Kusapwila Mambo Awama ku Bantu Bavula
1. Bena Kilishitu batanshi baubilepo ka pa kuba’mba basapwile mambo awama ku bantu bavula?
1 Baana ba bwanga batanshi ba kwa Yesu bakebanga bingi kusapwila mambo a Bufumu. Baingijishenga mashinda awama a kusapwilamo mambo awama ku bantu bavula. Banembi ba Baibolo ba bwina Kilishitu banembele mabuku abo mu mulaka wa Kingiliki wayukile bavula, mambo ye wajinga mulaka mukatampe waingijishiwanga mu bena Loma. Kabiji basapwishi ba mambo awama ba mu myaka kitota kya bubiji ne kya busatu C.E. kampe bo bajinga batanshi kwingijisha mabuku anembelwe ku maboko, mambo apelele kukila mivungilo pa kukeba byambo.
2, 3. (a) Nga Isaya 60:16 ubena kufikizhiwa byepi mu ano moba? (b) Nga biñambañamba bibena kwingijishiwa byepi kutwala bupopweshi bwa kine palutwe?
2 Kwingijisha Biñambañamba: Yehoba waambijile jimo kupichila mwi ngauzhi Isaya amba: “Ukamwa ku mabele a mikoka ya bantu.” (Isa. 60:16) Mu kufikizhiwa kwa buno bungauzhi mu ano moba, bakalume ba Yehoba babena kwingijisha bintu byanema bya mikoka ya bantu kutwajilamo palutwe mwingilo wa busapwishi. Kya kumwenako, mu 1914 ma mashikopo saka akyangye kuvulamo ne, Bafunda Baibolo batendekele kutambisha mashikopo wa “Photo-Drama of Creation.” (Mashikopo wa Bilengwa na Lesa) Uno mashikopo wa maawala atanu na asatu, ne bipikichala byonse byakema bulongo kabiji ne nyimbo, wakwashishe bingi bantu bavula kumvwa mambo awama.
3 Lelo jino, bantu ba Lesa babena kwingijisha minkinyi ipulinta bukiji bukiji ne bingijisho bingila na makompyuta kunemba ma Baibolo ne mabuku alumbulula Baibolo mu milaka yavula. Mashinda engila bukiji bukiji abena kwingijishiwa kutwajilamo mabuku alumbulula Baibolo mu byalo 235 kabiji ne monse mwapela ntanda. Kupichila mu mupashi wanji, Yehoba wakwasha bakalume banji kwingijisha bulongo bino biñambañamba kabiji kyakwasha bantu bavula kufunda bukine bwa mu Baibolo kukilatu ne kala.
4. Lupimpu ka lwauba bamo mu bwikalo bwabo kuba’mba basapwile mambo awama ku bantu bavula?
4 Kupimpula Bwikalo: Bapopweshi bakine nabo batundaikwa kupimpula bwikalo bwabo kuba’mba basapwile mambo awama ku bantu bavula. Bamo bapezhako bwikalo bwabo pa kuba’mba bengilengako pakatampe mu mwingilo wa kusapwila. Bamo bavilukila kuji kukajilwa kukatampe kwa basapwishi ba mambo awama a Bufumu. Bakwabo nabo babayishako mwingilo wabo kupichila mu kufunda mulaka ungi.
5, 6. Ki ka kyakonsha kubiwa pa kuba’mba musapwile bantu bavula baji mu nyaunda yenu?
5 Kabiji twakonsha kusapwila mambo awama ku bantu bavula kupichila mu kusapwila pa kimye bantu kyo batanwa pa mazubo kabiji ne kuya ku mpunzha ko bakonsha kutanwa. Umvwe bantu mu nyaunda yenu javula kechi batanwa tanwa pa mazubo kimye kya mute ne, abya mwakonsha kupimpula mutanchi wenu kuba’mba musapwilenga kimye kya mabanga nyi? Nanchi kujipo mapunzha mutanwa bantu bavula mo mwakonsha kusapwila nyi? Mwakyesekapo kala busapwishi bwa pa foni ne kusapwila mu manyaunda a busulu nyi? Nanchi mumonapo bimye bya kusapwila busapwishi bwa kushukilwa nyi?
6 Byo twashukwapo kwingilako uno mwingilo wa kusapwila jizhina ja Yehoba ne Bufumu! Twayai tutwajijile kubulako bantu bavula mambo a bukine apana bumi aji mu Mambo a Lesa.—Mat. 28:19, 20.