Kupopwela kwa Kisemi—Kwanema Bingi pa Kuba’mba Tukapuluke!
FWANYIKIZHAI “nkondo ya aja juba jikatampe ja Lesa, Wa bulume bonse” byo jikekalapo juba jilengesha moyo! (Lum. 16:14) Mu ñambilo ya kifwanyikizho, ngauzhi Mika wanembele’mba: “Mitumba ikasunguluka ne kulajika ke bimpachiko byonka bisunguluka sela uji kwipi na mujilo, kabiji byonka bipomoka mema kwakunkulukisha.” (Mika 1:4) Kintu ka kyatama kikobiwa ku boba babula kwingijila Yehoba? Mambo a Lesa aamba’mba: ‘Aba bo akepaya Yehoba bakalaala konse konse ne kwapela ntanda.’ —Yele. 25:33.
Pa mambo a luno lujimuno, mitwe ya bisemi, yavula ijitu bunke, yafwainwa kwiipuzha pa mambo a baana babo bakoma amba, ‘Nanchi baana bami bakapuluka pa Amagedonyi nyi? Baibolo waamba kuba’mba bakapuluka umvwe baikala na bulunda bwakosa ne Yehoba kwesakana na papelela bulume bwabo. —Mat. 24:21.
Buneme bwa Kwikala na Kimye kya Kupopwela kwa Kisemi
Byo muji bansemi, monai kuba’mba mwakomesha baana benu “na kwibafunjisha ne kwibajimuna monka mwaswila aye Nkambo.” (Efi. 6:4) Kyanema bingi kwikala na lufunjisho lwa Baibolo na baana benu. Tukeba bakyanyike betu kwikala byonka byajinga bena Kilishitu ba mu Filipai, abo Paulo bo atakaikile na mambo a kukokela Yehoba. Wanembele’mba: ‘Anweba batemwe bami, monka mo mwankokejilenga moba onse, ne panotu nkokelai, kechi byonka byo munkokela byo nji nenu ne, pakuba pano byo nji kungi kizhaimotu, ilumbulwilai anwe bene lupulukilo lwenu na kwakamwa ne kuzakama.’ —Fili. 2:12.
Nanchi baana benu bakokela mizhilo ya Yehoba nangwa kya kuba mwafumapo nyi? Ibyepi kimye kyo baji ku sukulu? Mwakonsha kukwasha byepi baana benu kuyuka mizhilo ya Yehoba pa kuba’mba ibatangijilenga nangwatu kimye kyo baji kwa bunke?
Kupopwela kwa kisemi kwakonsha kukosesha lwitabilo lwa baana benu. Onkao mambo, twayai twisambe pa bishinka bisatu byakonsha kulengela lufunjisho lwa Baibolo lwa kisemi kuwama.
Tangijilainga Lufunjisho lwa Kisemi Kimye Kyonse
Baibolo waamba kuba’mba bamalaika baana ba Lesa baya na kwimwesha koaji pa kimye kyatongolwa. (Yoba 1:6) Ne anweba ubainga byonkabyo ku baana benu. Ikalai na kimye ne juba ja kwikelamo na Kupopwela kwa Kisemi kabiji ne kulondelanga mutanchi wenu. Kunungapo, ikalai na kimye kikwabo kya kubilamo bino na mambo a bintu bitufikila bya kubula kuketekela.
Kechi mwafwainwa kwikala na muteeto wa kulanguluka amba kijitu bulongo kimye kimo kubula kwikala na lufunjisho lwa Baibolo lwa kisemi ne. Vulukai kuba’mba baana benu o mafunjisho enu a Baibolo akilamo kunema. Bino Satana usaka kwibeseka. (1 Pe. 5:8) Umvwe mwabula kwingijisha kimye kya Kupopwela kwa Kisemi na mambo a kutamba malangalanga nangwa ku bintu bikwabo byabula kunema, Satana ukemushinda. —Efi. 5:15, 16; 6:12; Fili. 1:10.
Vwangaimo Byambo bya Kwingijisha mu Bwikalo bwa pa Juba pa Juba
Kupopwela kwa Kisemi kechi kwafwainwa kwikala byonka byo kikala ku sukulu ne. Ibikaiko pa kuba’mba kuno Kupopwela kwa Kisemi kuwamenga. Mu ñanyi jishinda? Bimye bimo, salainga mitwe ikakwasha baana benu pa kupita mu meseko kimye kya kulutwe. Kya kumwenako, mambo ka a kubujila kupituluka mu byo mukengijisha mu mwingilo? Bakyanyike basangalala bingi kuba bintu byo bayukisha bulongo. Kunengezhezha jimo bya kwamba ne kulanguluka pa mashinda a kukumbwilamo bakana bukine, kwibakwasha kwikala bakosa kimye kyo babena kwingila mwingilo wa kusapwila Bufumu mu mbaji yapusana pusana. —2 Timo. 2:15.
Kabiji mwakonsha ne kunengezha bipungu bikakwasha baana benu kubula kulondela byuba bakwabo. Isambainga pa bintu byakonsha kulengela baana benu kuyuka bya kukumbula mo kibapelela. Kino kyavwangamo kwibepuzha baana benu pa mambo a makatazho o bapitamo, ku mpunzha ko batana ano makatazho, kyafwainwa kumwekana umvwe batanwa mu ano makatazho kabiji ne kyafwainwa kubiwa umvwe bachinchika ano makatazho. Pa kimye ne kimye mwafwainwa kupituluka mu byo bafwainwa kukumbula umvwe ke bapite mu makatazho.
Kupopwela kwa kisemi kupana jishuko ku bansemi ja kwamba pa mashuko aji mu kwibikila bikonkwanyi bya ku mupashi. “Mu jino jishinda, mashimikila a mu bwikalo anembwa mu magazini etu aamba pa bwikalo bwa bakalume bakishinka o mwafwainwa kwingijisha kukwashishamo baana benu kuyuka’mba kwingijila Yehoba kyo kintu kyawama kuba.” Tundaikai baana benu kwingilako bupainiya, kwingijila pa Betele, kutanwa ku Sukulu wa Lufunjisho lwa Mwingilo, nangwa kukanamina mingilo ikwabo ya kimye kyonse.
Nobe kwimujimunakotu: Bansemi bamo batesha muchima ku bintu byafwainwa kuba baana babo kulutwe na lwendo kya kuba bakankalwa ne kwibasanchila pa mingilo yawama yo babena kwingila pa kyokyo kimye. Pano bino kyawama kutundaika baana benu kwibikila bino bikonkwanyi bya kwingilako mwingilo wa pa Betele ne bumishonale. Nangwa byonkabyo, pa kuba bino mwafwainwa kujimuka kuchina mwakazhingijisha baana benu ne kwibalefula pa mambo a byo mubena kukeba amba bobe. (Kolo. 3:21) Kimye kyonse vulukainga amba baana benu bafwainwa kutemwa Yehoba na michima yabo yonse kechi na mambo a anweba ne. (Mat. 22:37) Onkao mambo monaingapo mashinda a kusanchilamo baana benu pa bintu byawama byo boba kabiji ne kubula kutatu muchima pa bintu byo babula kuba. Santainga pa bintu byonse byauba Yehoba. Apa bino mwaleka baana benu abo bene bemwena buwame bwa Yehoba.
Wamishainga Lufunjisho lwa Kisemi
Kintu kya busatu kyanema kilengela Kupopwela kwa Kisemi kwikala kwa lusekelo ke kwikuwamisha. Mwakonsha kuba byepi bino? Kimye kimo kampe mwakonsha kuteleka ku matepu nangwa kutamba mavidyo a bifwanyikizho o banengezha ku Bakamonyi ba kwa Yehoba ne kwisambapo. Nangwa mwakonsha kunengezha kipungu kya mu Baibolo kuba’mba yense mu kisemi atangeko.
Mu Kyamba kya Usopa muji bibaba byawama byakonsha kulengela lufunjisho lwa kisemi kuwama. Kya kumwenako, mu Kyamba kya Usopa kya kusha mu bujimi mwikala kibaba kya lufunjisho kya kuba’mba “Kibaba kya Bakyanyike.” Kabiji mwikala ne kibaba kya bansongwalume ne bansongwakazhi kya kuba’mba “Funjishainga Baana Benu.”
Kupopwela kwa kisemi kulengela bansemi kukwasha baana babo kuyuka buneme bwa kwibikila bikonkwanyi bya ku mupashi. Mwakonsha kwingijisha byambo byawama biji mu talakiti wa kuba’mba “Anweba Bakyanyike —Mukobapoka Mubwikalo Bwenu?” Kimye kyo mubena kwisamba pa uno talakiti kwashai baana benu kuyuka’mba kwingijila Yehoba kyo kintu kyawama kuba mu bwikalo.
Pano bino mwafwainwa kumona amba kechi mubena kwipwizha kitala mepuzho pa lufunjisho lwa kisemi ne. Kya kumwenako, bansemi bafwainwa kutundaikanga baana babo kwikala na magazini saka bakasuluka kwamba milanguluko yabo ne byo babena kwiumvwa pa bintu byo mubena kwisamba mu kisemi ne byo bafwainwa kwibingijisha mu bwikalo bwabo. Nangwa byonkabyo kechi mwafwainwa kukanjikizha baana benu kutanga na jiwi jasansuka byo banemba mu magazini wabo ne. Kuba bino kwakonsha kwibalengela kubula kukasuluka pa kunemba byambo. Kechi mwafwainwa kumona byanemba baana benu ne. Mu kuya kwa kimye abo bene bakonsha kukasuluka ne kwimubula byo banemba.”
Umvwe kemwikale na kupopwela kwa kisemi kimye kyonse, kuvwangamo byambo bya kwingijisha mu bwikalo bwa pa juba pa juba kabiji ne kwikulengela kwikala kwawama, kine Yehoba ukemupesha bingi pa byo mwibikako. Kino kimye kya kisemi kyanema kikemulengelanga kukwasha batemwe benu kukosa ku mupashi.
[Kitenguluzha pa peja 31]
Ubainga Bintu na Maana
“Pa kufunda na baana betu babakazhi bakyanyike, bamwatawami ne amiwa twanengezhezhanga pamo kupwila kwa kipwilo, apa bino twaambila baana betu kunemba kipikichala pa bintu byonse byo twafunda. Twafwanyikizhanga bya kumwenako biji mu Baibolo nangwa kupituluka mu bya kwamba mu mwingilo wa mu bujimi. Twafundanga kwesakana na mafumbi abo, kabiji lufunjisho lwawamanga bingi ne kutundaikañana kwa kubula kulenga mukose.” —J.M., United States.
“Pa kuba’mba tukwashe mwana wamulume wa yewa muntu ye nafunjishanga Baibolo kumvwa byo baingijishanga muvungilo mu myaka ya kala, twapulintanga buku wa Isaya panyuma ya kufutamo bitango ne byepelo. Kepo twanungankenye bino bipepala ne kwibikashila ku kauba nobe kajitumbo. Panyuma ya bino, uno mwana bino waeseka kuba byonka byaubile Yesu mu shinagoga wa ku Nazala. Jishimikila janembwa mu Luka 4:16-21 jashimikizha’mba Yesu ‘wavungulwile buku, [muvungilo wa kwa Isaya] ne kutana’ byambo byo akebelenga. (Isa. 61:1, 2) Nangwa byonkabyo, uno mwana naye byo aesekele kuba byonkabye, kyamushupile bingi kutuluka pajinga Isaya 61 pa yewa muvungilo walepele pabujile bitango ne byepelo. Byo atemenwe pa busendwe bwa kwa Yesu pa kutanga mu mivungilo, uno mwana waambile’mba: ‘Yesu wajinga bingi na maana!’” —Y.T., Japan.
[Kipikichala pa peja 30]
Inge kemupituluke mu bya kwamba mukakwasha baana benu kubula kulondela byuba bakwabo
[Kipikichala pa peja 31]
Ibikaingako pa kuba’mba Kupopwela kwa Kisemi kuwamenga