Mambo Ka Mwingilo Wa Ku Nzubo Ku Nzubo Kyo Anemena Ano Moba?

“Moba onsetu mu nzubo ya Lesa ne ku nzubo ku nzubo kechi balekele kufunjisha ne kusapwila mambo awama a Yesu Kilishitu, ne.”—BYU. 5:42.

1, 2. (a) Mu ñanyi mashinda a kusapwilamo bakamonyi ba kwa Yehoba mo bebayukila? (b) Kabiji tusakufundamo ka mu uno mutwe?

KINO kyayukanyikwa ku mikoka yonse panopantanda. Bantu babiji bavwala bulongo bakonsha kufika pa nzubo imo ne kutendeka kusapwila mwina nzubo mambo a mu Baibolo aamba pa Bufumu bwa Lesa. Kabiji umvwe wamwesha kizaku mu ano mambo, bakonsha kumumwesha buku walumbulula Baibolo ne kumwambila’mba bafundenga nanji lufunjisho lwa Baibolo lwakubula kulipilisha. Apa bino batwajijila ku nzubo ikwabo. Umvwe ne anweba ke mwingileko uno mwingilo, mukamona kuba’mba javula bantu bakemuyuka’mba mwi Bakamonyi ba kwa Yehoba, saka mukyangye ne kutendeka kwamba. Kya kine, twayukanyikilwa ku mwingilo wa kusapwila ku nzubo ku nzubo.

² Twingijisha mashinda apusana pusana mu mwingilo witupa Yesu wa kusapwila ne kulenga baana ba bwanga. (Mat. 28:19, 20) Tusapwila mu bisankanyi, mu mikwakwa, ne mu mapunzha mutanwa bantu. (Byu. 17:17) Twisamba na bantu bavula pa mafoni ne mu makalata. Tushilañena bukine bwa mu Baibolo na bantu bo tusambakana mu mingilo yo tuba pa juba ne juba. Tuji ne na keyala wa pa intaneti, wa kwingijisha pa kuba’mba tutane bukine bwa mu Baibolo mu milaka yakila pa 300.a Ano onse mashinda etuletela byawama. Bino mu mapunzha avula, tusampanya mambo awama ku nzubo ku nzubo. Kishina ka kya ano mashinda a kuya na kusapwila? Kabiji aingijishiwa byepi pakatampe na bantu ba kwa Lesa mu ano moba? Kabiji Kyanemena ka ano moba?

Mashinda Aingijishanga Batumwa

3. Mikambizho ka ya kusapwila Yesu yo apele batumwa, kabiji kino kya mwesha ka mu byo bafwainwe kusapwila?

³ Mashinda a kusapwila ku nzubo ku nzubo anembwa mu Binembelo. Yesu byo atumine batumwa kuya na kusapwila wibakambizhizhe’mba: “Mu mizhi yonse yo mukatwelamo, ipuzhaimo muntu wafwainwa.” Ñanyi jishinda jo bafwanyijilwe kukebelamo bantu bafwainwa? Yesu wibambijile kuya ku mazubo a bantu, amba: “Pa kutwela mu nzubo, bemunai; Kabiji umvwe nzubo yafwainwa, kibusa kyenu kikale ponka.” Abya bafwainwe kupembela kana muntu wibeta ku nzubo yanji nyi? Umvwai byambo bikwabo byaambile Yesu amba: “Kabiji wabula kwimutambula, ne kumvwa byambo byenu ne, pa kulupuka mu yoya nzubo, nangwa mu yewa muzhi, kakuntai lukungu lwa ku maulu enu.” (Mat. 10:11-14) Aye mikambizho yamweshatu patoka kuba’mba batumwa “baimene ke baye mu mizhi monse na kusapwila mambo awama,” bafwainwe kwitendekelako kuya na kufwakesha bantu ku mazubo abo.—Luka 9:6.

4. Kusapwila ku nzubo ku nzubo kikatakata kwatongolwa pepi mu Baibolo?

⁴ Baibolo waambishatu’mba batumwa bayanga na kusapwila ku nzubo ku nzubo. Kya kumwenako, Byubilo bya Batumwa 5:42 byaambile pe abo’mba: ‘Ne moba onsetu mu nzubo ya Lesa ne ku nzubo ku nzubo kechi balekele kufunjisha ne kusapwila mambo awama a Yesu Kilishitu, ne.’ Byo papichile myaka nobe 20, mutumwa Paulo wavulwilemo bakulumpe mu kipwilo kya mu Efisesa amba: ‘byo nabujile kuchina kwimubula nangwa kimotu kimuwamina, kasa nemufunjisha patoka, ku nzubo ku nzubo.’ Nanchi Paulo wafwakashijile bakulumpe saka bakyangye kwitabila nyi? Kya kine, wibafunjishishe, ne pa bintu bikwabo, bya “lulapilo lwa kwalulukila kwi Lesa, ne lwitabilo lwa kumwitabila Nkambo yetu Yesu Kilishitu.” (Byu. 20:20, 21) Kwambapo pa Byubilo bya Batumwa 20:20, muntu umo waambile’mba: “Kyanema bingi kuyuka’mba abe basapwishi basapwilanga ku nzubo ku nzubo.” (Buku wa kwa Robertson wa Word Pictures in the New Testament)

Nzhiye ya ano Moba

5. Mwingilo wa kusapwila wamweshiwa byepi mu bungauzhi bwa kwa Yoela?

⁵ Kusapwila kwaubiwe mu myaka kitota kitanshi kwajinga kiyukilo kya mwingilo wanema bingi ubena kwingijiwa mu ano moba. Ngauzhi Yoela waesakenye mwingilo wa kusapwila wa bena Kilishitu bashingwa ku bilongolo byonauna bintu kuvwangakotu ne nzhiye. (Yoe. 1:4) Byonka byenda nzhita, ne nzhiye nayo ilukuka bintu, kutwela mu mazubo, ne konauna byonse byo yatana. (Tangai Yoela 2:2, 7-9.) Bantu ba Lesa ano moba nabo bakoselamo bingi na kwingila bulongo mwingilo wa kusapwila! Jishinda janema jingijisha bena Kilishitu bashingwa ne balunda nabo ba ‘mikooko ikwabo’ mu kufikizha buno bungauzhi ke kusapwila ku nzubo ku nzubo. (Yoa. 10:16) Atweba Bakamonyi ba kwa Yehoba twaubile byepi pa kuba’mba tulondele jishinda ja kusapwilamo jaingijishanga batumwa?

6. Mu 1922, ñanyi lutundaiko lwapainwe ku Bakamonyi lwa kuya ku nzubo ku nzubo, kabiji bamo baubilepo byepi?

⁶ Kufuma mu 1919, kyaambiwapo bingi kuba’mba mwina Kilishitu yense wafwainwa kwingilako mwingilo wa kusapwila. Kya kumwenako, mutwe waamba’mba: “Mwingilo Wanema” wajinga mu Kyamba kya Usopa kya Kizungu kya August 15, 1922, wavulwilemo “bena Kilishitu bashingwa pa buneme bwa kutwala mambo awama ku bantu ne kwamba nabo ku mazubo abo, ne kwi basapwila’mba bufumu bwa mwiulu buji pepi.” Byambo byavula byanembelwe mu Bulletin (utelwa luno amba Mwingilo Wetu wa Bufumu). Nangwa byonkabyo, aba basapwilanga ku nzubo ku nzubo bajingatu bacheche. Bamo balekele kusapwila. Baambile bintu byavula bibalengejile kubula kwingila uno mwingilo. Pano bino lukatazho lo bajinga nalo ke lwa kuba’mba, bamo benemekele bingi ne kumona’mba kechi bakonsheshe kusapwila ku nzubo ku nzubo ne. Byo kwajinga lutundaiko lwa kwingila pakatampe mwingilo wa mu bujimi, bavula balekele kupwanañana na jibumba ja Yehoba.

7. Mu ma 1950 mwingilo ka wakebewenga kwingijiwa?

⁷ Mu myaka yalondejilepo, bantu bavula bevwangile mu mwingilo wa kusapwila. Onkao mambo, kyamwekeshetu patoka kuba’mba lufunjisho lwa pa bunke lwa kuya na kusapwila ku nzubo ku nzubo lwakebewenga. Twayai tumone kya kumwenako kimo mu kyalo kya United States. Ku ntendekelo ya mu ma 1950, Bakamonyi bachechetu bo basampenyenga matalakiti nangwa kwimana mu mikwakwa na kupana magazini. Bakamonyi bavula kechi basapwijilenga kimye kyonse ne. Ki ka kyafwainwa kubiwa pa kukwasha bena Kilishitu bonse bepana kuba’mba basapwilenga ku nzubo ku nzubo?

8, 9. Lufunjisho ka lwatendekele mu 1953, kabiji byawama ka byafuminemo?

⁸ Pa kupwila kukatampe kwa mikoka kwajinga mu Muzhi wa New York mu 1953, bantu bateleko muchima ku mwingilo wa ku nzubo ku nzubo. Mulongo Nathan H. Knorr waambile’mba mwingilo wa bakulumpe ba bwina Kilishitu bonse ke wa kukwasha Bakamonyi bonse kuya na kusapwila ku nzubo ku nzubo kimye kyonse. Waambile’mba “bonsetu bafwainwa kusapwila mambo awama ku nzubo ku nzubo.” Kwajinga lunengezho lwa kutendeka kufunjisha basapwishi mwaya ntanda yonse kuba’mba bengilenga uno mwingilo. Aba bonse babulanga kuya na kusapwila ku nzubo ku nzubo be bafunjishishe bya kusolomoka bantu ku mazubo abo, kwisamba nabo byambo bya mu Baibolo, ne kukumbula mepuzho abo.

⁹ Mu luno lufunjisho mwafumine bintu byawama bingi. Myaka jikumi yapichilepo, basapwishi bavujile bingi na mapesenti 100, kibelengelo kya kubwelako ku bamwesheshe lusekelo kyaijileko palutwe na mapesenti 126, ne mafunjisho a Baibolo avujile na mapesenti 150. Lelo jino basapwishi ba Bufumu bafika pepi nobe ku mamilyonyi atanu na abiji babena kusapwila mambo awama ntanda yonse. Awe mwingilo waingijiwa kyo kiyukilo kya kuba’mba Yehoba wakwasha bantu banji mu mwingilo wa kusapwila ku nzubo ku nzubo.—Isa. 60:22.

Kubika Bantu Kayukilo ka Lupulukilo

10, 11. (a) Kimwesho ka Ezikyo kyo ba mupele, kyanembwa mu Ezikyo kitango 9? (b) Kabiji akya kimwesho kyafikizhiwa byepi mu ano moba etu?

¹⁰ Mwingilo wanema wa ku nzubo ku nzubo wamweshiwa mu kimwesho kyo ba mupele ngauzhi Ezikyo. Mu kyokya kimwesho, Ezikyo wamwene banabalume batanu na umo bonse pa muntu pa muntu basendele bya kwipayañenako mu maboko abo, ne mukachi kabo mwajinga muntu mukwabo wavwajile kisapi kya linenyi, wapakachile fukuta mwajinga bya kunembako. Awa muntu wavwajile kisapi kya linenyi bamwambijile’mba: “Pitañana mu muzhi,” ne ‘kukabika tuyukilo pa bilungi bya bantu bekizha byefu ne kubinza na mambo a bya bunya byo babenakuba monka.’ Panyuma ya kubika tuyukilo, banabalume batanu na umo basendele bya kwipayañenako, bebakambizhizhe kwipaya bonse babujile kayukilo.—Tangai Ezikyo 9:1-6.

¹¹ Twayuka kuba’mba mu kufikizhiwa kwa bubwe bungauzhi, muntu “wavwajile kisapi kya linenyi” wimenako bena Kilishitu bashingwa bashalapo. Kupichila mu kusapwila ne kulenga baana ba bwanga, jibumba ja bena Kilishitu bashingwa jibika tuyukilo pa boba baaluka ke ‘mikooko ikwabo’ ya kwa Kilishitu. (Yoa. 10:16) Nanchi kayukilo ko ka ka? Ke byubilo bimweshiwa, uba nobe pa bilungi byabo bijitu patooka, kuba’mba aye mikooko ipana, bo baana ba bwanga ba batizhiwa ba kwa Yesu Kilishitu ne kuvwala bumuntu bupya bwa kwa Yesu. (Efi. 4:20-24) Aba babumukooko baikala kisaka kimo na bena Kilishitu bashingwa ne kwibakwasha mu mwingilo wabo wanema wa kuleta bantu bakwabo.—Lum. 22:17.

12. Kimwesho kya kwa Ezikyo kyaamba pa kubika tuyukilo pa bilungi kimwesha byepi buneme bwakutwajijila na kukeba boba babumukooko?

¹² Kimwesho kya kwa Ezikyo kyalumbululapo kishinka kimo ene mambo kutwajijila kuya nakukeba “bantu bekizha byefu ne kubinza” kyo kukebewa kwingijiwa bukiji bukiji. Mambo bumi bwa bantu buji mu kizumba. Katatakatu, nzhita ya bilengwa bya kwa Yehoba bya mwiulu, bibena kwimenako banabalume batanu na umo basendele bya kwipayañenako, bakepaye boba bonse babula tuyukilo. Mutumwa Paulo wanembele’mba juba jibena kwiya ja luzhachisho lwa Nkambo Yesu, byo akeya pamo na ba “malaika baji na bulume bukatampe,” ne ‘kushinkanya nabo babula kuyuka Lesa, ne aba babula kukokela mambo awama a Nkambo yetu Yesu.’ (2 Tesa. 1:7, 8) Yukai kuba’mba bantu bakebazhachisha kwesakana nabyo batambwila mambo awama. Onkao mambo, mambo a Lesa abena kusapwilwa afwainwa kutwajijila kufika ne ku mpelo. (Lum. 14:6, 7) Kino kyaleta mutembo wabaya ku bakalume ba kwa Yehoba bepana.—Tangai Ezikyo 3:17-19.

13. (a) Ñanyi mwingilo wasakishe kwingila mutumwa Paulo, kabiji mambo ka? (b) Mwingilo ka ye musakisha kwingijila bantu bo mutana mu nyaunda mo musapwila?

¹³ Mutumwa Paulo wasakishe kusapwila mambo awama ku bantu. Wanembele’mba: ‘Ku Bangiliki ne ku bantutu, kabiji ne ku ba maana ne ku babulao. Onkao mambo ami mwine nasakishatu kusapwila mambo awama ne kwi anweba muji mu Loma.’ (Loma 1:14-15) Paulo wasanchile pa lusa lo bamumwesheshe, onkao mambo ne aye wibomvwijile lusa bantu ne kwibakwasha kumwenamo mu lusa lwa Lesa byonka aye byo amwenejilemo. (1 Timo. 1:12-16) Kyamwekelengatu nobe uji na nkongole ku muntu yense ye atana, nkongole yafwainwa kubwezhiwa kupichila mu kusapwila mambo awama ku yewo muntu. Abya ne anweba mwiumvwa’mba muji na nkongole ku bantu ba mu nyaunda yenu nyi?—Tangai Byubilo bya Batumwa 20:26, 27.

14. Ñanyi kishinka kikatampe kitulengela kusapwila ku bantu bonse ne ku nzubo ku nzubo?

¹⁴ Byonka byo kyanema kuzhikijila bumi bwa muntu, byo byo kyakilapo kunema kuya na kusapwila ku nzubo ku nzubo. Mu bungauzhi bwanembwa mu Malakai 1:11, Yehoba waamba’mba: “Mambo jizhina jami jatumbalala mu mikoka ya Bantu kufuma ku musela kufika ku muzhika, kabiji . . . jizhina jami jalambulwa milambo yalumbuluka konse konse, mambo jizhina jami jatumbalala mu mikoka ya bantu.” Mu kufikizhiwa kwa buno bungauzhi, bakalume ba Yehoba bepana babena kutota jizhina ja Yehoba ntanda yonse saka bekepesha mu kwingila mwingilo wabo. (Sala. 109:30; Mat. 24:14) Kupana “kitapisho kya kutota” kwi Yehoba kyo kintu kikatampe kyakijishapo kunema kitulengela kusapwila patoka ne ku nzubo ku nzubo.—Hebe. 13:15.

Moba Akatazha Akamweka Kulutwe

15. (a) Bena Isalela bazhokolokele byepi pakatampe muzhi wa Yeliko pa juba ja butanu na bubiji? (b) Kino kimwesha ka ku mwingilo wa kusapwila?

¹⁵ Ñanyi bintu bikobiwa kulutwe na lwendo mu mwingilo wa kusapwila? Kulukukwa kwa Yeliko, kwanembwa mu buku wa Yoshua, kwitupa kya kumwenako. Vulukai kuba’mba Yehoba saka akyangye konauna muzhi wa Yeliko, bena Isalela bebakambizhizhe kuzhokoloka muzhi jimotu mu moba atanu na jimo. Juba ja butanu na bubiji, bafwanyijile kwibikishako na ngovu. Yehoba waambijile Yoshua amba: “Pa juba ja butanu na bubiji mukazhokolokenga muzhi jitanu na jibiji, bañanga kasa bemba pa matolompita. Kabiji byo bakemba pa lusengo wa mukooko mulume jiwi jalepa, . . . bantu bonse bakabijike na jiwi jikatampe; kabiji ne nsakwa ya muzhi ikakunduka panshi laa.” (Yosh. 6:2-5) Akino kyamwesha kuba’mba ne ano moba mwingilo wa kusapwila ukengijiwa bingi. Kwakubula nangwa kuzhinaukatu ne, mu kimye kya lonaiko lwa bintu bya ino ntanda, tukamona mwingilo wa kusapwila kukatampe ukengijiwa mu jizhina ja Lesa ne Bufumu ne bintu bikobiwa mu ino ntanda.

16, 17. (a) Bintu ka bikobiwa “malwa akatampe” saka akyangye kupwa? (b) Tukesambapo ka mu mutwe walondelapo?

¹⁶ Kimye kikafika mambo o tusapwila byo akekala nobe “jiwi jikatampe.” Mu buku wa Lumwekesho, byambo bya luzhachisho bebipashañanya ku ‘mvula wa mabwe akatampe, afuma mwiulu pamo nobe lutalenta.”b Kabiji Lumwekesho 16:21 waamba’mba: “Mwalo waji mukatampe mwine.” Kechi twayukisha mwingilo wa ku nzubo ku nzubo byo akengijiwa pakatampe mu kusapwila byambo bya luzhachisho ne. Bino twaketekela kuba’mba “malwa akatampe” saka akyangye kupwa, jizhina ja Yehoba jikayukanyikwa kukila ne byo jayukanyikilwe kala.—Lum. 7:14; Ezi. 38:23.

¹⁷ Byo tubena kupembelela bintu bikatampe kumweka kulutwe na lwendo, twayai tutwajijile saka twaswikwa na mwingilo wa kusapwila mambo awama a Bufumu. Pa kwingila uno mwingilo, makatazho ka o tupitamo ku nzubo ku nzubo, kabiji twakonsha kwiashinda byepi? Ano mepuzho akakumbulwa mu mutwe walondelapo.

[Tubyambo twa mushi]

Musakukumbula’mba ka?

• Binembelo ka byaamba pa mwingilo wa kusapwila ku nzubo ku nzubo?

• Mwingilo wa ku nzubo ku nzubo waambiwapo byepi mu ano moba?

• Mambo ka bakalume ba kwa Yehoba bepana kyo baikela na mutembo wa kusapwila?

• Moba ka akatazha akamwekana kulutwe na lwendo?

[Bipikichala pa peja 4]

Nanchi ne anweba mwingila nobe mutumwa Paulo mu mwingilo wa kusapwila ku bantu bakwabo nyi?

[Kipikichala pa peja 5]

Mulongo Knorr, mu 1953