Fwenyai Kwipi Ne Lesa
“Yehoba Utala mu Muchima”
MWEKELO yakonsha kwituluwika. Muntu byo aji pangye kechi kimwesha’mba byobyo aji mukachi ka muchima wanji ne. Bantu bamonatu muntu byo aji pangye. Pakuba Yehoba utala mukachi ka muchima. Kino twikitana mu jishimikila jiji mu 1 Samwela 16:1-12.
Akifwanyikizhai byo kyajinga. Yehoba kyo kimye kyo akebelenga kushinga maanyi mfumu wakatataka mu mukoka wa bena Isalela? Lesa waambijile ngauzhi Samwela amba: ‘Pano yuzha lusengo wobe na maanyi, wimane, nkutume kwi Yese, mwina Betelema, mambo ami mwine nemwena mfumu monka mu baana banji.’ (Kyepelo 1) Yehoba kechi watongwele jizhina ne, waambiletu’mba uno wasalwa mwana Yese. Samwela byo ailenga ku Betelema, wafwainwa walangulukilenga’mba: ‘Nkayuka byepi’mba awe ye mwana Yese wasalululwa kwi Yehoba?’
Byo afikile ku Betelema, Samwela wanengezhezhe kitapisho amba Yese ne baana banji beye baje. Kabiji mwananji mukulumpe aye Eliaba byo afikile, Samwela wafikenejiletu wamutala byo amwekanyikilenga. Kimino kya kwa Eliaba kyamulengejile kulanguluka’mba wafikilamo kwikala mfumu, kabiji wiambijile’mba: “Kinetu ye asalulula Yehoba amba bamushinge maanyi waimana kala ku meso anji.”—Kyepelo 6.
Nangwa byonkabyo, Yehoba kechi byo byo amona ne. Wamwambijile Samwela amba: “Kutala ku kilungi kyanji nangwa ku kulepa kwa kimino kyanji ne, mambo amiwa namulengulula.” (Kyepelo 7) Yehoba kechi wakomokele kulamba nangwa kulepa kwa kimino kya kwa Eliaba ne. Yehoba umona byonse, muntu byo aji mu muchima ne byo amweka.
Yehoba wamulumbulwijile Samwela amba: “Kechi umona pamo byonka byo bamona bantu ne; mambo muntu utalatu pangye ya muntu, pakuba aye Yehoba utala mu muchima.” (Kyepelo 7) Ee, muchima nangwa’mba muntu wa mukachi, byubilo ne ndangulukilo yanji byo byanema kwi Yehoba. “Yehoba [utalatala] mu michima” ya bantu wamukaine Eliaba pamo na bakwabo baana ba kwa Yese batanu na uno bajinga bakulumpe pe Davida.—Byambo bya Mana 17:3.
Yese wajinga na mwana mukwabo aye Davida mwanyike pa bonse, ‘wafunganga mikoko.’ (Kyepelo 11) Davida bakamwichile ko ajinga ne kwiya kwi Samwela. Ponkapo, Yehoba wamwambijile Samwela amba: “Imana, umushinge manyi, mambo i ye uno.” (Kyepelo 12) Kya kine, Davida “walambile bingi, wajinga wawama pa kumutala.’’ Bino muchima wanji ye wamulengejile kwitabilwa ku meso a Lesa.—1 Samwela 13:14.
Mu ino ntanda mo banemeka kulamba, twakonsha kutana lutekenesho pa kuyuka’mba Yehoba Lesa kechi ongolwa na bimwekana bantu pangye ne. Kyanema kwi aye kechi kulepa kwa kimino kyenu nangwa kulamba kwenu ne. Ke byo muji mukachi ka muchima wenu, kyo kyanema kwi Yehoba. Nanchi kuyuka kino kwakonsha kwimulengela kukeba kwikala na byubilo byawama ne kutalwa bulongo ku meso a Lesa nyi?