Monainga Kukokoloka mu Bintu bya ku Mupashi

“Tambulai kikonkoji kyami . . . ne anweba mukamona kukokoloka kwa michima yenu.” —MAT. 11:29.

1. Lesa wabikileko lunengezho ka ku mutumba wa Sinai, kabiji mambo ka?

MIZHILO ya lulayañano byo yapainwe ku Mutumba wa Sinai, yavwangilemo ne Sabado waubiwanga pa mulungu pa mulungu. Kupichila mwi Mosesa wajinga wa kumwambilako, Yehoba wakambizhe mukoka wa bena Isalela amba: “Moba atanu na jimo mukengilanga mingilo yenu; bino mu juba ja butanu na bubiji mukakokoloke; amba ñombe wenu ne mbongolo wenu nabo bakokoloke, kabiji mwana muzha wenu ne mwenyi batushe.” (Lupu. 23:12) Ee, na mambo a kulangulukilako boba bajinga mu Mizhilo, Yehoba mu butemwe bwanji wanengezhezhe juba ja kuba’mba bantu banji bakonshe ‘kutusha.’

2. Bena Isalela bamwenejilengamo byepi mu kulama juba ja Sabado?

² Nanchi juba ja Sabado jajinga ja kukokoloka nyi? Ine, jajinga juba janema bena Isalela jo bapopwelangamo Yehoba. Kulama juba ja Sabado kwalengelanga mitwe ya bisemi kwikalako na kimye kya kufunjisha bisemi byabo ‘kwendanga mu jishinda ja Yehoba.’ (Nte. 18:19) Kabiji jino juba jalengelanga ba mu kisemi ne balunda nabo kukonkana pamo mu kulanguluka pa byubilo bya Yehoba ne kupwanañana mu butemwe. (Isa. 58:13, 14) Ne kyakijilemo kunema, jaimenangako bungauzhi bwaambijile jimo pa kimye kyo kukekala kukokoloka kwa kine kupichila mu Bukalama bwa kwa Kilishitu bwa Myaka Kiumbi Kimo. (Loma 8:21) Pano ibyepi pa mambo a moba o tubena kwikalamo? Kwepi bena Kilishitu bakine bakeba kulondela mashinda a Yehoba ko bakonsha kutana kukokoloka, kabiji mu ñanyi jishinda?

Monai Kukokoloka Kupichila mu Kupwanañana na Bena Kilishitu Bakwenu

3. Mu ñanyi jishinda bena Kilishitu batanshi mo bekwashishanga abo bene na bene, kabiji ki ka kyafuminemo?

³ Mutumwa Paulo walumbulwile kipwilo kya bena Kilishitu kuba’mba “jo jipanda ne jikinko ja bukine.” (1 Timo. 3:15) Bena Kilishitu batanshi bekwashanga kupichila mu kwitundaika ne kwikomesha abo bene na bene mu butemwe. (Efi. 4:11, 12, 16) Byo ajinga mu Efisesa, Paulo watundaikilwe kupichila mu kumufwakesha ku bakwabo ba mu kipwilo kya mu Kolinda. Akimonai bintu byafuminemo Paulo byo aambile amba: “Nasekela pa kwiya kwa Setefanusa, ne Fotunatusa, ne Akayikusa: Mambo bangikizha muchima wami.” (1 Ko. 16:17, 18) Kabiji Titusa byo ayile ku Kolinda mu kwingijila balongo, Paulo wanembejile nkalata kipwilo kwibambila amba: “Mwamwikizhe muchima wanji anweba bonse.” (2 Ko. 7:13) Po pamotu ne lelo jino, Bakamonyi ba kwa Yehoba batana kukokoloka kwa kine kupichila mu kupwanañena pamo na bena Kilishitu bakwabo mu kwikosesha.

4. Kupwila kwa kipwilo kwitukokolosha byepi?

⁴ Mwayukishatu kuba’mba kupwila kwa kipwilo kuleta lusekelo lukatampe. Pa kuno kupwila ‘twikwasha atwe bene na bene, bonse na lwitabilo lwa mukwabo.’ (Loma 1:12) Balongo ne banyenga yetu bena Kilishitu kechi balongo ba jizhinatu byonkabya ne. Ke balunda netu bakine botwatemwa ne kunemeka. Twikala bingi na lusekelo ne kutekeneshiwa kupichila mu kukonkena pamo pa kupwila kwetu kimye kyonse.—File. 7.

5. Twakonsha kwikokolosha byepi atweba bene na bene pa kushonkena kwa nkambi, kubuñana kwa mwanzo ne kwa juba jimo?

⁵ Kabiji tumona kukokoloka kupichila mu kushonkena kwa nkambi, kubuñana kwa mwanzo ne kwa juba jimo ko twikala nako. Kabiji kununga pa kutambwila mema apana bumi a bukine a mu Mambo a Lesa, Baibolo, kuno kupwila kwitupa jishuko ja ‘kubayisha michima yetu’ mu kupwanañana na bakwetu. (2 Ko. 6:12, 13) Pano ibyepi inge kya kuba twi ba bumvu kabiji kitukatazha kwisamba na bantu? Jishinda jimo ja kwipwilulukilamo na balongo ne banyenga yetu ke kwisamba nabo pa kushonkena kwa nkambi. Panyuma ya kwingilako mingilo ya pa kukonkana kwa byalo, nyenga umo waambile amba: “Kechi nayukilepo nangwa umo ne, kanatu kisemi kyami ne balunda nami.” Bino byo naingijilenga mwingilo wa kuwamisha, namonañene na balongo ne banyenga bavula bingi. Kyawamine bingi.”

6. Ñanyi jishinda jimo jo twakonsha kwikelamo na lusekelo kimye kyo twikala na moba a kukokoloka?

⁶ Bena Isalela bayanga na kupopwela ku Yelusalema byo baikalanga na bijiilo bisatu pa mwaka. (Lupu. 34:23) Kino kyalumbulwilenga kusha majimi abo, mashitolo kabiji ne kwenda panshi mu mashinda a lufukuchi pa moba avula. Nangwa byonkabyo, kuya ku nzubo ya Lesa kwibalengelanga kwikala na “lusekelo lukatampe” mambo aba batanwangako “batotelenga Yehoba.” (2 Moba. 30:21) Bakamonyi ba kwa Yehoba bavula lelo jino nabo batana kuba amba kwendela pamo na kisemi kyabo kuya na kufwakasha pa Betele, ko kuba amba bishimikwa bya musampi bya Bakamonyi ba kwa Yehoba mufuma lusekelo lukatampe. Nanchi kechi mwakonsha kunengezha kufwakesha pamo na kisemi kimye kyo mukekala na kukokoloka nenyi?

7. (a) Bya kisangajimbwe byakonsha kwitulengela byepi kumwenamo? (b) Ki ka kyakonsha kulengela bya kisangajimbwe kwikala bya kutundaikañana?

⁷ Kukonkena pamo na kisemi ne balunda netu kimye kya bya kisangajimbwe kwakonsha kwitutundaika bingi. Mfumu wa maana Solomone waambile amba: “Nanchi kafwako kyakila kino ne, kya kuba’mba muntu aje ne kutoma ne kusekela mu mingilo yanji.” (Sapwi. 2:24) Bya kisangajimbwe kechi bikokoloshatu michima yetu ne, bino bikosesha ne butemwe bwetu na bakwetu bena Kilishitu byo twibayuka bulongo. Pa kuba amba bino bya kisangajimbwe bitundaikañanenga, kyakonsha kuwama kwitakotu bantu bacheche pa kuba amba lunengezho lwende bulongo, kikatakata inge kya kuba paji ne tubinyu.

Mwingilo wa Kusapwila Ukokoloshañana

8, 9. (a) Ambai lupusano lwajinga pakachi ka byambo bya kwa Yesu ne bya Bafaliseo. (b) Tumwenamo byepi mu kusapwila bukine bwa mu Baibolo?

⁸ Yesu wabambakene bingi mu mwingilo, kabiji watundaikile baana banji ba bwanga kwikala ba bambakana. Kino twikiyukila mu byambo byanji byaamba amba: “Bujimi bwa kunowa bwabayisha kine, pakuba ba kunowabo bakepa. Byonkabyo lombai ku Mwina bujimi atume bantu ba kunowa mu bujimi bwanji.” (Mat. 9:37, 38) Byambo byafunjishanga Yesu byakokoloshanga bingi, mambo byajinga “mambo awama.” (Mat. 4:23; 24:14) Byambo byanji byapusene bingi na mafunde akatezhe a Bafaliseo o bakambizhanga bantu kulondela.—Tangai Mateo 23:4, 23, 24.

⁹ Kimye kyo tusapwila mambo a Bufumu ku bakwetu, twibakokolosha ku mupashi, kabiji pa kimye kimotu tumvwisha bukine bwanema bwa mu Baibolo. Nyimbi wa masalamo waambile amba: “Totai Yehoba anweba bonse; Mambo kyo kyawama kumwimbila Lesa wetu nyimbo ya kumutota; Mambo kyo kitutokela ku muchima.” (Sala. 147:1) Nanchi mwakonsha kubulako bakwenu lusekelo lo mwatana mu kutota Yehoba nyi?

10. Nanchi kwingila bulongo mu mwingilo kwaimena pa kuswa kwa bantu mambo o twibatwajila nyi? Londololai.

¹⁰ Kya kine, mu mapunzha amo bantu batambwila bingi mambo awama kukila mu mapunzha akwabo. (Tangai Byubilo 18:1, 5-8.) Umvwe mwikala mu mpunzha bantu bavula mo babula kutambwila mambo a Bufumu, teshainga muchima pa bintu byawama byo mutana mu mwingilo. Vulukainga kuba’mba kechi mushimuna jizhina ja Yehoba patutu ne. (1 Ko. 15:58) Kabiji kunungapo, kwingila bulongo mu mwingilo kechi kwaimena pa bitambulwila bantu mambo awama ne. Twakonsha kuketekela amba Yehoba ukatwajijila kumona amba bantu bamichima yawama baji na jishuko ja kutambwila mambo a Bufumu.—Yoa. 6:44.

Kupopwela kwa Kisemi Kukokoloshañana

11. Bansemi bebapa ñanyi mwingilo kwi Yehoba, kabiji bakonsha kumwingila byepi?

¹¹ Bansemi bakamwa Lesa baji na mwingilo wa kufunjisha baana babo pe Yehoba ne mashinda anji. (Mpitu. 11:18, 19) Umvwe mwi bansemi, nanchi munengezhapo kimye kya kufunjisha baana benu pe Shetu wa mwiulu wa butemwe nyi? Pa kuba’mba kimukwashe kwingila uno mwingilo wanema ne kukwasha kisemi kyenu mu byo bakeba, Yehoba wimupa kajo kawama kavula ka ku mupashi kupichila mu mabuku, magazini, mavidyo ne matepu.

12, 13. (a) Bisemi byakonsha kumwenamo byepi mu kwikala na Kupopwela kwa Kisemi? (b) Bansemi bakonsha kumona byepi kuba amba kupopwela kwabo kwa kisemi kubena kukokolosha baana babo?

¹² Kunungapo, jibumba ja kalume wakishinka kabiji wa maana jabikako lunengezho lwa kwikala na Kupopwela kwa Kisemi. Kino ke kimye kya kwikelamo na lufunjisho lwa Baibolo lwa kisemi lwikalako mulungu ne mulungu. Bavula batana kuba amba luno lunengezho lwibalengela kukwatankana mu butemwe kabiji lwakosesha bingi bulunda bwabo ne Yehoba. Pano bansemi bakonsha kumona byepi kuba amba kuno kupopwela kwa kisemi kubena kukokolosha baana babo ku mupashi?

¹³ Kupopwela kwa Kisemi kechi kwafwainwa kubiwa na mukose nangwa kwikala kisendwa ku ba mu kisemi ne. Mambo twayuka namba tupopwela ‘Lesa wa lusekelo’ kabiji ukeba ne atweba kumupopwela na lusekelo. (1 Timo. 1:11; Fili. 4:4) Kwikalako na kimye kya kwisambilamo bukine bwanema bufuma mu Baibolo mufuma bintu byawama bingi. Bansemi bakonsha kupimpulako mashinda a kufunjishishamo, kwesakana na biji bintu pa kyokyo kimye. Kyakumwenako, kisemi kimo kyaswishishe mwanabo wamulume wa jizhina ja Brandon wa myaka ya kusemwa jikumi kukumbula bwipuzho bwa kuba’mba “Mambo ka Yehoba o aingijishishe Muloolo Kwimenako Satana?” Buno bwipuzho bwamukatezhe bingi Brandon mambo watemwa miloolo, kabiji waumvwine bingi kutama ku muchima kumona kuba’mba miloolo beyesakanya kwi Satana. Kimye kimo bisemi bimo bikaya makayo a mu bifwanyikizho bya mu Baibolo, bonse ba mu kisemi bekalako na lubaji lwa kufwanyikizha bantu ba mu Baibolo nangwa kwiabanya kutanga byambo bya mu Baibolo. Ano mashinda a kufunjilamo kechi awamatu ne, bino akonsha ne kulengela baana benu kwivwangamo, pa kuba’mba mafunde a mu Baibolo ebafike pa muchima.a

Chinuzhukainga Bintu Byakonsha Kwimulefula

14, 15. (a) Bintu byavula bileta bulanda ku bantu ne kwibalengela kupopomenwa byavula byepi mu ano moba a kupelako? (b) Bintu ka bileta bulanda bukatampe byo twakonsha kupitamo?

¹⁴ Mu ano moba apelako a byubilo byatama kuji bintu byavula bileta bulanda ku bantu ne kwibalengela kupopomenwa. Kukepa kwa makito ne makatazho a bya mali byalengela bantu bavula kuyanda. Nangwa boba baji pa mingilo batana kuba amba mali o bafola kechi afikilamo kwibakwasha ne kukwasha bisemi byabo ne. (Esakanyaiko Hagai 1:4-6.) Bamulwila ntanda ne bantangi bakwabo kechi bakonsha kukwasha bantu bulongo ne, mambo bakankalwa kufumyapo bumbanzhi ne bintutu bikwabo byatama. Bantu bavula balefulwa na mambo a bilubo byabo.—Sala. 38:4.

¹⁵ Bena Kilishitu bakine nabo bapita mu ano makatazho a mu buno bwikalo bwatama bwa kwa Satana. (1 Yoa. 5:19) Bimye bimo, baana ba bwanga ba kwa Kilishitu bapita mu bintu bimo bibaletela bulanda bukatampe byo bebikishako kwikala bakishinka kwi Yehoba. Yesu waambile amba: “Inge bampachile amiwa, kabiji bakemupata ne anweba.” (Yoa. 15:20) Nangwa “twapangwapangwa” bino “kechi twashalatu bunke ne.” (2 Ko. 4:9) Mambo ka?

16. Ki ka kyakonsha kwitukwasha kutwajijila kwikala ba lusekelo?

¹⁶ Yesu waambile amba: “Iyai ko nji, anweba bonse basulwila na mingilo ne kunemenwa, ne amiwa nkemukokolosha.” (Mat. 11:28) Inge twaketekela kya kine mu lunengezho lwa bukuzhi bwa kwa Kilishitu ko kuba’mba twibika mu maboko a Yehoba mu bukifwanyikizho. Ne mu jino jishinda, twikala na “bukata bwine bwa bulume.” (2 Ko. 4:7) “Nkwasho” nangwa’mba mupashi wazhila wa Lesa ukosesha lwitabilo lwetu kechi na mambo a kuba amba tukonshe kuchinchikatu makatazho o tupitamo ne, bino ne kutwajijila kwikala ba lusekelo.—Yoa. 14:26; Yako. 1:2-4.

17, 18. (a) Twafwainwa kuchinuzhuka ñanyi mupashi? (b) Ki ka kyakonsha kufumamo umvwe twata muchima ku makayo abula kufwainwa?

¹⁷ Bena Kilishitu bakine lelo jino bafwainwa kujimuka kuchina amba bakongolwa na mupashi wa bya kisangajimbwe byatama wa panopantanda. (Tangai Efisesa 2:2-5.) Inge twabula kujimuka, twakonsha kongolwa na bya “lwiso lwa mubiji, ne lwiso lwa meso, ne kwitota kwatu kwa buno bumi.” (1 Yoa. 2:16) Nangwa kampe mu bulubi twakonsha ketuketekele kuba amba kulondela lwiso lwa mubiji kuketulengela kukokoloka. (Loma 8:6) Kyakumwenako, bantu bamo bengijisha bizhima, bya kutoma bipendañana, kutamba bipikichala bya bantu baji mulekese, bisela bya lubekyo ne kubatu bintu bikwabo byatama pa kuba amba bekale na lusekelo. Satana wingijisha “bya bujimuku” byanji kongwelamo bantu kupichila mu kwibamwesha bya kisangajimbwe byatama.—Efi. 6:11.

¹⁸ Kya kine, kuja, kutoma ne kwikala na bya kisangajimbwe byafwainwa kechi kwatama ne, kikulutu twibyuba na mushingi. Pano bino, kechi twafwainwa kunemekesha bino bintu mu bwikalo bwetu ne. Kwesakanya bintu ne kwikanya kwanema bingi, kikatakata mu ano moba etu. Kukebesha bintu bya ku mubiji kwakonsha kwitulengela ‘kwikalatu nangwa kubula kupanga bipangwa bya maana a kumuyuka Nkambo yetu Yesu Kilishitu.’—2 Pe. 1:8.

19, 20. Twafwainwa kutana byepi kukokoloka kwa kine?

¹⁹ Umvwe ketulanguluke pa bintu byaesakana na malamuna a Yehoba, tukayuka kuba amba bya kisangajimbwe byonse bya mu ino ntanda ke byatutu. Mosesa wayukile kino, kabiji ne atweba twayuka. (Hebe. 11:25) Kishinka ke kya kuba amba kukokoloka kuleta lusekelo lwa kine kwiya kupichila mu kuba kyaswa muchima wa Shetu wa mwiulu.—Mat. 5:6.

²⁰ Twayai tukokolokelenga mu bintu bya ku mupashi. Inge twauba bino ko kuba’mba tubena ‘kukana bumbulwa kwakamwa Lesa ne bya lwiso lwa panopantanda . . . Kasa tutengela alwa luketekelo lwa lusekelo, ko kumweka kwa lukumo lwa Lesa mukatampe, Mupulushi wetu Yesu Kilishitu.’ (Titu. 2:12, 13) Onkao mambo, twayai tutwajijile kusenda kikonkoji kya kwa Yesu kupichila mu kunekenena lūsa ne lutangijilo lwanji. Umvwe twauba bino, tukatana lusekelo lwa kine ne kukokoloka.

[Tubyambo twa mushi]

Musakukumbula’mba Ka?

• Bantu ba Yehoba bakokoloka byepi lelo jino?

• Mwingilo wa kusapwila witukokolosha byepi pamo na boba bo tusapwila?

• Mitwe ya bisemi yakonsha kuba byepi pa kuba amba kupopwela kwa kisemi kwibakokoloshenga?

• Bintu ka bitulengela kubwela panyuma ku mupashi?

[Bipikichala pa peja 26]

Kupichila mu kutambula kikonkoji kya kwa Yesu, twikala na mashinda avula a kukokolokelamo