai bipikichala bibena kumwesha Paladisa mu talakiti ya Mbila ya Bufumu Na. 36.] Pa peja ya pa nyuma, mwabulwa kulomba buloshuwa wa Nanchi Lesa Ukebaka Kwiatweba?” Mu mweshai buloshuwa, zhikulai pa lufunjisho 5, tangai jipuzho jitanshi ne mapalagalafu 1 ne 2, kepo ipuzhai mwina nzubo kwambapo. Tangai kinembelo kimo nangwa bibiji ne kwisambapo. Umvwe kyafwainwa, tangai jipuzho jikwabo ne palagalafu, kepo munengezhe kubwelako jibiji na kutwajijila mwisambo.
8 Byo kyaikala kuba’mba pa lupempu lwa kubwelako mu November tukatambikanga Buloshuwa wa “Nanchi Lesa Ukebaka” nangwa buku wa “Kuyuka,” mwakonsha kwamba’mba:
◼“Kimye kyo nemufwakashishe nemushijile ka buku ka kuba’mba ‘Nanchi Kiumbi kya ino Myaka ya Katataka—Kimusungila Ñanyi Bwikalo mu Kimye kya Kulutwe?’ Kano ka buku kamwesha kuba’mba mwakonsha kwikala na jisambijilo ja Baibolo ja pa nzubo jatutu. Naiya namba nemumweshe mabuku o twingijisha pa kufunda. [Mweshai buloshuwa wa Nanchi Lesa Ukebaka, ne kwiyalwila pa nkupo ya pa nyuma nangwa mweshai buku wa Kuyuka ne kuzhikula pa mapeja 188-99.] Mu Myaka Kiumbi yaambiwapo mu Baibolo, mukekala biji nobe bino byo mubena kumona pa kikye kipikichala. Pa kuba’mba tukekalemo mu Paladisa twafwainwa kufunda mana a lumbuluka a kuyuka Lesa. Mwane ubai nemumweshekotu pacheche byo tufunda Baibolo.”
9 Kutambwisha talakiti ya Mbila ya Bufumu Na. 36 kwitulengela kunungulula mwingilo wetu mu butumwa, ako kufumamo busapwishi bwa kine kine. Kya kine, kino kyaleta bingi lusekelo ku bantu bavula mu nyaunda. Kwingijila pamo mu kunungulula uno mwingilo wetu kupichila mu bukwasho bwa kwa Yehoba, kuleta lusekelo ne kutana bantu ba bumukooko.—Mat. 10:11; Byu. 13:48, 49, 52.