Bukwasho ku Bisemi

1. Muzhilo wa kulama juba ja Sabado wakwashishe byepi bisemi bya bena Isalela?

¹ Muzhilo wa kulama juba ja Sabado wajinga lunengezho lwawama bingi lwafumine kwi Yehoba lwakwashishe bisemi. Pa jino juba bena Isalela bakokolokanga pa kuba’mba bekalepo na kimye kya kulanguluka pa buwame bwa Yehoba ne pa bulunda bwabo ne aye. Bansemi kyo kimye kyo bafunjishanga baana babo Mizhilo ya Lesa. (Mpitu. 6:6, 7) Juba ja Sabado jalengelanga bantu ba Yehoba kwikalapo na kimye mu mulungu kya kutatu muchima ku bulunda bwabo na Lesa.

2. Muzhilo wa kulama juba ja Sabado witufunjishapo ka pe Yehoba?

² Mu ano moba Yehoba kechi ukikeba’mba bisemi bilamenga juba ja Sabado ne. Pano bino, uno muzhilo witufunjishapo kintu kimo pe Lesa. Ukebesha bingi bantu banji kwikala na bulunda bwawama ne aye pa kuba’mba bamwenengamo byawama. (Isa. 48:17, 18) Lelo jino, Yehoba ubena kumwesha byo etutemwa kupichila mu lunengezho lwa Kupopwela kwa Kisemi.

3. Ñanyi nkebelo ine ya Kupopwela kwa Kisemi?

³ Ñanyi Nkebelo ine ya Kupopwela kwa Kisemi? Mu January 2009, Lufunjisho lwa Buku lwa Kipwilo ne Kupwila kwa Mwingilo kwatendekele kwikalako pa juba jimotu. Kyalengejile kuba’mba luno lupimpu lwikaleko ke kukeba kuba’mba bisemi bikalenga na kimye kya kukosesha bulunda bwabo na Lesa kupichila mu kwikalapo na kimye mu mulungu kya kupopwela kwa kisemi. Bisemi byonse bebitundaikile kutendeka kwikala na lufunjisho lwa kisemi pa kimye paikelanga lufunjisho lwa buku, pa kuba’mba bengijishenga kino kimye kwisambilamo misambo ya mu Baibolo ne lufunjisho lwa kukwasha kisemi.

4. Nanchi bisemi byafwainwa kwikalangatu na ola umo wa kupopwela kwa kisemi nyi? Lumbululai.

⁴ Pa kuba’mba tutanweko ku Lufunjisho lwa Buku lwa Kipwilo twakebewanga kimye kya kuvwala, kwenda ne bintutu bikwabo. Atweba bavula pa kubatu’mba tushinkweko ku kuno kupwila kitutailanga kimye kyabaya kukila pa ola umo. Luno kupwila byo kwapimpulwa, tuji na kimye kyabaya kya kupopwela Yehoba na kisemi. Onkao mambo, kechi twafwainwa kubangatu Kupopwela kwa Kisemi mu ola umo ne. Pano bino, twafwainwa kupimanga kimye bulongo kwesakana biji ba mu kisemi ne bibena kukebewa.

5. Nanchi kimye kya kupopwela kwa kisemi kyafwainwa kupwatu na kwisamba na kisemi nyi? Lumbululai.

⁵ Nanchi Kimye kya Kupopwela kwa Kisemi Kyafwainwa Kupwatu na Kwisamba na Kisemi Nyi? Umvwe bamulume ne mukazhi ne baana ke besambile pamo Mambo a Lesa betundaika abo bene na bene. (Loma 1:12) Kisemi kikwatankena pamo. Onkao mambo, kwisamba Mambo a Lesa po pafwainwa kwimena Kupopwela kwa Kisemi. Bino, bonse mu kisemi bafwainwa kwikalangapo na lufunjisho lwa pa bunke. Kyakumwenako, panyuma ya kupwisha kwisamba na kisemi, kisemi kyakonsha kutwajijila na lufunjisho lwa bunke bunke, kampe na kunengezha kupwila nangwa kutanga magazini. Mu bisemi bimo bafuukulapo kuzhimya malangalanga pa kimye kyo babena kufunda.

6. Mwisambo wafwainwa kutangijilwa byepi?

⁶ Mwisambo Wafwainwa Kutangijilwa Byepi? Mwisambo kechi wafwainwa kwikalatu wa mepuzho ne mikumbu ne. Pa kuba Kupopwela kwa Kisemi kubulenga kuleta mukose, bisemi byakonsha kunengezha mutanchi wabo byonka biji mutanchi wa kupwila kwa mukachi ka mulungu. Kyakumwenako, bakonsha kutangila pamo Baibolo, kunengezha kupwila, ne kunengezha bya kwingila mu mwingilo. Pa jipa 6 paji mashinda amo omwakonsha kwingijisha.

7. Bansemi bafwainwa kwikala na muchima wa mutundu ka?

⁷ Bansemi Bafwainwa Kwikala na Muchima wa Mutundu Ka? Ba mu kisemi bakafundanga bulongo inge mwibakasulukila. Kimye kimo mwakonsha kwikela na kupopwela kwa kisemi pangye. Kijitu bulongo kwikalapo na tubimye tucheche twakukokoloka. Bisemi bimo banengezha bya kuja pa kupwisha. Kimye kya Kupopwela kwa Kisemi kechi kyo kimye kya kukajipila baana nangwa kwibapuma ne, bansemi bafwainwa kumonapo kimye kikwabo kya kujimwinamo mwanabo pa bintu byo atamisha nangwa pa muteeto watama ye aji nanji. Kyanema bingi kwisamba na mwanenu pa kimye kikwabo mu mulungu kwa bunke kuchina kumusebanya ku bakwabo. Kupopwela kwa Kisemi kechi kwafwainwa kwikala kwa kwishintaukila ne, kwafwainwa kwikala kwa lusekelo byonka biji Lesa ye tupopwela.—1 Timo. 1:11.

8, 9. Mitwe ya bisemi yafwainwa kunengezha byepi?

⁸ Mutwe wa Kisemi Wafwainwa Kunengezha Byepi? Kisemi kikamwenamo umvwe mutwe wa kisemi ke anengezhezhe jimo bulongo Kupopwela kwa Kisemi ne kumona byo bakesambapo. (Mana. 21:5) Kyawama mutwe wa kisemi kubulako mukazhanji byo anengezha. (Mana. 15:22) Mutwe wa kisemi wakonsha ne kwipuzha baana byo bakonsha kutemwa kwisambapo. Inge mwauba bino, mukayuka biji mu michima ya baana benu.

⁹ Mutwe wa kisemi kechi milungu yonsetu yoafwainwa kwikalanga kimye kyabaya na kunengezha ne. Ba mu kisemi bakonsha kutemwa mbaji imo ya mutanchi yo boba pa mulungu pa mulungu, onkao mambo, mutwe wa kisemi kechi wafwainwa kupimpulanga mutanchi yense kimye kyonse ne. Kyakonsha kuwama umvwe keanengezhe panyuma ya kupwisha lufunjisho saka akyangye kulubamo bintu bya ku mupashi bibena kukebewa mu kisemi. Mitwe ya bisemi imo inemba byo bakafundapo ne kulamika pakonsha kumona yense wa mu kisemi. Kino kilengela ba mu kisemi kutengela ne kwikala na kimye kya kunengezha.

10. Aba bekala bunke bakonsha kwingijisha byepi kimye kya Kupopwela kwa Kisemi?

¹⁰ Pano Inge Njitu Bunke Nakonsha Kuba Byepi? Aba bekala bunke bakonsha kuba lufunjisho lwa pa bunke pa kimye kya Kupopwela kwa Kisemi. Mu mutanchi wawama wa lufunjisho lwa pa bunke mwafwainwa kwikala kutanga Baibolo, kunengezha kupwila, kutanga Kyamba kya Usopa ne Awake! Basapwishi bamo bengijisha kino kimye kupeselapeselamo bintu byo bakeba. Bimye bimo bakonsha kwitako basapwishi bakwabo nangwa kisemi pakuba’mba besambile pamo ne kwitundaika na misambo ya mu Binembelo.

11, 12. Mukamwenamo ka mu kwikala na Kupopwela kwa Kisemi kimye kyonse?

¹¹ Mukamwenamo ka mu Kwikala na Kupopwela kwa Kisemi Kimye Kyonse? Bata muchima kumpopwelo ya kine bafwenya kwipi ne Yehoba. Kabiji bisemi bikosa bingi umvwe byakwatankana mu mpopwelo. Bamulume ne mukazhi bapainiya banembele’mba: “Byo tuji bapainiya babula baana, tutengela bingi Kupopwela kwa Kisemi. Kwitukwasha kufwenya kwipi na Shetu wa mwiulu ne kukosesha butemwe bwetu. Pa kubuka lukelo juba jo twikelapo na Kupopwela kwa Kisemi twiipuzha’mba: ‘Mwayuka byo tusa kuba lelo nyi? Tusa kwikala na Kupopwela kwa Kisemi!’”

¹² Lunengezho lwa kupopwela kwa kisemi lukwasha ne bisemi byapayankana. Nyenga muzhike painiya uji na baana babiji wanembele’mba: “Mu moba a kunyuma kechi twaikalanga na lufunjisho lwa kisemi javula ne. Na mambo a kukoka twaubangatu ja kamo kamo. Nakankalwanga kimye kya kwikelapo na lufunjisho. Onkao mambo, mbena kusanta bingi pa luno lunengezho lwa Kupopwela kwa Kisemi. Twikala na Kupopwela kwa Kisemi kimye kyonse kabiji mubena kufuma byawama.”

13. Ki ka kyakonsha kulengela kisemi kyenu kumwenamo mu kupopwela kwa kisemi?

¹³ Byonka byajinga juba ja Sabado, Kupopwela kwa Kisemi nako ke bupe bwafuma kwi Shetu wa mwiulu bwakukwasha bisemi. (Yako. 1:17) Bena Isalela byo baubanga pa juba ja Sabado byakoseshanga bulunda bwabo na Yehoba nangwa ne. Kyo kimotu ne atweba, byo tuba pa Kupopwela kwa kisemi bikosesha bulunda bwetu na Lesa nangwa ne. (2 Ko. 9:6; Nga. 6:7, 8; Kolo. 3:23, 24) Umvwe mwatako muchima ku luno lunengezho mukalengela kisemi kyenu kwamba byaambile nyimbi wa masalamo amba: “Pakuba kyangwamina amiwa kufwenya kwipi kwi Lesa: Amiwa namwalula Nkambo Lesa ke kyami kyakufyamamo Namba, ndondololenga mingilo yenu yonse.”—Sala. 73:28.

[Mabulañano pa peja 5]

Kupopwela kwa Kisemi kechi kwafwainwa kwikala kwa kwishintaukila ne, kwafwainwa kwikala kwa lusekelo byonka biji Lesa ye tupopwela

[Kitenguluzha pa peja 6]

KUTAYA NE

Mashinda amo a Kulondela pa Kupopwela kwa Kisemi

Baibolo:

• Kutangila pamo bitango bya mu mutanchi wa kutanga Baibolo kwa mulungu ne mulungu. Umvwe mu bitango muji jishimikila, umo wakonsha kutanganga jishimikila ne bakwabo na kutanga byambo byaambilenga bantu bajimo.

• Kufwanyikizha bantu batongolwa mu bitango bya kutanga Baibolo kwa mulungu ne mulungu.

• Kubujila jimo ba mu kisemi bitango byo bakatanga pa muntu pa muntu ne kunemba bwipuzho bumo nangwa abiji pa byo babula kumvwisha mu byobyo bitango. Apa bino ne kukapesela pesela pamo mikumbu ya oo mepuzho.

• Pa mulungu pa mulungu nembainga Binembelo pa tubipepala ne kweseka kwibivuluka ne kwibilumbulula. Tulainga tuno tubipepala ne kupitulukamo pa mulungu pa mulungu ne kumona binembelo byo mwakonsha kuvulukamo.

• Kuteleka ku selechi wenu wa kutanga Baibolo aku saka mulondelamo na Baibolo.

Kupwila:

• Kunengezhezha pamo mbaji imo ya kupwila.

• Kupituluka mu nyimbo ya Bufumu yo mukemba mulungu wiya.

• Umvwe umo mu kisemi uji na jashi mu Sukulu wa Mwingilo wa Lesa nangwa kimwesho mu Kupwila kwa Mwingilo, isambai bya kwijamba nangwa kwijamba kisemi saka kiteleka.

Bikebewa mu Kisemi:

• Kwisamba bibaba bya mu buku wa Kibemba wa Ifipusho Abacaice Bepusha nangwa mu buku wa Fundai ku Mufunjishi Wayukisha.

• Kuba bimwesho bya kunengezhezha jimo bya kuba na byakonsha kumweka ku sukulu.

• Kuba bimwesho amo bansemi mobekala nobe baana. Baana bapesapesa pa mitwe imo ne kwiya na kufunjisha bansemi babo.

Mwingilo:

• Kuba bimwesho bya kunengezha bya kwingila mu mwingilo ku mpelo ya mulungu.

• Kwisamba na kisemi pa byo bakonsha kuba pa kuba’mba bakengileko pakatampe mu mwingilo mu kimye kya Kivuluko nangwa kya kukokoloka.

• Kwipa kimye kicheche bonse mu kisemi kya kupesapesa bya kukumbula mepuzho apusana pusana akonsha kwipuzha bantu mu mwingilo ne kuba bimwesho bya kumwesha bya kwiakumbula.

Mashinda Akwabo:

• Kutangila pamo kibaba kiji mu Kyamba kya Usopa nangwa mu Awake! wa katataka.

• Ambilai bonse mu kisemi bakatange kibaba kyo batemwa kiji mu Kyamba kya Usopa nangwa mu Awake! ne kwamba bishinka byo batanamo.

• Pa bimye bimo mwaitako musapwishi nangwa bamulume ne mukazhi ku Kupopwela kwa Kisemi kabiji umvwe kyakonsheka mwakonsha ne kwibepuzha mepuzho.

• Kutamba vidyo ne kwisambapo.

• Kwisamba kibaba kya “Abacaice Bepusha Ukuti” nangwa kibaba kya “Pitulukenimo No Lupwa” kitanwa mu Loleni!

• Kwisamba kibaba kya “Funjishainga Baana Benu” nangwa “Kibaba kya Bakyanyike” kitanwa mu Kyamba kya Usopa.

• Kutanga ne kwisamba kibaba kiji mu Yearbook wakatataka nangwa mabuku alupwilwe pa kushonkena kwa nkambi.

• Kupituluka mu bishinka bya pa kushonkena nangwa pa kubuñana.

• Kutamba bilengwa na Lesa ne kwisambapo pa byo bitufunjisha pe Yehoba.

• Kulengela bintu pamo nabiji mapu nangwa bipikichala.