‘Ubainga Byonse na Mambo a Mambo Awama’
1. Musapwishi wa Bufumu wifuukwila mwine kuba ka ku bantu, kabiji mambo ka?
1 Mutumwa Paulo wayukile’mba wajinga na mutembo wa kusapwila mambo awama ku bantu. (1 Ko. 9:16, 19, 23) Po pamotu, ne atweba kuta bantu muchima kuba’mba bakamwenemo myaka ne myaka, kwitulengela kukebesha kwibasapwila mambo awama.
2. Kimye kyo tubena kusapwila, ñanyi lupimpu lo twafwainwa kuba, kabiji mambo ka?
2 Sapwilainga ku Mpunzha ko Mwakonsha Kutana Bantu ne Kimye kyo Bakonsha Kutanwa: Muntu wayuka kukwata bulongo masabi kechi uta bukonde bwanji pa mpunzha po akeba mwine, ne pa kimye kyo akeba mwine ne, bino uta bukonde pa mpunzha paji masabi ne kimye kifwilamo masabi. Ne atweba byo tuji “ba mwingilo wa kukwata bantu,” twakonsha kupimpulako mutanchi wetu pa kuba’mba tutanenga bantu mu nyaunda yetu, mu jino jishinda tukeyowa mwingilo wetu wa ‘kukwata misango yonse ya masabi.’ (Mat. 4:19; 13:47) Nanchi kechi twakonsha kwingijisha kimye kya mabanga kuba’mba tutanenga bantu pa mazubo abo nangwa kimye kya lukelo kuba’mba tusapwilenga bantu mu mikwakwa nenyi? Kikonkwanyi kya kwa Paulo kyajinga kya “kusapwila mambo awama,” kabiji wamwenengako bimye byawama bya kwingijilamo uno mwingilo.—Byu. 17:17; 20:20, 24.
3, 4. Kimye kyo tuji mu mwingilo, twakonsha kupimpula byepi mashinda mwakwambila, kabiji bi ka bifumamo?
3 Pimpulainga Mashinda Mwakwambila Kwesakana na Bantu ba mu Nyaunda Yenu: Aba bakwata masabi javula bengijisha mashinda apusana pusana pa kuba’mba bakwate mutundu wa masabi o bakeba. Nga atweba twakonsha kusapwila byepi mambo awama a Bufumu mu jishinda jakonsha kulengela bantu ba mu nyaunda yetu kwituteleka? Twafwainwa kwamba pa mutwe walamata bantu baji mu yoyo nyaunda kabiji ne kutelekesha byo babena kwamba pa yewo mutwe. (Yako. 1:19) Twakonsha kwibepuzha bwipuzho bwafwainwa kwibalengela kwamba biji ku michima yabo. (Mana. 20:5) Inge twauba bino, tukakonsha kusapwila mambo awama mu jishinda jakonsha kwibafika pa muchima pa muntu pa muntu. Paulo ‘waalukile ke bintu byonse ku bantu bonse.’ (1 Ko. 9:22) Kupimpula mwakwambila ko kwitukwasha kufika bantu pa michima.
4 Byo kyawamapo kwisamba na bantu “mambo awama a lusekelo”! (Isa. 52:7) Twayai ‘tubenga byonse na mambo a mambo awama’ pa kuba’mba tusapwilenga bantu bavula.—1 Ko. 9:23.